ລິ້ງ ສຳຫລັບເຂົ້າຫາ

ວັນຈັນ, ໒໔ ມິຖຸນາ ໒໐໒໔

ກຸ່ມຕາລີບານ ກ່າວຍົກຍ້ອງ ການເຈລະຈາກັບສະຫະລັດ ວ່າ ເຖິງເວລາ ສຳລັບ ‘ບາດ​ກ້າວ​ໂຕ​ຈິງ’ ເພື່ອແກ້ໄຂບັນຫາຕ່າງໆ


ລັດຖະມົນຕີກະຊວງການຕ່າງປະເທດຂອງກຸ່ມຕາລີບານ, ທ່ານອາເມຍ ຄານ ມຸຕຕາກີ (Amir Khan Muttaqi) ກ່າວຖະແຫລງ ຕໍ່ສື່ມວນຊົນ ໃນນະຄອນຫຼວງກາບູລ ຂອງອັຟການິສຖານ, ວັນທີ 14 ກັນຍາ 2021.
ລັດຖະມົນຕີກະຊວງການຕ່າງປະເທດຂອງກຸ່ມຕາລີບານ, ທ່ານອາເມຍ ຄານ ມຸຕຕາກີ (Amir Khan Muttaqi) ກ່າວຖະແຫລງ ຕໍ່ສື່ມວນຊົນ ໃນນະຄອນຫຼວງກາບູລ ຂອງອັຟການິສຖານ, ວັນທີ 14 ກັນຍາ 2021.

ກຸ່ມ​ຕາ​ລີ​ບານ​ທີ່​ປົກ​ຄອງ​ອັ​ຟ​ກາ​ນິ​ສ​ຖານ​ໃນ​ເວ​ລານີ້ ຮຽກ​ຮ້ອງ​ໃຫ້​ສະ​ຫະ​ລັດ​ເອົາ “ບາດ​ກ້າວ​ໂຕ​ຈິງ” ໄປ​ສູ່​ການ​ແກ້​ໄຂ​ບັນ​ຫາ​ຕ່າງໆ​ທີ່​ຍັງ​ຄ້າງ​ຄາ ໃນ​ຂະ​ນະ​ທີ່​ທັງ​ສອງ​ກະ​ກຽມ​ທີ່​ຈະ​ພົບ​ປະ​ກັນ​ຮອບ​ໃໝ່ ທີ່​ນະ​ຄອນ​ໂດ​ຮາ ໃນ​ອາ​ທິດ​ໜ້າ.

ສະ​ຫະ​ລັດກ່າວ​ໃນ​ວັນ​ອັງ​ຄານ​ຜ່ານ​ມານີ້​ວ່າ ທູດ​ພິ​ເສດ​ຮັບ​ຜິດ​ຊອບ​ເລື້ອງ​ອັ​ຟ​ການິ​ສ​ຖານ​ ທ່ານ​ໂທ​ມາ​ສ ແວັ​ສ​ຕ໌ ຈະ​ເປັນ​ຜູ້​ນຳ​ພາ​ຄະ​ນະ​ເຈົ້າ​ໜ້າ​ທີ່​ອາ​ເມ​ຣິ​ກັນ​ໃນການ​ປະ​ຊຸມ​ເປັນ​ເວ​ລາ 2 ມື້ ກັບ​ກຸ່ມ​ຕາ​ລີ​ບານ ທີ່​ນະ​ຄອນ​ຫຼວງ​ຂອງ​ກາ​ຕ້າ.

ເຈົ້າ​ໜ້າ​ທີ່​ອະ​ວຸ​ໂສ​ຂອງ​ກຸ່ມ​ຕາ​ລີ​ບານ ທ່ານ​ຊູ​ເຮ​ລ ຊາ​ຮີນ (Suhail Shaheen) ​ໄດ້​ກ່າວ​ຊົມ​ເຊີຍ​ວ່າ “ເປັນ​ບາດ​ກ້າວ​ທີ່​ດີ” ໃນ​ການ​ຕັດ​ສິນ​ໃຈ​ຂອງ​ສະ​ຫະ​ລັດ ທີ່​ຈະ​ເລີ້ມ​ການ​ປະ​ຊຸມ​ສອງ​ຝ່າຍ​ຄືນ​ໃໝ່.

​ທ່ານ​ຊີ​ຮີ​ນ ​ທີ່​ຖືກ​ແຕ່ງ​ຕັ້ງ​ໃຫ້​ເປັນ​ຜູ້​ຕາງ​ໜ້າ​ຖາ​ວອນ​ຂອງ​ກຸ່ມ​ຕ​າ​ລີ​ບານ​ປະ​ຈຳ​ອົງ​ການ​ສະ​ຫະ​ປະ​ຊາ​ຊາດ ກ່າວ​ຕໍ່​ວີ​ໂອ​ເອ​ວ່າ “ພວກ​ເຮົາ​ແມ່ນ​ເປີດກວ້າງ ​ທີ່​ຈະ​ແກ້​ໄຂບັນ​ຫາ​ທັງ​ໝົດ​ກັບ​ສະ​ຫະ​ລັດ ໂດຍ​ຜ່ານ​ການ​ເຈ​ລະ​ຈາແລະ​ເລີ້ມ​ຕົ້ນ​ຄວາມ​ສຳ​ພັນ​ໃນ​ທາງ​ທີ່ດີກັບ​ພວກ​ເຂົາ​ເຈົ້າ.”

