ລິ້ງ ສຳຫລັບເຂົ້າຫາ

logo-print

ກຸ່ມ​ຕາ​ລີ​ບານ: ຂໍ້​ຕົກ​ລົງ ​ສັນ​ຕິ​ພາບ ກັບ ສະ​ຫະ​ລັດ ຈະ​ສຳ​ເລັດ​ ໃນ​ທ້າຍ​ເດືອນ ​ກຸມ​ພາ


ຫົ​ວ​ໜ້າ​ດ້ານກ​ການ​ເມືອງ​ຂອງ​ກຸ່ມ ຕາ​ລີ​ບານ, ທ່ານ ເຊີ ໂມ​ຮຳ​ມັດ ອັບ​ບາ​ສ ສ​ຕາ​ນິກ​ໄຊ, ແຖວ​ໜ້າ​ທີ​ສອງ​ຈາກ​ຊ້າຍ, ທ່ານ ອັບ​ດຸ​ລ ຊາ​ລາມ ຮາ​ນາ​ຟີ ແລະ ເຈົ້າ​ໜ້າ​ທີ່ຄົນ​ອື່ນໆ​ສູດ​ມົນໃນ​ລະ​ຫວ່າງ​ການ​ເຈ​ລະລ​ະ​ຫວ່າງ ອັ​ຟ​ກາ​ນິ​ສ​ຖານ. ນະ​ຄອນຫຼວງ ມົ​ສ​ກູ, ຣັດ​ເຊຍ. 6 ກ​ຸມ​ພາ, 2019.

ກຸ່ມ​ຕາ​ລີ​ບານ​ປ​າ​ກົດ​ວ່າ​ມີ​ຄວາມ​ໝັ້ນ​ໃຈ​ຂຶ້ນ​ໃນ​ວັນ​ຈັນ​ມື້​ນີ້ ທີ່ເຂົາ​ເຈົ້າ​ຈະ​ເຊັນ​ຂໍ້​ຕົກ​ລົງ​ສັນ​ຕິ​ພາບ​ກັບ ສະ​ຫະ​ລັດ ໃນ​ທ້າຍ​ເດືອນນີ້ ດ້ວຍ​ການ​ເຂົ້າ​ຮ່ວມ​ຂອງ​ບັນ​ດາ​ຜູ້​ຄ້ຳ​ປະ​ກັນ​ສາ​ກົນ ເພື່ອ​ປິດ​ສົງ​ຄາມ​ດົນ 18 ປີ​ໃນ ອັ​ຟ​ກາ​ນິ​ສ​ຖານ ນັ້ນ.

ຜູ້​ນຳ​ອາ​ວຸ​ໂສ​ຄົນ​ນຶ່ງ​ຂອງ​ກຸ່ມ​ກະ​ບົດ​ ໄດ້​ກ່າວ​ຕໍ່​ອົງ​ການ​ຂ່າວ​ທີ່​ສະ​ໜັບ​ສະ​ໜູນ​ກຸ່ມ​ຕາ​ລີ​ບານ​ວ່າ ຄູ່​ປໍ​ລະ​ປັກ​ດັ່ງ​ກ່າວ​ໄດ້​ຕັດ​ສິນ​ນຳ​ກັນ ​ທີ່​ຈະ​ຈັດ​ພິ​ທີ​ເຊັນ​ສັນ​ຍາ​ໃນ​ນະ​ຄອນຫຼວງ ໂດ​ຮາ ປະ​ເທດ ກາ​ຕ້າ, ເຊິ່ງ​ໄດ້​ເປັນ​ສະ​ຖານ​ທີ່​ຈັດ​ການ​ເຈ​ລະ​ຈາ​ດົນ 18 ເດືອນ​ລະ​ຫວ່າງ ສະ​ຫະ​ລັດ ກັບ ກຸ່ມ​ຕາ​ລີ​ບານ.

ທ່ານ ອັບ​ດຸ​ລ ຊາ​ລຳ ຮາ​ນາ​ຟີ, ສະ​ມາ​ຊິກ​ຄົນ​ກາງ​ຂອງ​ກຸ່ມ​ເຈ​ລະ​ຈາ ຕາ​ລີ​ບານ ແລະ ຫ້ອງ​ການ​ດ້ານ​ການ​ເມືອງ​ຂອ​ງ​ພວກ​ເຂົາ​ໃນ​ນະ​ຄອນຫຼວງ ໂດ​ຮາ, ບໍ່​ໄດ້​ບອກວັນ​ທີ, ແຕ່​ແຫຼ່ງ​ຂ່າວ​ຂອງ​ກຸ່ມ​ກະ​ບົດ​ນັ້ນ​ໄດ້​ກ່າວ​ກ່ອນ​ໜ້ານີ້​ວ່າ ຂໍ້​ຕົກ​ລົງ​ດັ່ງ​ກ່າວ​ຈະ​ຖືກ​ລົງ​ນາມ​ໃນ​ວັນ​ທີ 29 ກຸມ​ພານີ້.

