ຊາວຣັດເຊຍຫລາຍໝື່ນຄົນ ໄດ້ປະກອບສ່ວນໃນການເດີນຂະບວນ ຢູ່ນະຄອນຫລວງ
ມອສໂຄ ເພື່ອປະທ້ວງການກັບຄືນມາຄອງຕໍາແໜ່ງປະທານາທິບໍດີຮັດເຊຍອີກຄັ້ງນຶ່ງ
ຂອງທ່ານ Vladimir Putin ເຖິງແມ່ນວ່າເຈົ້າໜ້າທີ່ໄດ້ບັງຄັບ ໃຫ້ຜູ້ນໍາພາການປະທ້ວງ
ຫລາຍຄົນ ໄປປາກົດຕົວເພື່ອສອບປາກຄໍາ ໃນຂະນະທີ່ການປະທ້ວງກໍາລັງຈະເລີ້ມ
ຂຶ້ນ ກໍຕາມ.
ການເດີນຂະບວນໃນວັນອັງຄານມື້ນີ້ ແມ່ນເປັນຄັ້ງທໍາອິດທີ່ຝ່າຍຄ້ານໄດ້ຮຽກໃຫ້ມີຂຶ້ນ
ນັບຕັ້ງແຕ່ທ່ານ Putin ໄດ້ກັບຄືນມາເປັນປະທານາທິບໍດີອີກ ໃນວັນທີ 7ເດືອນແລ້ວນີ້
ແລະໄດ້ເລີ້ມທໍາການປາບປາມພວກທີ່ຄັດຄ້ານ ຢ່າງເຄ່ງຄັດຂຶ້ນ. ຜູ້ສື່ຂ່າວຂອງວີໂອເອ
ທີ່ຢູ່ໃນທີ່ໂຮມຊຸມນຸມປະທ້ວງ ກ່າວວ່າ ປະຊາຊົນຫລາຍ ໝື່ນຄົນໄດ້ພາກັນເດີນຂະບວນ
ໄປຕາມຖະໜົນໃຫຍ່ສາຍນຶ່ງໃນມອສໂຄ ມຸ້ງໜ້າ ໄປສູ່ຖະໜົນ Sakharov.
ຜູ້ນໍາພາການປະທ້ວງ ທ່ານ Sergei Udaltsov ໃຫ້ໂຕເລກວ່າ ມີເຖິງ 1 ແສນຄົນ ຂະນະທີ່
ທາງຝ່າຍຕໍາຫລວດເວົ້າວ່າ ມີປະມານ 18,000 ຄົນ ທີ່ພາກັນເດີນຂະບວນ ໃນເວລາບ່າຍ
2 ໂມງມື້ນີ້ ຕາມເວລາທ້ອງຖິ່ນ.
ຜູ້ສື່ຂ່າວວີໂອເອເວົ້າວ່າ ການເດີນຂະບວນດໍາເນີນໄປຢ່າງສະງົບແລະມີຫລາຍໆກຸ່ມຕ່າງ
ກັນ ມາຮ່ວມປະກອບສ່ວນ ນັບຕັ້ງແຕ່ພວກຫົວຊາດນິຍົມ ໄປຫາພວກຄອມມິວນິສຕ໌ ແລະ
ພວກຫົວເສລີນິຍົມ. ມີຕໍາຫລວດຫລາຍພັນຄົນຍາມຮັກສາການຢູ່ເປັນໄລຍະໆ ເພື່ອຄວບ
ຄຸມການປະທ້ວງ ຊຶ່ງທາງການໄດ້ອະນຸຍາດໃຫ້ຈັດຂຶ້ນນັ້ນ.