ທ່ານ​ຊາ​ຮີນ​ກ່າ​ວ​ຕື່ມ​ວ່າ “ໝາກ​ບານ​ພວມ​ຢູ່​ໃນ​ເດີ່ນ​ຂອງ​ສະ​ຫະ​ລັດ. ມັນ​ແມ່ນ​ເວ​ລາ​ແລ້ວ ທີ່​ດຽວນີ້​ສະ​ຫະ​ລັດ​ຈະ​ຕ້ອງ​ໄດ້​ເອົາ​ບາດ​ກ້າວ​ໂຕ​ຈິງ ​ໄປ​ສູ່​ການ​ສ້າງ​ຕັ້ງ​ຄວາມ​ສຳ​ພັນ​ແບບ​ປົກ​ກະ​ຕິ ແລະ​ແກ້​ໄຂ​ບັນ​ຫາ​ຄ້າງ​ຄາ​ທັງໝົດ​ກັບ​ພວກ​ເຮົາ.”

ໂຄ​ສົກ​ກະ​ຊວງ​ການ​ຕ່າງ​ປະ​ເທດ​ສະ​ຫະ​ລັດ ທ່ານ​ເນດ​ ໄພ​ຣ​ສ໌ ກ່າວ​ຕໍ່​ພວກ​ນັກ​ຂ່າວ​ທີ່​ນະ​ຄອນ​ຫຼວງວໍ​ຊິງ​ຕັນ​ວ່າ ທູດ​ພິ​ເສດ​ແວັ​ສ​ຕ໌ຈະ​ຫາ​ລື​ກ່ຽວ​ກັບ​ບັນ​ຫາ​ຕ່າງໆ “ທີ່​ມີ​ຄວາມ​ສຳ​ຄັນ​ກ່ຽວ​ກັບ​ຜົນ​ປະ​ໂຫຍດ​ແຫ່ງ​ຊາດ” ກັບ​ຄູ່​ເຈ​ລະ​ຈາ​ຂອງ​ຝ່າຍ​ຕາລີ​ບານ.

ທ່າ​ນ​ເນດ ໄພ​ຣ​ສ໌ ກ່າວ​ວ່າ “ນັ້ນ​ແມ່ນ​ຮວມ​ທັງ​ການ​ຕໍ່​ຕ້ານ​ລັດ​ທິ​ກໍ່​ການ​ຮ້າຍ ຮວມ​ທັງການເດີນ​ທາງ​ຜ່ານ​ດ້ວຍ​ຄວາມ​ປອດ​ໄພ​ຂອງ​ປະ​ຊາ​ຊົນ​ຊາວ​ອາ​ເມ​ຣິກັນ ແລະ​ຊາວ​ອັ​ຟ​ກາ​ນິ​ສ​ຖານ ຜູ້​ທີ່​ມີ​ຄວາມ​ໝັ້ນ​ໝາຍ​ພິ​ເສດ ແລະ​ນັ້ນ​ຮວມທັງ​ການ​ຊ່ວຍ​ເຫຼືອ​ທາງ​ດ້ານ​ມະ​ນຸດ​ສະ​ທຳ ແລະ​ສະ​ຖາ​ນະ​ການ​ດ້ານ​ເສດ​ຖະກິດ​ຂອງ​ປະ​ເທດ.

ການ​ເຈ​ລະ​ຈາ​ລະ​ຫວ່າງ​ສະ​ຫະລັດ ແລະ​ກຸ່ມ​ຕາ​ລີ​ບານ ມີ​ຂຶ້ນ​ທ່າມ​ກາງວິ​ກິດການ​ທາງ​ດ້ານ​ມະ​ນຸດ​ສະ​ທຳ​ທີ່​ພວມ​ທະ​ວີ​ຄວາມ​ຮ້າຍ​ແຮງ​ຂຶ້ື້ນ​ຢູ່​ໃນ​ອັ​ຟ​ກາ​ນິ​ສຖານ ບ່ອນ​ທີ່​ອົງ​ການ​ສະ​ຫະ​ປະ​ຊາ​ຊາດ​ກະ​ປະ​ມານ​ວ່າ ມີ​ເກືອບ 23 ລ້ານຄົນຫຼື 60 ເປີ​ເຊັນ​ຂອງ​ປະ​ຊາ​ຊົນ​ອັ​ຟ​ກາ​ນິ​ສ​ຖານພວມ​ປະ​ເຊີນ​ກັບ​ການ​ຂາດອາ​ຫານ​ຢ່າງ​ຮ້າຍ​ແຮງ.

ອ່ານຂ່າວນີ້ຕື່ມ ເປັນພາສາອັງກິດ

XS
SM
MD
LG