ລິ້ງ ສຳຫລັບເຂົ້າຫາ

ວັນຈັນ, ໑໕ ກໍລະກົດ ໒໐໒໔

ສານຂອງໄທ ຈະພິຈາລະນາຄະດີ ທາງດ້ານການເມືອງ ທີ່ອ່ອນໄຫວ ໃນອາທິດໜ້ານີ້


ນາຍົກລັດຖະມົນຕີຂອງໄທ ທ່ານເສດຖາ ທະວີສິນ ມາຢືນຕ້ອນຮັບການມາເຖິງຂອງ ຊຸລຕານ ຮັສຊານາລ ໂບລເກຍ ແຫ່ງບຣູນາຍ ຢູ່ທີ່ທໍານຽບລັດຖະບານໃນບາງກອກ, ວັນທີ 29 ເມສາ 2024.
ນາຍົກລັດຖະມົນຕີຂອງໄທ ທ່ານເສດຖາ ທະວີສິນ ມາຢືນຕ້ອນຮັບການມາເຖິງຂອງ ຊຸລຕານ ຮັສຊານາລ ໂບລເກຍ ແຫ່ງບຣູນາຍ ຢູ່ທີ່ທໍານຽບລັດຖະບານໃນບາງກອກ, ວັນທີ 29 ເມສາ 2024.

ສານ​ຂອງ​ໄທ ​ຈະຈັດດຳ​ເນີນ​ຄະດີ​ຕໍ່ 3 ຄົນ ທີ່ຖືກຟ້ອງດ້ວຍຂໍ້ຫາທາງດ້ານການເມືອງ ​ໃນ​ອາທິດ​ໜ້າ, ​ເຊິ່ງໃນນັ້ນ ​ລວມມີນຶ່ງ​ຄະດີທີ່​ອາດ​ຈະ​ນຳ​ໄປ​ສູ່​ການ​ປົດຕໍາແໜ່ງຂອງ​ນາຍົກລັດຖະມົນຕີ, ​ໂດຍຄາດຄະເນວ່າ ​ຈະພາໃຫ້​ມີ​ຄວາມ​ບໍ່​ໝັ້ນຄົງ​ຂອງ​ລັດຖະບານເພີ້ມ​ຫຼາຍ​ຂຶ້ນ ຢູ່​ໃນ​ປະ​ເທດເຂດ​ເອເຊຍ​ຕາ​ເວັນ​ອອກສຽງ​ໃຕ້ແຫ່ງນີ້, ອີງຕາມລາຍງານຂອງອົງການຂ່າວ Reuters.

ຖະແຫຼງການສະບັບນຶ່ງທີ່ອອກ ໃນວັນພຸດມື້ນີ້, ສານລັດຖະທຳມະນູນ ກ່າວວ່າ ຕົນຈະພິຈາລະນາຄະດີຕໍ່ນາຍົກລັດຖະມົນຕີ ທ່ານ ເສດຖາ ທະວີສິນ ໃນວັນທີ 18 ມິຖຸນາ ທີ່ຈະມາເຖິງນີ້, ເຊິ່ງສາເຫດ ແມ່ນມາຈາກການຮ້ອງທຸກໂດຍສະມາຊິກສະພາສູງ 40 ທ່ານ ທີ່ໄດ້ຮັບການແຕ່ງຕັ້ງໂດຍກອງທັບ, ຜູ້ທີ່ໄດ້ກ່າວຫາວ່າ ທ່ານເສດຖາ ກະທໍາການລະເມີດຕໍ່ລັດຖະທໍາມະນູນ ດ້ວຍການແຕ່ງຕັ້ງຄະນະລັດຖະບານ.

ສານດັ່ງກ່າວ ຍັງໄດ້ກ່າວອີກວ່າ ຕົນຈະດຳເນີນການໄຕ່ສວນ ໃນວັນອັງຄານ ອາທິດໜ້າ ໃນຄະດີທີ່ຖືກຍົກຂຶ້ນມາ ໂດຍຄະນະກຳມາທິການການເລືອກຕັ້ງຂອງປະເທດ ທີ່ຫາທາງຈະຍຸບ ພັກກ້າວໄກ (Move Forward Party) ເຊິ່ງເປັນພັກຝ່າຍຄ້ານ.

