ພວກຕາລີບານ ຕໍ່ຕ້ານລັດຖະບານ ໄດ້ບຸກຖະລົ່ມຄຸກໃນພາກຕາເວັນອອກຂອງ ອັຟການິສຖານ ແລະ ໄດ້ປົດປ່ອຍນັກໂທດອອກໄປຫຼາຍຮ້ອຍຄົນ.
ທ່ານ Mohammad Ali Ahmadi ຮອງເຈົ້າແຂວງ Ghazni ກ່າວວ່າ ການໂຈມຕີທີ່ມີການວາງແຜນເປັນຢ່າງດີໄດ້ເລີ່ມຂຶ້ນດ້ວຍການລະເບີດລົດສະຫຼະຊີບ ທີ່ເຮັດໃຫ້ພວກກະບົດຄົນອື່ນໆສາມາດ ເຂົ້າໄປໃນຄຸກໄດ້.
ເຈົ້າໜ້າທີ່ ອັຟການິສຖານ ກ່າວວ່າ ຢູ່ໃນສູນຄຸມຂັງດັ່ງກ່າວມີນັກໂທດທັງໝົດ 436 ຄົນ, ເຊິ່ງ 355 ຄົນໄດ້ຫຼົບໜີອອກໄປໃນລະຫວ່າງການໂຈມຕີດັ່ງກ່າວ. ລັດຖະບານໄດ້ກ່າວວ່າ ຜູ້ຫຼົບໜີ 148 ຄົນ “ແມ່ນເປັນໄພຂົ່ມຂູ່ຕໍ່ຄວາມໝັ້ນຄົງຂອງປະເທດ.”
ຄຳຖະແຫຼງຂອງກະຊວງພາຍໃນ ອັຟການິຖານ ໃນນະຄອນຫຼວງ ກາບູລ ກ່າວວ່າເຈົ້າໜ້າທີ່ຮັກສາຄວາມປອດໄພ 7 ຄົນໄດ້ຖືກຂ້າຕາຍ ແລະ ອີກ 7 ຄົນໄດ້ຮັບບາດເຈັບ. ພວກເຂົາເຈົ້າກ່າວວ່າ ພວກຕໍ່ຕ້ານລັດຖະບານ 5 ຄົນກໍໄດ້ຖືກຂ້າຕາຍເຊັ່ນກັນ.
ໃນຖະແຫຼງການທີ່ໄດ້ຖືກສົ່ງໄປທາງ email ໃຫ້ບັນດານັກຂ່າວ, ໂຄສົກພວກ ຕາລີບານ Zabihullah Mujahid ໄດ້ອ້າງຄວາມຮັບຜິດຊອບສຳລັບການໂຈມຕີນັ້ນ, ແລະ ກ່າວຫາວ່າຄຸກດັ່ງກ່າວແມ່ນໄດ້ຖືກດຳເນີນການໂດຍອົງການສິ້ງຊອມ ອັຟການິສຖານ ແລະ ກ່າວວ່າ ພວກນັກໂທດ, ລວມທັງນັກຕໍ່ສູ້ ຕາລີບານ, ແມ່ນໄດ້ຖືກທໍລະມານຢ່າງຮ້າຍແຮງ. ໃນຄຳ
ຖະແຫຼງຄັ້ງທີສອງ, ພວກ ຕາລີບານ ອ້າງວ່າ ຜູ້ບັນຊາການອາວຸໂສ ແລະ ກຸ່ມຂອງບັນດາ
ນັກຕໍ່ສູ້ແມ່ນບັນດາຜູ້ທີ່ໄດ້ຖືກປ່ອຍອອກຈາກຄຸກໃນແຂວງ Ghazni.
ທ້າວ Mujahid ກ່າວວ່າ ສະມາຊິກທິມງານ ລະເບີດສະຫຼະຊີບ 10 ຄົນແມ່ນໄດ້ຖືກສົ່ງໄປປົດປ່ອຍພວກນັກໂທດ ແລະ 3 ຄົນໄດ້ເສຍຊີວິດໃນການປະຕິບັດການກ່ອນແຈ້ງ ເມື່ອຄົນອື່ນໆແມ່ນໄດ້ລອດຊິວິດກັບຄືນມາຢ່າງປອດໄພ. ລາວໄດ້ກ່າວວ່າ ນັກໂທດຫຼາຍເຖິງ 400 ຄົນໄດ້ຖືກປ່ອຍເປັນອິດສະຫຼະ.
ພວກ ຕາລີບານ ໃນເມື່ອກ່ອນໄດ້ທຳການແຫກຄຸກທີ່ສຳຄັນໃນ ອັຟການິສຖານ. ໃນເດືອນ ເມສາ 2011, ພວກເຂົາໄດ້ດຳເນີນການໂຈມຕີໂດຍບໍ່ຢ້ານຕາຍໃນແຂວງ Kandahar ຢູ່ ທາງພາກໃຕ້ຂອງປະເທດ ເພື່ອປົດປ່ອຍນັກຕໍ່ສູ້ 500 ຄົນຈາກເຮືອນຈຳ Sarposa ເຊິ່ງເປັນ ເຮືອນຈຳທີ່ໃຫຍ່ທີ່ສຸດໃນປະເທດ. ພວກ ຕາລີບານ ໄດ້ຂຸດອຸມົງຢູ່ພື້ນດິນເປັນເວລາຫຼາຍ ເດືອນ ຍາວເກືອບໜຶ່ງກິໂລແມັດ ແລະ ກວ້າງ 91 ຊັງຕີແມັດໄປຍັງ ຫ້ອງຂັງໃນເຮືອນຈຳ Sarposa, ເຊິ່ງຖືກຈັດຫາໄຟຟ້າ ແລະ ທໍ່ອາກາດໃຫ້ໂດຍເຮືອນ ທີ່ຢູ່ໃກ້ຄຽງ.
ໃນການໂຈມຕີເຮືອນຈຳດຽວກັນກ່ອນໜ້ານັ້ນ, ກຸ່ມຂອງນັກຕໍ່ສູ້ ຕາລີບານ ພ້ອມດ້ວຍປືນກົນ ແລະ ປືນໝາກປີ ໄດ້ປົດປ່ອຍນັກໂທດ ຫຼາຍເຖິງ 1200 ຄົນໃນເດືອນ ມິຖຸນາ 2008.
