ລູກສາວອາຍຸ 37 ປີ ຂອງມະຫາເສດຖີພັນລ້ານ ທ່ານທັກສິນ ຊິນນະວັດ ໄດ້ກາຍເປັນນາຍົກລັດຖະມົນຕີຂອງໄທໃນວັນສຸກມື້ນີ້ ເຊິ່ງເປັນສະມາຊິກຄົນທີ 3 ຂອງຜູ້ມີອິດທິພົນ ແຕ່ມີຄວາມແຕກແຍກໃນການນຳພາປະເທດ.
ນາງ ແພທອງທານ ຊິນນະວັດ, ເປັນຜູ້ນໍາທີ່ໜຸ່ມນ້ອຍທີ່ສຸດໃນປະຫວັດສາດ ຂອງປະເທດໄທ ເຊິ່ງເປັນລະບອບລາຊາທິປະໄຕພາຍໃຕ້ລັດຖະທໍາມະນູນ ແລະເປັນນາຍົກລັດຖະມົນຕີແມ່ຍິງຄົນທີສອງຫຼັງຈາກອາຂອງນາງ ທ່ານນາງ ຍິ່ງລັກ ເຊິ່ງເຂົ້າຮັບຕໍາແໜ່ງຫຼັງຈາກສານປົກຄອງຕັດສິນສອງຄັ້ງ ທີ່ເຮັດໃຫ້ ການເມືອງຂອງລາຊະອານາຈັກໄທກ້າວເຂົ້າສູ່ຄວາມວຸ່ນວາຍ.
ທ່ານນາງ ແພທອງທານ ຫວັງວ່ານາງຈະຫຼີກລ້ຽງຊະຕາກຳດຽວກັບ ພໍ່ ແລະ ອາຂອງລາວ, ໂດຍທັງສອງທ່ານໄດ້ຖືກປົດອອກຈາກຕໍາແໜ່ງເປັນນາຍົກ ລັດຖະມົນຕີໂດຍກອງທັບ ໃນລະຫວ່າງການຕໍ່ສູ້ທາງອຳນາດເປັນເວລາ 2 ທົດສະວັດລະຫວ່າງ ທ່ານ ທັກສິນ ແລະລັດທິອະນຸລັກນິຍົມທີ່ສະໜັບສະໜູນ ທະຫານຂອງຣາຊະອານາຈັກ ເຊິ່ງເປັນການຈັດຕັ້ງທີ່ສະໜັບສະໜູນ ຣາຊະວົງໄທ.
ສະມາຊິກລັດຖະສະພາ ໄດ້ຮັບຮອງເອົາ ທ່ານນາງ ແພທອງທານ ຂອງພັກ ເພື່ອໄທ ເປັນນາຍົກລັດຖະມົນຕີ ດ້ວຍຄະແນນ 319 ຕໍ່ 145 ສຽງ, ໂດຍປະທານສະພາຕໍ່າ ທ່ານ ວັນ ມູຮາມັດ ນໍ ມັດທາ (Wan Muhamad Noor Matha) ກ່າວໃນລາຍການອອກອາກາດສົດ.
ທ່ານນາງ ແພທອງທານ ກ່າວວ່າ ນາງ “ຮູ້ສຶກເປັນກຽດ ແລະມີຄວາມສຸກ ຫຼາຍ.”
ໂດຍນາງກ່າວຕໍ່ບັນດານັກຂ່າວວ່າ “ຂ້າພະເຈົ້າຫວັງແທ້ໆວ່າ ຂ້າພະເຈົ້າ ຈະສາມາດເຮັດໃຫ້ປະຊາຊົນມີຄວາມໝັ້ນໃຈໄດ້. ຂ້າພະເຈົ້າຫວັງຢ່າງຍິ່ງທີ່ ຈະຍົກລະດັບຄຸນນະພາບຊີວິດ ແລະອໍານາດຂອງປະຊາຊົນໄທທຸກຄົນໄດ້.”
“ຂ້າພະເຈົ້າໄດ້ຕັດສິນໃຈວ່າ ມັນເຖິງເວລາແລ້ວທີ່ຈະດໍາເນີນການບາງຢ່າງເພື່ອປະເທດຊາດ ແລະພັກຂອງຕົນ, ຂ້າພະເຈົ້າຫວັງວ່າ ຂ້າພະເຈົ້າຈະເຮັດໃຫ້ດີທີ່ສຸດ ເພື່ອເຮັດໃຫ້ປະເທດກ້າວໄປຂ້າງໜ້າ.”
ນາຍົກລັດຖະມົນຕີກໍາປູເຈຍ ທ່ານ ຮຸນ ມາເນດ ຄືກັນກັບ ທ່ານນາງ ແພທອງທານ, ເຊິ່ງເປັນລູກຂອງນາຍົກລັດຖະມົນຕີຄົນກ່ອນ, ໄດ້ສົ່ງ ການສະແດງຄວາມຍິນດີມາໃຫ້ນາງ.
ການເລື່ອນຂຶ້ນສູ່ຕໍາແໜ່ງສູງສຸດຂອງ ທ່ານນາງ ແພທອງທານ ມີຂຶ້ນລຸນຫຼັງສານລັດຖະທຳມະນູນຂອງຣາຊະອານາຈັກ ໄດ້ປົດນາຍົກລັດຖະມົນຕີຄົນກ່ອນ ທ່ານ ເສດຖາ ທະວີິສີນ ອອກຈາກຕຳແໜ່ງຄະນະລັດຖະມົນຕີ ດ້ວຍການຕັດສິນໂທດທາງອາຍາ.
ຟໍຣັມສະແດງຄວາມຄິດເຫັນ