ທ່ານ ຮາ​ນາ​ຟີ ໄດ້​ກ່າວ​ວ່າ ບັນ​ດາ​ຕົວ​ແທນ​ຈາກ​ທຸກ​ປະ​ເທດ​ຂອງ ອັ​ຟ​ກາ​ນິ​ສ​ຖານ, ສະ​ພາ​ຄວາມ​ໝັ້ນ​ຄົງ ສະ​ຫະ​ປະ​ຊາ​ຊາດ, ບັນ​ດາ​ປະ​ເທດ ອິ​ສ​ລາມ ແລະ ສະ​ຫະ​ພາບ ຢູ​ໂຣບ ຈະ​ລວມ​ຢູ່​ໃນ​ຜູ້​ທີ່​ຖືກ​ເຊື້ອ​ເຊີນ​ໄປ​ເປັນ​ສັກ​ຂີ​ພິ​ຍານ​ໃນ​ພິ​ທີ​ເຊັນ​ສັນ​ຍາ​ນັ້ນ.

ທ່ານ​ໄດ້​ກ່າວ​ຕື່ມ​ວ່າ, ບໍ່​ດົນຫຼັງ​ຈາກ​ຂໍ້​ຕົກ​ລົງ​ໄດ້​ຖືກ​ເຊັນ​ນັ້ນ, ລັດ​ຖະ​ບານ ອາ​ເມ​ຣິ​ກາ ແລະ ອັ​ຟ​ກາ​ນິ​ສ​ຖານ ກໍ​ຈະ​ປ່ອຍ​ນັກ​ໂທດ 5,000 ຄົນ, ແລະ ກຸ່ມ​ຕາ​ລີ​ບານ ກໍ​ຈະ​ປ່ອຍ​ຜູ້​ຖື​ກ​ກັກ​ຂັງ​ປະ​ມານ 1,000 ຄົນ​. ແນວ​ໃດ​ກໍ​ຕາມ, ລັດ​ຖະ​ບານ ວໍ​ຊິງ​ຕັນ ໄດ້​ກ່າວ​ຢ້ຳ​ວ່າ ເຂົາ​ເຈົ້າ​ຈະ​ເຮັດ​ຂໍ້​ຕົກ​ລົງ​ກັບ​ກຸ່ມ​ຕາ​ລີ​ບານ ຖ້າ​ຕົກ​ລົງ​ຫຼຸດ​ຜ່ອນຄວາມ​ຮຸນ​ແຮງ​ໃນ​ສັນ​ຍາ​ສະ​ຫງົບ​ເສິກ 7 ວັນ ໄດ້​ຖືກ​ປະ​ຕິ​ບັດ​ຢ່າງ​ປະ​ສົບ​ຄວາມ​ສຳ​ເລັດໃນ ອັ​ຟ​ກາ​ນິ​ສ​ຖານ ເທົ່າ​ນັ້ນ.

ບັນ​ດາ​ເຈົ້າ​ໜ້າ​ທີ່ ສະ​ຫະ​ລັດ ເວົ້າ​ວ່າ ສັນ​ຍາ​ສະ​ຫງົບ​ເສິກ​ຊົ່ວ​ຄາວ ທີ່​ໄດ້​ບັນ​ລຸ​ໃນ​ອາ​ທິດ​ທີ່​ຜ່ານ​ມາ ຈະ​ມີ​ຜົນ​ບັງ​ຄັບ​ໃຊ້​ໃນ​ໄວໆ​ນີ້ ແຕ່​ເຂົາ​ເຈົ້າ​ບໍ່​ໄດ້​ກ່າວ​ເຖິງວັນ​ທີ​ໃດໆ, ເຖິງ​ແມ່ນ​ວ່າ​ແຫຼ່ງ​ຂ່າວ​ຂອງ​ກຸ່ມ​ກະ​ບົດ​ໄດ້​ອ້າງວ່າ ມັນ​ຈະ​ມີ​ຜົນ​ບັງ​ຄັບ​ໃຊ້​ໃນ​ວັນ​ທີ 22 ກຸມ​ພາ​ກໍ​ຕາມ.

