ລິ້ງ ສຳຫລັບເຂົ້າຫາ

ວັນອັງຄານ, ໑໖ ກໍລະກົດ ໒໐໒໔

ອະ​ດີດ​ນາ​ຍົກ​ໄທ ທ່ານ ທັກ​ສິນ ຢ້ຽມ​ຢາມ​ບ້ານ​ເກີດ​ເປັນ​ຄັ້ງ​ທຳ​ອິດ ​ນັບ​ຕັ້ງ​ແຕ່​ຖືກ​ຂັບ​ໄລ່


ຜູ້​ສະ​ໜ​ັບ​ສະ​ໜູນ​ຄົນ​ນຶ່ງ​ຖ່າຍ​ຮູບ​ແຊວ​ຟີ​ກັບ​ອະ​ດີດ​ນາ​ຍົກ​ລັດ​ຖະ​ມົນ​ຕີ ໄທ ທ່ານ ທັກ​ສິນ ຊິນ​ນະ​ວັດ, ຈັງ​ຫວັດ ຊຽງ​ໃໝ່, ໄທ, 14 ມີ​ນາ 2024.
ຜູ້​ສະ​ໜ​ັບ​ສະ​ໜູນ​ຄົນ​ນຶ່ງ​ຖ່າຍ​ຮູບ​ແຊວ​ຟີ​ກັບ​ອະ​ດີດ​ນາ​ຍົກ​ລັດ​ຖະ​ມົນ​ຕີ ໄທ ທ່ານ ທັກ​ສິນ ຊິນ​ນະ​ວັດ, ຈັງ​ຫວັດ ຊຽງ​ໃໝ່, ໄທ, 14 ມີ​ນາ 2024.

ອະ​ດີດ​ນາ​ຍົກ​ລັດ​ຖະ​ມົນ​ຕີ​ຂອງ ໄທ ທ່ານ ທັກ​ສິນ ຊິນ​ນະ​ວັດ ໄດ້​ເດີ​ນ​ທາງ​ດ້ວຍ​ເຮືອ​ບິນ​ສ່ວນ​ຕົວ​ເພື່ອ​ໄປ​ຢ້ຽມ​ຢາມ​ບ້ານ​ເກີດ​ຂອງ​ທ່ານ​ຢູ່​ຈັງ​ຫວັດ ຊຽງ​ໃໝ່ ເປັນ​ຄັ້ງ​ທຳ​ອິດ​ໃນ​ວັນ​ພະ​ຫັດ​ມື້ນີ້ ນັບ​ຕັ້ງ​ແຕ່​ໄດ້ຫຼົບ​ໜີ​ອອກ​ຈາກ​ປະ​ເທດຫຼັງ​ຈາກ​ການ​ກໍ່​ລັດ​ຖະ​ປະ​ຫານ​ໃນ​ປີ 2006.

ມະ​ຫາ​ເສດ​ຖີ​ພັນ​ລ້ານ​ທີ່​ມີ​ອິດ​ພົນ​ດັ່ງ​ກ່າວ​ ໄດ້​ເປັນ​ບຸກ​ຄົນ​ສຳ​ຄັນ​ໃນ​ການ​ເມືອງ​ໄທ ເປັນ​ເວ​ລາ​ສອງ​ທົດ​ສະ​ວັດ, ເຊິ່ງ​ໃນ​ລະ​ຫວ່າງ​ນັ້ນພັກ​ເພື່ອ​ໄທ​ທີ່​ໄດ້​ຮັບ​ການ​ໜູນ​ຫລັງ​ໂດຍ​ຄອບ​ຄົວ​ຂອງ​ທ່ານ ​ໄດ້​ຊະ​ນະ​ການ​ເລືອກ​ຕັ້ງ​ທົ່ວ​ໄປ​ເກືອບ​ທຸກ​ຄັ້ງ ແລະ ຕອນນີ້​ແມ່ນ​ຢູ່​ໃນ​ອຳ​ນາດ.

ໃນ​ເດືອນ​ສິງ​ຫາ​ທີ່​ຜ່ານ​ມາ​ທ່ານ​ໄດ້​ທຳ​ການ​ເດີນ​ທາງ​ກັບ​ບ້ານ​ຄັ້ງ​ສຳ​ຄັນ​ຈາກ​ການ​ເນ​ລະ​ເທດ​ຕົນ​ເອງ​ ເພື່ອຫຼີກ​ລ່ຽງ​ການ​ຖືກ​ຂັງ​ຄຸກ​ສຳ​ລັບ​ການ​ກ່າວ​ຫາ​ລະ​ເມີດ​ອຳ​ນາດ.

ຫຼັງ​ຈາກ​ຖືກ​ຂັງ​ໃນ​ຄຸກ​ໂຮງ​ໝໍ​ພຽງ 6 ເດືອນ, ທ່ານ ທັກ​ສິນ ກໍ​ໄດ້​ຮັບ​ການ​ປ່ອຍ​ໂຕ​ໂດຍ​ມີ​ເງື່ອນ​ໄຂ​ ໃນ​ເດືອນ​ກຸມ​ພາ​ທີ່​ຜ່ານ​ມາ ແມ່ນ​ກະ​ທັ້ງ​ທີ່ບໍ່​ໄດ້​ຢູ່​ໃນ​ຄຸກ​ແມ່ນ​ແຕ່​ຄືນ​ດຽວ​ສຳ​ລັບ​ການ​ຕັດ​ສິນ​ໂທດ​ທີ່​ຖືກຫຼຸດ​ຜ່ອນ​ລົງ​ໂດຍ​ກະ​ສັດ​ຈາກ 8 ປີ​ເປັນ 1 ປີ.