ພັກດັ່ງກ່າວ ເປັນຜູ້ທີ່ໄດ້ຮັບຊະນະຢ່າງບໍ່ຄາດຄິດ ສໍາລັບການເລືອກຕັ້ງທົ່ວໄປໃນປີທີ່ຜ່ານມາ, ແຕ່ບໍ່ປະສົບຜົນສໍາເລັດໃນການຈັດຕັ້ງລັດຖະບານ ລຸນຫຼັງພັກດັ່ງກ່າວ ຖືກຂັດຂວາງໂດຍບັນດານັກການເມືອງຫົວອະນຸລັກນິຍົມ ທີ່ຈົງຮັກພັກດີສະຖາບັນກະສັດ.

ອະດີດຜູ້ລົງສະໝັກນາຍົກລັດຖະມົນຕີຂອງໄທ ແລະເປັນອະດີດຫົວໜ້າພັກກ້າວໄກ ທ່ານພິທາ ລິ້ມຈະເຣີນຣັດ ກ່າວກັບນັກຂ່າວຢູ່ດ້ານນອກສານລັດຖະທໍາມະນູນໃນບາງກອກ, ວັນທີ 24 ມັງກອກ 2024, ລຸນຫຼັງສານ ຕັດສິນຄືນສະຖານະພາບສະມາຊິກສະພາໃຫ້ແກ່ລາວ.
ອະດີດຜູ້ລົງສະໝັກນາຍົກລັດຖະມົນຕີຂອງໄທ ແລະເປັນອະດີດຫົວໜ້າພັກກ້າວໄກ ທ່ານພິທາ ລິ້ມຈະເຣີນຣັດ ກ່າວກັບນັກຂ່າວຢູ່ດ້ານນອກສານລັດຖະທໍາມະນູນໃນບາງກອກ, ວັນທີ 24 ມັງກອກ 2024, ລຸນຫຼັງສານ ຕັດສິນຄືນສະຖານະພາບສະມາຊິກສະພາໃຫ້ແກ່ລາວ.

ສານດັ່ງກ່າວ ຍັງບໍ່ທັນໄດ້ກໍານົດວັນເວລາ ທີ່ແນ່ນອນເທື່ອ ສໍາລັບຄໍາຕັດສິນຂອງທັງສອງຄະດີນີ້.

ໃນ​ຂະ​ນະ​ດຽວ​ກັນ, ອະ​ດີດ​ນາ​ຍົກ​ລັດ​ຖະ​ມົນ​ຕີ ທີ່​ມີ​ອິດ​ທິ​ພົນ​ ​ທ່ານ​ທັກ​ສິນ ຊິນ​ນະ​ວັດ ຜູ້ທີ່ກັບ​ຄືນ​ໄປ​ປະ​ເທດ​ໄທ ​ໃນ​ເດືອນ​ສິງ​ຫາ​ຜ່ານ​ມາ ລຸນ​ຫຼັງ​ໄດ້ເນ​ລະ​ເທດ​ຕົນ​ເອງ ເປັນເວລາ 15 ປີ​ ມີກໍາ​ນົດ​ທີ່ຈະຖືກ​ຕັ້ງຂໍ້ຫາ​ຢ່າງ​ເປັນ​ທາງ​ການ​ຢູ່ສານອາຍາ ໃນ​ວັນ​ອັງຄານ​ໜ້າ​ນີ້ເຊັ່ນກັນ ​ໃນ​ຂໍ້​ກ່າວ​ຫາວ່າ ດູ​ໝິ່ນສະຖາບັນກະສັດ ​ແລະ​ອາດຊະຍາ​ກຳທາງ​ຄອມ​ພິວ​ເຕີ.

ຄະດີຕ່າງໆໃນສານ ໄດ້ພາໃຫ້ເກີດຄວາມບໍ່ແນ່ນອນທາງດ້ານການເມືອງຢູ່ໃນປະເທດທີ່ມີລະບົບເສດຖະກິດໃຫຍ່ອັນດັບສອງຂອງເອເຊຍຕາເວັນອອກສຽງໃຕ້ ແລະເຮັດໃຫ້ຕະຫຼາດຮຂອງຕົນ ໄດ້ຮັບຄວາມຫຍຸ້ງຍາກ.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG