​ນາງ ອອກແບບ ສຸຕິມານົນ ຄວ້າລາງວັນດາລານໍາຍິງເວທີ ເອມມີ ນາໆຊາດ

ດາລາຍິງຂອງໄທ ນາງ “ອອກແບບ” ຫຼື ສຸຕິມານົນ ຈິງຈະເລີນສຸກຫຍິ່ງ ສ້າງປະກົດ ການເປັນດາລາໄທຄົນທຳອິິດທີ່ໄດ້ຮັບລາງວັນນັກສະແດງນຳຍິງດີເດັ່ນໃນເວທີນາໆຊາດ ຂອງ ເອັມມີ ອາວອທ ທີ່ປະກາດຜົນໄປເມື່ອຄືນວັນຈັນທີ່ນະຄອນນິວຢອກ.

ລາງວັນນີ້ຂອງນາງ ອອກແບບ ມາຈາກການຮັບບົດຂອງ ອອຍ ຈາກຊີຣີໃນເນັດຟລິກ ເລື່ອງ Hunger ຫຼື ຄົນຫິວເກມກະຫາຍ ທີ່ສະທ້ອນເຖີງດ້ານມືດຂອງການກ້າວຂຶ້ນ ມາເປັນເຊຟ ແນວໜ້າ. ບົດຂອງລາວເລີ່ມຕົ້ນຈາກການຊ່ວຍທີ່ບ້ານ ຜັດອາຫານຕາມສັ່ງ ແລະຕໍ່ມາສາມາດສະແດງສີມືໃຫ້ກັບສຸດຍອດເຊຟທີ່ຕ້ອງການຄົນມາຊ່ວຍວຽກ.

ນາງ ອອຍ ທີ່ໃນທີ່ສຸດກ້າວຂຶ້ນມາເປັນເຊຟແຖວໜ້າ ຕ້ອງປະເຊີນກັບລາຄາທີ່ຕ້ອງຈ່າຍ ຈາກການມີສື່ສຽງລວມທັງການປ່ຽນໂຕເອງມາສູ່ສະຖານະແລະໜ້າທີ່ໃໝ່ທີ່ຕ່າງຈາກຈຸດເລີ່ມຕົ້ນຂອງລາວຢ່າງຂາດຂັ້ນ. ລາວໃຫ້ສຳພາດເປັນພາສາອັງກິດກັບອົງການຂ່າວ ເອພີ ໂດຍລະບຸວ່າ “ມັນມີຄວາມໝາຍສຳຄັນສຳລັບຂ້ອຍ” “ ທຸກຄົນເຮັດວຽກໜັກຫຼາຍໃນເລື່ອງ ນີ້ ແລະມັນອາດເສົ້າແດ່ເພາະພວກເຂົາບໍ່ສາມາດມາກັບຂ້ອຍໄດ້ໃນຄືນນີ້” ອອກແບບ ກ່າວ.

ງານປະກາດລາງວັນ International Emmy Awards ຄັ້ງນີ້ຈັດຂຶ້ນທີ່ໂຮງແຮມນິວຢອກ ຮີລຕັນມິດທາວ ໃນປີນີ້ມີຜູ້ໄດ້ຮັບການສະເໜີຊື່ຈາກທັງໝົດ 21 ປະເທດໃນປະເພດລາງ ວັນທັງໝົດ 14 ສາຂາ.

ທ້າວ ທິໂມທີ ສປອລ ໄດ້ຮັບລາງວັນນັກສະແດງຊາຍດີເດັ່ນໃນບົດ ປີເຕີ ຟາຣຄວາ ໃນຊີຣີ ອາຊະຍາກຳ “ The Sixth Commandment” ລາງວັນດຣາມາດີເດັ່ນ ຕົກເປັນຂອງຜົນງານສອງພາສາຝຣັ່ງປະສົມຢີ່ປຸ່ນເລື່ອງ ເລກຸສ ເດິ ດີເອີ ( Le Gouttes de dieu ) ຫຼື Drops of God ເຊິ່ງກ່ຽວກັບວາຍ ແລະ ວັດທະນາທຳອາຫານ.

ລາງວັນດີເດັ່ນສາຂາ ຊີຣິສ ຕະລົກຈາກປະ​ເທດ ອາເຈນຕີນາ ເລື່ອງ “ Division Palermo” ທີ່ເລົ່າເລື່ອງກຸ່ມຄົນເຮັດໜ້າທີ່ລາດຕາເວັນໃນຖານະພົນລະເມືອງ.

ເຖິງວ່າຄັ້ງນີ້ເປັນຄັ້ງທຳອິດທີ່ນາງ ອອກແບບ ສຸຕິມານົນ ໄດ້ຮັບລາງວັນໃຫຍ່ເວທີນາໆ ຊາດຂອງ ເອັມມີອາວອທ ກໍ​ຕາມ, ແຕ່ຊີຣີ ສະຫຼາດເກມໂກງ ທີ່ລາວຮັບບົດບາດນໍາ ເຄີຍໄດ້ຮັບຄວາມສົນໃຈຈາກ ຮໍລີວູດມາແລ້ວ.

ສື່ບັນເທີງ Variety ຂອງສະຫະລັດ ລາຍງານເມື່ອເດືອນມີນາປີຜ່ານມາວ່າ ຮູບເງົາດັງ ຈາກ ໄທ ສະຫຼາດເກມໂກງ ມີກຳນົດຈະຖືກສ້າງໃນແບບສະບັບຂອງຮໍລີວູດ ດ້ວຍສີມື ການກຳກັບຂອງ ເຈຊີ ລີ ທີ່ສ້າງຜົນງານໄວ້ຈາກການເປັນຜູ້ຂຽນຮູບເງົາ ລູສ.

ສະຫຼາດເກມໂກງ ຫຼື Bad Genius ຄືຮູບເງົາໄທທີ່ປະສົບຜົນສຳເລັດຢ່າງຫຼວງຫຼາຍເມື່ອ 7 ປີກອ່ນຈາກຄ່າຍ GDH 559 ແລະ ຜົນງານທີ່ກໍາລັງເກີດຂື້ນໃນແບບຮໍລີວູດ ຈະປັນ ການກຳກັບຮູບເງົາຄັ້ງທຳອິດຂອງ ເຈຊີ ລີ

ບໍລິສັດ Picturestart ແລະ Picture Perfect Federation ຈະເປັນຜູ້ຜະລິດ Bad Genius ພາສາອັງກິດໃນຄັ້ງນີ້. ດາລານຳປະກອບມີ ເບເນດິກ ວ່ອງ ເຊີ່ງດັງມາຈາກ ຮູບເງົາເລື່ອງ Doctor Strange in the Multiverse of Madness ພ້ອມດ້ວຍ ແຄລລີນາ ຫຼຽງ ຈາກ Tell Me Everything ແລະ ຈາບາຣີ ແບງສ໌ ທີ່ຝາກຜົນງານ ໄວ້ໃນເລື່ອງ Bel-Air.