ເຈົ້າໜ້າທີ່ ອັຟການິສຖານ ກ່າວວ່າ ເຮືອບິນເຮລິຄັອບເຕີລຳໜຶ່ງໄດ້ປະສົບອຸບັດເຫດຕົກ ໃນພາກໃຕ້ຂອງປະເທດ ເຮັດໃຫ້ຢ່າງໜ້ອຍ 17 ຄົນເສຍຊີວິດ.
ເຮືອບິນເຮລິຄັອບເຕີ M-17 ທີ່ເຮັດໂດຍຣັດເຊຍ ໄດ້ຕົກໃນວັນພະຫັດມື້ນີ້ ໃນເຂດເມືອງ Shinkay ແຂວງຊາບູລ, ອີງຕາມເຈົ້າໜ້າທີ່ໃນທ້ອງຖິ່ນ.
ກະຊວງປ້ອງກັນປະເທດອັຟການິສຖານກ່າວວ່າ ບັນຫາທາງ ດ້ານເທັກນິກ ຄືສາເຫດທີ່ພາ ໃຫ້ເຮືອບິນຕົກ. ສ່ວນເຈົ້າໜ້າທີ່ ຄົນອື່ນໆຍັງກ່າວຢ້ຳວ່າ ອຸບັດເຫດດັ່ງກ່າວຍັງຢູ່ພາຍໃຕ້ ການ ສືບສວນສອບສວນຢູ່.
ກຸ່ມຕາລີບານໄດ້ອ້າງເອົາຄວາມຮັບຜິດຊອບ ແຕ່ການອ້າງຂອງພວກ ເຂົາຍັງເປັນຄຳຖາມ ຢູ່ໃນເມື່ອວ່າ ມັນບໍ່ຄ່ອຍຈະມີ ທີ່ພວກກະບົດສາ ມາດຍິງເຮືອບິນທະຫານໄດ້.
ບໍ່ເທົ່າໃດຊົ່ວໂມງກ່ອນໜ້ານີ້ ການໂຈມຕີສະຫຼະຊີບດ້ວຍລົດບັນທຸກລະ ເບີດ ຢູ່ທາງພາກໃຕ້ຂອງນະຄອນຫຼວງ ກາບູລ ເຮັດໃຫ້ຢ່າງໜ້ອຍ 6 ຄົນເສຍຊີວິດ, ເຊິ່ງນັບວ່າເປັນການໂຈມຕີທີ່ສຳຄັນຄັ້ງທຳອິດ ຂອງພວກຫົວຮຸນແຮງ ຕາລິບານ ນັບແຕ່ການເສຍຊີວິດຂອງ Mullah Mohammed Omar ຜູ້ນຳດົນນານຂອງພວກເຂົາໄດ້ຮັບຢືນຢັນ.
ມີຕຳຫຼວດຢ່າງໜ້ອຍ 3 ຄົນ ແລະ ປະຊາຊົນອີກ 3 ຄົນໄດ້ເສຍຊີວິດໃນເຫດລະເບີດຂະໜາດ ໃຫຍ່ໃນຕອນເຊົ້າຂອງວັນພະຫັດມື້ນີ້ ຢູ່ທີ່ ເມືອງຫຼວງ ປູລີ ອາລາມ ຂອງແຂວງ ໂລກາ, ອີງຕາມເຈົ້າໜ້າທີ່ຂອງລັດຖະບານທ້ອງຖິ່ນ. ພ້ອມກັນນັ້ນກໍຍັງມີອີກຫຼາຍສິບຄົນໄດ້ຮັບບາດເຈັບ.
ພວກຫົວຮຸນແຮງ ຕາລິບານ ໄດ້ອອກຖະແຫຼງການສະບັບໜຶ່ງອ້າງເອົາ ຄວາມຮັບຜິດຊອບໃນການໂຈມຕີນີ້.
ການແຕກແຍກພາຍໃນກຸ່ມຫົວຮຸນແຮງໄດ້ເພີ່ມທະວີຂຶ້ນຫຼັງຈາກມີການ ເປີດເຜີຍໃນອາທິດ ແລ້ວນີ້ວ່າ ຜູ້ກໍ່ຕັ້ງຂອງພວກເຂົາ, Mullar Omar, ໄດ້ເສຍຊີວິດຫຼາຍປີຜ່ານມາແລ້ວ. ການ ຕາຍຂອງລາວໄດ້ຖືເປັນຂ່າວລືມາເປັນເວລາດົນນານ, ແຕ່ມາຈົນຮອດປະຈຸບັນ ກໍຍັງບໍ່ທັນໄດ້ຮັບການຢືນຢັນ ທັງຈາກອຳນາດການປົກຄອງຂອງອັຟການິສຖານ ແລະ ພວກຕາລີບານ.
