ພວກເຈົ້າໜ້າທີ່ຕັນຊາເນຍກ່າວວ່າ ມີຜູ້ໂດຍສານຢ່າງໜ້ອຍຈົມນໍ້າຕາຍ 192 ຄົນ ເວລາ ເຮືອບັ໋ກທີ່ບັນທຸກຄົນໂດຍສານແໜ້ນເກີນໄປ ຫລົ້ມລົງ ເມື່ອວັນເສົາວານນີ້ ຢູ່ໃກ້ເກາະ Zanzibar ນອກຝັ່ງຕັນຊາເນຍນັ້ນ.
ລາຍງານຫລາຍກະແສຈາກເກາະ Zanzibar ເວົ້າວ່າ ເຮືອບັ໋ກ MV Spice Islander ແມ່ນບັນທຸກເກີນກໍາໜົດ ຫລາຍກ່ວາທີ່ໄດ້ຄິດໄວ້ກ່ອນ ໜ້ານັ້ນອີກ ຄືມີຜູ້ໂດຍສານປະມານ 800 ຄົນ. ຜູ້ໂດຍສານທີ່ລອດມາໄດ້ ບາງຄົນກ່າວວ່າ ເຮືອບັ໋ກລໍາດັ່ງກ່າວເລິ່ມງ່ຽງທັນທີ ຫລັງຈາກແລ່ນອອກ ຈາກທ່າໄປ.
ຕໍາຫລວດເກາະ Zanzibar ກ່າວວ່າ ມີຜູ້ໂດຍສານທີ່ຮູ້ວ່າລອດຊີວິດພຽງ ປະມານ 600 ກວ່າຄົນ ຈາກໄພພິບັດດັ່ງກ່າວ. ຜູ້ໂດຍສານຈໍານວນນຶ່ງ ບາດເຈັບສາຫັດ.
ຝູງຊົນຈໍານວນຫລວງຫລາຍໄດ້ເຕົ້າໂຮມກັນຢູ່ບ່ອນທີ່ທາງການນໍາສົບມາໄວ້ນັ້ນ ໂດຍຫວັງ ວ່າຈະໄດ້ຍິນຂ່າວກ່ຽວກັບໝູ່ເພື່ອນຫລືຍາດພີ່ນ້ອງທີ່ຢູ່ ເທິງເຮືອລໍາດັ່ງກ່າວ ເວລາເກີດເຫດ.
ເຮືອບັ໋ກໄດ້ຈົມນໍ້າໃນຕອນເຊົ້າຂອງວັນເສົາວານນີ້ ໃນລະຫວ່າງການເດີນທາງອ້ອມເກາະ ສາມເກາະ ທີ່ປະກອບເປັນໝູ່ເກາະ Zanzibar ຂອງຕັນຊາເນຍນັ້ນ.
ພວກໜ່ວຍກູ້ໄພແລະກໍ່າປັ່ນທີ່ປະຈໍາຢູ່ໃນຂົງດັ່ງກ່າວ ຍັງສືບຕໍ່ທໍາການຊອກຫາຢູ່ໃນບໍລິເວນ ທີ່ເຮືອບັ໋ກຈົມນໍ້ານັ້ນ.
