ທາງການໄທ ຄາດໝາຍວ່າ ຈະໄດ້ປຽບດຸນການຄ້າຕໍ່ລາວ ຄິດເປັນມູນຄ່າຫຼາຍກວ່າ 70,000 ລ້ານບາດ ໃນປີ 2024 ທັງຍັງໄດ້ວາງເປົ້າໝາຍຈະເພີ້ມການຄ້າກັບເພື່ອນບ້ານໃຫ້ເຖິງ 2,000 ຕື້ບາດ ໃນປີ 2027.
ເຈົ້າໜ້າທີ່ກະຊວງການຄ້າຂອງໄທ ເປີດເຜີຍວ່າ: ການຄ້າລະຫວ່າງ ໄທ-ລາວ ໃນໄລຍະ 9 ເດືອນທີ່ຜ່ານມາຂອງປີ 2024 ມີມູນຄ່າທັງໝົດ 617,116 ລ້ານບາດ ເພີ່ມຂຶ້ນ 11.11 ເປີ ເມື່ອທຽບໃສ່ໄລຍະດຽວກັນຂອງປີ 2023 ໃນນີ້ເປັນການສົ່ງສິນຄ້າຈາກລາວໄປໄທ ໃນມູນຄ່າ 285,328 ລ້ານບາດ ແລະລາວໄດ້ນຳເຂົ້າສິນຄ້າຈາກໄທ 331,787 ລ້ານບາດ ຊຶ່ງເຮັດໃຫ້ລາວ ຂາດດຸນການຄ້າຕໍ່ໄທຄິດເປັນມູນຄ່າ 46,459 ລ້ານບາດ ແລະຄາດໝາຍວ່າ ລາວຈະຂາດດຸນການຄ້າຕໍ່ໄທ ຄິດເປັນມູນຄ່າລວມຫຼາຍກວ່າ 70,000 ລ້ານບາດ ໃນຕະຫຼອດປີ 2024 ໂດຍສິນຄ້ານຳເຂົ້າທີ່ເຮັດໃຫ້ລາວຂາດດຸນການຄ້າຫຼາຍທີ່ສຸດນັ້ນ ກໍຄືນ້ຳມັນ, ພາຫະນະ, ເຄື່ອງຈັກ, ສິນຄ້າອຸປະໂພກບໍລິໂພກ. ໃນຂະນະທີ່ສິນຄ້າສົ່ງອອກຍັງມີຢ່າງຈຳກັດ ກໍຄື ໄຟຟ້າ ແຮ່ທາດ ແລະສິນຄ້າກະສິກຳເທົ່ານັ້ນ ດັ່ງເຈົ້າໜ້າທີ່ໄທ ຢືນຢັນວ່າ “ໂດຍສະເລ່ຍ ເຮົາຈະໄດ້ດຸນການຄ້າຈາກລາວ ປີລະປະມານ 70,000 ລ້ານບາດ ແລ້ວກໍເປັນປະເທດທີ່ເຮົາໄດ້ດຸນການຄ້າສູງທີ່ສຸດໃນບັນດາປະເທດໃນອາຊຽນ. ເພາະວ່າ ສິນຄ້າທີ່ສົ່ງໄປລາວ ສ່ວນໃຫຍ່ກໍຈະເປັນພວກນ້ຳມັນ. ພວກຊິ້ນສ່ວນລົດຍົນຕ່າງໆ ແລ້ວກະພວກອຸປະກອນເຄື່ອງໃຊ້ໃນຄົວເຮືອນ ໃນຊີວິດປະຈໍາວັນ ພວກເຂົາຂາຍມາທີ່ເຮົາ ກໍພວກພະລັງງານໄຟຟ້າ ແລ້ວກະພວກຜັກ ແລະໝາກໄມ້ແປຮູບເບື້ອງຕົ້ນ ແລະເຂົາກໍຂາດດຸນມາດົນ ເພາະສະນັ້ນ ຄົນລາວກໍຍັງມີບັນຫາຄວາມຍາກຈົນຢູ່.”
