ຜູ້ນຳຄົນໃໝ່ຂອງກຸ່ມທາລີບານ ນາຍ Mullah Akhtar Mansoor
ຊຸກຍູ້ບັນດາສະມາຊິກຂອງຕົນ ໃຫ້ສາມັກຄີກັນ ແລະ ຕໍ່ສູ້ຕໍ່ໄປ
ເພື່ອຫັນປ່ຽນອັຟການິສຖານໃຫ້ກາຍເປັນ ລັດອິສລາມລ້ວນ.
ນາຍ Mansoor ກ່າວຖະແຫລງຂໍ້ຄວາມ ໃນສຽງບັນທຶກທີ່ໄດ້
ເປີດເຜີຍ ໂດຍກຸ່ມທາລີບານເມື່ອວັນເສົາວານນີ້ ວ່າ “ພວກເຮົາ
ຄວນຮັກສາຄວາມສາມັກຄີກັນໄວ້ ພວກເຮົາຕ້ອງເຕົ້າໂຮມ
ເຂົ້າກັນ. ສັດຕູຂອງພວກເຮົາ ຈະດີອົກອີໃຈ ຄັນພວກເຮົາ
ແຕກແຍກກັນ. ເປົ້າໝາຍຂອງພວກເຮົາ ແລະ ຄຳຂວັນ
ແມ່ນເພື່ອສ້າງຕັ້ງກົດໝາຍ ອິສລາມ ແລະ ລະບົບອິສລາມ ແລະ ການຕໍ່ສູ້ສັກສິດຂອງພວກເຮົາ ຈະສືບຕໍ່ໄປ ຈົນກວ່າສິ່ງດັ່ງກ່າວນັ້ນ ສຳເລັດ.”
ນາຍ Mansoor ບໍ່ກ່າວຢ່າງຈະແຈ້ງວ່າ ຕົນສະໜັບສະໜູນ ການເຈລະຈາສັນຕິພາບ
ກັບອັຟການິສຖານຫຼືບໍ່ ໃນການແນໃສ່ເພື່ອຍຸດຕິ ຄວາມຮຸນແຮງທີ່ຍາວນານມາເປັນ
ເວລາ 14 ປີນັ້ນ. ຜູ້ກ່ຽວກ່າວວ່າ ທຸກໆການຕັດສິນໃຈ ຕ້ອງອີງຕາມພື້ນຖານຂອງ
ກົດໝາຍອິສລາມຢ່າງເຄັ່ງຄັດ ລວມທັງ ການເລືອກທີ່ຈະຕໍ່ສູ້ຕໍ່ໄປ ຫຼື ຈະເຂົ້າຮ່ວມເຈລະຈາ.
ນາຍ Mansoor ໄດ້ເປັນຜູ້ນຳແທນ ນາຍ Mullah Mohammed Omar ຜູ້ກໍ່ຕັ້ງກຸ່ມ
ທາລີບານ. ກຸ່ມດັ່ງກ່າວ ໄດ້ຢັ້ງຢືນວ່າ ຜູ້ນຳຕາດຽວທີ່ຮູ້ຈັກກັນດີ ແມ່ນເສຍຊີວິດແລ້ວ
ແຕ່ບໍ່ໄດ້ກ່າວວ່າ ຜູ້ກ່ຽວເສຍຊີວິດ ເວລາໃດ.
ສະມາຊິກທາລີບານບາງຄົນ ກ່າວວ່າ ພັກພວກຂອງນາຍ Mansoor ໃນປາກິສຖານ
ໄດ້ເລືອກເອົາລາວ ໃຫ້ເປັນຜູ້ດຳລົງຕຳແໜ່ງຕໍ່ຈາກນາຍ Mullah Omar ປາດສະຈາກ
ການປຶກສາຫາລືກັບບັນດາຜູ້ບັງຄັບບັນຊາທັງໝົດ.
ນາຍ Mansoor ອ້າງວ່າ Mullah Omar ມອບໝາຍຄວາມຮັບຜິດຊອບໃນການນຳພາ
ທັງໝົດໃຫ້ກັບຕົນ ໃນຂະນະທີ່ ນາຍ Mullah Omar ຍັງມີຊີວິດຢູ່ນັ້ນ ແລະ ລາວພຽງແຕ່
ສືບຕໍ່ພາລະກິດ ພາຍໃຕ້ການບັນຊາຂອງນາຍ Mullah Omar ເທົ່ານັ້ນ.