ສັນ​ຍາ​ດັ່ງ​ກ່າວ​ຈະ​ເຮັດ​ໃຫ້​ຝ່າຍ​ທີ່​ເຮັດ​ສົງ​ຄາມ​ນຳ​ກັນ ​ຢຸດ​ການ​ປະ​ຕິ​ບັດ​ການ​ໂຈມ​ຕີ​ເປັນ​ເວ​ລາ 7 ວັນ. ຖ້າ​ທັງ​ສອງ​ຝ່າຍ​ຮັກ​ສາ​ຄຳ​ສັນ​ຍາ​ຂອງ​ເຂົາ​ເຈົ້າ​ໄດ້, ເຂົາ​ເຈົ້າ​ຈະ​ກັບ​ໄປ​ໂຕະ​ເຈ​ລະ​ຈາ​ເພື່ອ​ເຊັນ​ຂໍ້​ຕົກລົງ​ສັນ​ຕິ​ພາບ. ກຸ່ມ​ຕາ​ລີ​ບານ ກັບ​ບັນ​ດາ​ນັກ​ເຈ​ລະ​ຈາ ສະ​ຫະ​ລັດ ໄດ້​ທຳ​ການ​ສະຫຼຸບຂໍ້​ຕົກ​ລົງ​ໃນ​ກອງ​ປະ​ຊຸມ​ທີ່​ໃຊ້​ເວ​ລາ​ດົນ​ນານ​ໃນ​ປີ​ທີ່​ຜ່ານ​ມາ.

ຜູ້​ບໍ​ລິ​ຫານ​ໃຫຍ່​ຂອງ​ລັດ​ຖະ​ບານ​ສາ​ມັກ​ຄີ ອັ​ຟ​ກາ​ນິ​ສ​ຖານ ທ່ານ ອັບ​ດຸ​ລ​ລາ ອັບ​ດຸ​ລ​ລາ ​ກໍ​ໄດ້​ກ່າວ​ຕໍ່​ສະ​ພາ​ລັດ​ຖະ​ມົນ​ຕີ​ໃນ​ນະ​ຄອນຫຼວງ ກາ​ບູ​ລ ໃນ​ວັນ​ຈັນ​ມື້ນີ້​ວ່າ ຂໍ້​ຕົກ​ລົງ​ສັນ​ຕິ​ພາບລະ​ຫວ່າງ ສະ​ຫະ​ລັດ ກັບ ກຸ່ມ​ຕາ​ລີ​ບານ ແມ່ນ​ໄດ້ “ຖືກ​ສະຫຼຸບ​ແລ້ວ.” ທ່ານ​ໄດ້​ກ່າວ​ວ່າ “ການ​ເຊັນ​ຂໍ້​ຕົກ​ລົງ​ດັ່ງ​ກ່າວ​ແມ່ນ​ອີງໃສ່​ການ​ຫຼຸດ​ຜ່ອນ​ຄວາມ​ຮຸນ​ແຮງໃນ 7 ວັນ, ແລ້ວ​ເຂົາ​ເຈົ້າ​ຈຶ່ງ​ຈະ​ສືບ​ຕໍ່​ຂະ​ບວນ​ການ​ສັນ​ຕິ​ພາບ​ນັ້ນ.”

ຂໍ້​ຕົກ​ລົງ​ດັ່ງ​ກ່ວ​ໄດ້​ສະ​ໜອງ​ຕາ​ຕະ​ລາງ​ສຳ​ລັບ​ການ​ຖອນ​ກຳ​ລັງ ອາ​ເມ​ຣິ​ກັນ ແລະ ພັນ​ທະ​ມິດ​ອອກ​ຈາກ ອັ​ຟ​ກາ​ນິ​ສ​ຖານ, ຮັບ​ປະ​ກັນ​ການ​ປາບ​ປາມ​ການ​ກໍ່​ການ​ຮ້າຍ​ຂອງ​ກຸ່ມ​ກະ​ບົດ ແລະ ຂັ້ນ​ຕອນ​ສຳ​ລັບ​ການ​ປອງດອງ​ທາງ​ດ້ານ​ການ​ເມືອງ ລະ​ຫວ່າງ ຝ່າຍ​ຕ່າງໆ​ໃນ​ ອັ​ຟ​ກາ​ນິ​ສ​ຖານ ທີ່​ມີ​ສ່ວນ​ຮ່ວມ​ໃນ​ຄວາມ​ຂັດ​ແຍ້ງ​ນັ້ນ.

ອ່ານ​ຂ່າວນີ້​ເປັນ​ພາ​ສາ​ອັງ​ກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG