ບໍລິສັດ Tesla ໄດ້ຜ່ານພ່າກົດລະບຽບທີ່ສຳຄັນບາງຢ່າງອັນເປັນອຸປະສັກ ຂັດຂວາງຕົນ ມາດົນນານຈາກການເປີດຕົວຊອບແວຂັບເຄື່ອນດ້ວຍຕົນເອງ ໃນປະເທດຈີນ, ເຊິ່ງໄດ້ເປີດທາງໄປສູ່ຜົນໄດ້ຮັບທີ່ດີ ຈາກການຢ້ຽມຢາມທີ່ບໍ່ໄດ້ແຈ້ງໃຫ້ຊາບລ່ວງໜ້າຂອງທ່ານ ອີລອນ ມັສ (Elon Musk) ໃນຕະຫຼາດທີ່ໃຫຍ່ເປັນອັນດັບສອງຂອງຜູ້ຜະລິດລົດສະຫະລັດ, ອີງຕາມອົງການຂ່າວ ຣອຍເຕີສ໌.
ຜູ້ບໍລິຫານໃຫຍ່ ຫຼື CEO ຂອງ Tesla, ທ່ານ ມັສ (Musk) ໄດ້ເດີນທາງໄປຮອດນະຄອນຫຼວງຂອງຈີນ ໃນວັນອາທິດວານນີ້ ບ່ອນທີ່ລາວ ຄາດວ່າຈະປຶກສາຫາລືກ່ຽວກັບການເປີດຕົວຊອບແວ Full Self-Driving ຫຼື FSD ແລະການອະນຸຍາດໃຫ້ໂອນຂໍ້ມູນການຂັບຂີ່ໄປຕ່າງປະເທດ, ອີງຕາມບຸກຄົນທີ່ມີຄວາມຮູ້ກ່ຽວກັບເລື່ອງນີ້.
ການຢ້ຽມຢາມ ຂອງມະຫາເສດຖີທ່ານນີ້, ເຊິ່ງລາວໄດ້ພົບກັບນາຍົກລັດຖະມົນຕີຈີນ ທ່ານ ລີ ຈຽງ (Li Qiang), ມີຂຶ້ນພຽງອາທິດດຽວ ຫຼັງຈາກທີ່ລາວໄດ້ຍົກເລີກແຜນການເດີນທາງໄປອິນເດຍເພື່ອພົບກັບນາຍົກລັດຖະມົນຕີ ນາເຣນດຣາ ໂມດີ (Narendra Modi), ໂດຍອ້າງເຖິງ "ພັນທະທີ່ໜັກໜ່ວງ ຂອງ Tesla."
ໃນວັນຈັນມື້ນີ້, ແຫຼ່ງຂ່າວສອງແຫ່ງຕ່າງຫາກ ບອກກັບ ອົງການຂ່າວ Reuters ວ່າ Tesla ໄດ້ບັນລຸຂໍ້ຕົກລົງກັບ Baidu ເພື່ອນໍາໃຊ້ໃບອະນຸຍາດສ້າງແຜນທີ່ຂອງບໍລິສັດຍັກໃຫຍ່ດ້ານເທັກໂນໂລຈີຂອງຈີນ ໃນການເກັບກໍາຂໍ້ມູນໃນຖະຫນົນຫົນທາງສາທາລະນະຂອງຈີນ, ເຊິ່ງພວກເຂົາອະທິບາຍວ່າ ເປັນບາດກ້າວສໍາຄັນສໍາລັບ Full Self-Driving ຫຼື FSD ທີ່ຈະນໍາສະເຫນີໃນປະເທດດັ່ງກ່າວ.
ແລະສະມາຄົມລົດຍົນລະດັບສູງຂອງຈີນກ່າວໃນວັນອາທິດວານນີ້ວ່າ ລົດລຸ້ນ 3 ແລະ Y ຂອງ Tesla ແມ່ນລົດລຸ້ນທີ່ໄດ້ຮັບການທົດສອບແລະພົບວ່າສອດຄ່ອງກັບຂໍ້ກຳນົດດ້ານຄວາມປອດໄພຂອງຂໍ້ມູນຈີນ.
ຄວາມປອດໄພຂອງຂໍ້ມູນ ແລະການປະຕິບັດຕາມຂໍ້ກຳນົດແມ່ນເຫດຜົນສຳຄັນທີ່ວ່າ ຍ້ອນຫຍັງຜູ້ຜະລິດລົດໄຟຟ້າຂອງສະຫະລັດ, ເຊິ່ງໄດ້ເປີດຕົວຊອບແວ Autopilot ລຸ້ນອັດຕະໂນມັດຫຼາຍທີ່ສຸດຂອງຕົນ ເມື່ອ 4 ປີກ່ອນ, ຫາກແຕ່ຍັງບໍ່ເປີດໃຫ້ລຸ້ນ FSD ວາງຈຳໜ່າຍໃນ ຈີນ ເທື່ອ, ເຊິ່ງເປັນຕະຫຼາດທີ່ໃຫຍ່ທີ່ສຸດອັນດັບສອງຂອງຕົນ ໃນທົ່ວໂລກ, ເຖິງແມ່ນວ່າ ຈະມີຄວາມຕ້ອງການຂອງລູກຄ້າ ກໍຕາມ.
ຟໍຣັມສະແດງຄວາມຄິດເຫັນ