ທ່ານ ທັກ​ສິນ, ທີ່​ໃສ່​ຜ້າປິດ​ປາກ ແລະ ສິ່ງ​ຄ້ຳ​ຈູນ​ຄໍ, ໄດ້​ຍ່າງ​ຄຽງ​ຂ້າງ​ລູກ​ສາວຄື​ທ່ານ​ນາງ ແພ​ທອງ​ທານ ຊິນ​ນະ​ວັດ, ລັດ​ຖະ​ມົນ​ຕີ​ກະ​ຊວງ​ກະ​ສິ​ກຳ ທ່ານ ທຳມະ​ນັດ ພ​ຣົມ​ພາວ ແລະ ເຈົ້າ​ໜ້າ​ທີ່ຫຼາຍ​ສິບ​ຄົນ​ເວ​ລາ​ທີ່​ທ່າ​ນ​ເດີນ​ທາງ​ຮອດ​ສຳ​ລັບ​ການ​ຢ້ຽມ​ຢາມ, ແຕ່​ທ່ານບໍ່​ໄດ້​ລົມ​ກັບ​ສື່ມວນ​ຊົນ.

ຜູ້​ສະ​ໜັບ​ສະ​ໜູນ​ຄົນ​ນຶ່ງ​ໄດ້​ກ່າວ​ຕໍ່​ອະ​ດີດ​ນາ​ຍົກ​ໃນ​ການ​ຢຸດ​ແວ່​ຄັ້ງ​ທຳ​ອິດ​ຢູ່​ສວນ​ສາ​ທາ​ລະ​ນະ​ແຫ່ງ​ນຶ່ງວ່າ “ຄິດ​ຮອດ​ທ່ານ,” ບ່ອນ​ທີ່​ທ່ານ​ໄດ້​ພົບ​ປະ​ກັບ​ກຸ່ມ​ປະ​ຊາ​ຊົນຫຼາຍ​ສິບ​ຄົນ ໂດຍ​ທ່ານ​ໄດ້​ນົບ​ຕາມ​ປະ​ເພ​ນີ​ການ​ທັກ​ທາຍ​ຂອງ​ຄົນ ໄທ, ກ່ອນ​ທີ່​ນາງ​ຈະ​ຖ່າຍ​ຮູບແຊວ​ຟີ​ກັບ​ທ່ານ.

ຄຳ​ວ່າ “ນາ​ຍົກ​ລັດ​ຖະ​ມົນ​ຕີ​ໃນ​ຫົວ​ໃຈ​ຂອງ​ພວກ​ເຮົາ,” ໄດ້​ຖືກ​ພິມ​ໃສ່​ກ້ອງ​ຮູບ​ຂອງ​ທ່ານ ທັກ​ສິນ ທີ່​ຕິດ​ຢູ່​ເສື້ອ​ຄຸມ​ຂອງ​ອີກ​ຄົນ​ນຶ່ງ.

ໃນ​ເວ​ລາ​ຂອງ​ການ​ປ່ອຍ​ຕົວ​ທ່ານ​ອອກ​ຈາກ​ຄຸກ​ນັ້ນ, ເຈົ້າ​ໜ້າ​ທີ່​ຄົນ​ນຶ່ງ​ໄດ້​ອະ​ທິ​ບາຍ​ວ່າ ​ທ່ານ “ມີ​ຄວາມ​ເຈັບ​ປ່ວຍ​ຢ່າງ​ແທ້ຈິງ,” ເຊິ່ງ​ທ່ານ​ຕ້ອງ​ໄດ້​ນັ່ງ​ຢູ່​ລໍ້ ແລະ ໃສ່​ຜ້າ​ຄ້ອງ​ແຂນ.

ລັດ​ຖະ​ມົນ​ຕີ​ກະ​ຊວງ​ຍຸ​ຕິ​ທຳ​ ທ່ານ ທະ​ວີ ສອດ​ຊ່ອງ ໄດ້​ກ່າວ​ວ່າ​ທ່ານ ທັກ​ສິນ ໄດ້​ຂໍ​ອະ​ນຸ​ຍາດ​ສຳ​ລັບ​ການ​ຢ້ຽມ​ຢາມ​ດັ່ງ​ກ່າວ ເພື່ອ​ຫາ​ຄຳ​ແນະ​ນຳ​ທາງ​ການ​ແພດ​ອື່ນ ແລະ ສະ​ແດງ​ຄວາມ​ເຄົາ​ລົບ​ຕໍ່​ບັນ​ພະ​ບູ​ລຸດ​ຂອງ​ທ່ານ.

ອ່ານ​ຂ່າວນີ້​ເປັນ​ພາ​ສາ​ອັງ​ກິດ

ຟໍຣັມສະແດງຄວາມຄິດເຫັນ

XS
SM
MD
LG