ຍິ່ງໄປກວ່ານັ້ນ ທາງການໄທ ຍັງໄດ້ວາງເປົ້າໝາຍທີ່ຈະເພີ່ມມູນຄ່າການຄ້າກັບບັນດາປະເທດທີ່ມີຊາຍແດນຕິດຕໍ່ກັບໄທ ຄື ມຽນມາ ລາວ, ກຳປູເຈຍ ແລະມາເລເຊຍ ລວມທັງການຄ້າຂ້າມຊາຍແດນໄປ ຈີນ ສິງກະໂປ ແລະ ຫວຽດນາມດ້ວຍນັ້ນ ໃຫ້ມີມູນຄ່າລວມເຖິງ 2,000 ຕື້ບາດ ຫຼື 2 ພັນຕື້ບາດໃນປີ 2027 ໃຫ້ໄດ້ຢ່າງເປັນຮູບປະທຳອີກດ້ວຍ ດັ່ງເຈົ້າໜ້າທີ່ໃນກົມການຄ້າຕ່າງປະເທດຂອງໄທ ໃຫ້ການຢືນຢັນວ່າ “ລັດຖະມົນຕີວ່າການກະຊວງການຄ້າ ກໍໄດ້ແຕ່ງຕັ້ງຄະນະອະນຸກຳມະການທີ່ເປັນກົນໄກໃນການຊຸກຍູ້ວຽກງານທີ່ກ່ຽວກັບການສົ່ງເສິມ ແລະ ອຳນວຍຄວາມສະດວກທາງການຄ້າຜ່ານແດນ-ຊາຍແດນຂອງໄທ ພ້ອມທັງແກ້ໄຂບັນຫາອຸບປະສັກທາງການຄ້າ ແລະ ການລົງທຶນ. ເຊິ່ງກະສອດຄ່ອງກັບຍຸດທະສາດທີ່ວາງໄວ້ວ່າ ພວກເຮົາຈະສົ່ງເສີມການຄ້າແລະການລົງທຶນໃຫ້ມີການເຕີບໂຕ ເປົ້າໝາຍຫລັກກໍຄື ເປັນການເພີ່ມມູນຄ່າການຄ້າຊາຍແດນ ແລະຜ່ານແດນເປັນ 2 ພັນຕື້ບາດ ພາຍໃນປີ 2027.”
ໂດຍໃນໄລຍະ 9 ເດືອນຜ່ານມາຂອງປີ 2024 ການຄ້າຕ່າງປະເທດຂອງລາວ ມີມູນຄ່າລວມເຖິງ 11,249 ລ້ານໂດລາ ສະຫະລັດ, ແຕ່ລາວຍັງຄົງຂາດດຸນການຄ້າຢ່າງຕໍ່ເນື່ອງ ກໍຄືໃນຂະນະທີ່ລາວ ສົ່ງອອກສິນຄ້າໃນມູນຄ່າທັງໝົດ 5,231 ລ້ານໂດລານັ້ນ ແຕ່ກະໄດ້ນຳເຂົ້າສິນຄ້າຕ່າງປະເທດ ໃນມູນຄ່າ 6,018 ລ້ານໂດລາສະຫະລັດ, ເຮັດໃຫ້ລາວ ປະສົບກັບການຂາດດຸນການຄ້າ ຄິດເປັນມູນຄ່າ 787 ລ້ານໂດລາສະຫະລັດ ໃນໄລຍະດັ່ງກ່າວໂດຍສິນຄ້ານຳເຂົ້າຈາກຕ່າງປະເທດທີ່ເຮັດໃຫ້ລາວ ຂາດດຸນການຄ້າຫລາຍທີ່ສຸດ ກໍຄືນ້ຳມັນ ຍານພາຫະນະ ເຄື່ອງຈັກ ແລະສິນຄ້າອຸປະໂພກບໍລິໂພກ ໃນຂະນະທີ່ສິນຄ້າສົ່ງອອກຍັງມີຈຳກັດ ກໍຄື: ໄຟຟ້າ, ແຮ່ທາດ ແລະ ສິນຄ້າກະສິກຳ ເທົ່ານັ້ນ
ແຕ່ຢ່າງໃດກໍ່ຕາມ ຖ້າຫາກວ່າ ລວມມູນຄ່າການສົ່ງອອກພະລັງງານໄຟຟ້າດ້ວຍນັ້ນ ກໍຈະເຮັດໃຫ້ລາວ ເປັນຝ່າຍທີ່ເກີນດຸນການຄ້າຕ່າງປະເທດ. ແຕ່ເນື່ອງຈາກວ່າ ໄຟຟ້າທີ່ສົ່ງອອກໄປຕ່າງປະເທດນັ້ນ ເປັນການລົງທຶນຂອງບໍລິສັດຕ່າງປະເທດທີ່ກູ້ຢືມທຶນຈາກຕ່າງປະເທດ ຈຶ່ງຕ້ອງນຳໃຊ້ລາຍຮັບສ່ວນຫລາຍທີ່ໄດ້ຈາກການສົ່ງອອກໄຟຟ້ານັ້ນໄປເພື່ອການຊຳລະໜີ້ດັ່ງກ່າວ ເພາະສະນັ້ນ ຈຶ່ງບໍ່ໄດ້ໂອນເງິນທີ່ໄດ້ຈາກການສົ່ງອອກພະລັງງານໄຟຟ້າ ເຂົ້າໃນລະບົບທະນາຄານໃນລາວ ແຕ່ຍ່າງໃດ ດ້ວຍເຫດນີ້ ຈຶ່ງເຮັດໃຫ້ລາວຍັງປະເຊີນກັບການຂາດດຸນການຊຳລະບັນຊີດ້ານເງິນຕາຕ່າງປະເທດຢູ່ເລື່ອຍມາ.
ຟໍຣັມສະແດງຄວາມຄິດເຫັນ