ເຈົ້າໜ້າທີ່ຂອງລັດຖະບານຕາລິບານ ໄດ້ປະກາດສັ່ງຫ້າມ ບໍ່ໃຫ້ອອກອາກາດ ລາຍການຂອງສຽງອາເມຣິກາ ຫຼື VOA ແລະຂອງວິທະຍຸຢູໂຣບເສລີແລະວິ ທະຍຸເສລີພາບ ຫຼື RFE/RL ໂດຍສະຖານີວິທະຍຸ FM ຢູ່ໃນປະເທດອັັຟການິສຖານ, ໂດຍອ້າງເຖິງຂໍ້ຮຽກຮ້ອງ ທີ່ພວກເຂົາເຈົ້າໄດ້ຮັບ ກ່ຽວກັບ ເນື້ອໄນຂອງການດໍາເນີນລາຍການ.
ການຫ້າມດັ່ງກ່າວ ແມ່ນມີຜົນບັງຄັບໃຊ້ພາຍໃນວັນທີ 1 ທັນວານີ້ເປັນຕົ້ນໄປ, ອີງຕາມຄໍາສັ່ງທີ່ໄດ້ວາງອອກມາ ໂດຍກະຊວງວັດທະນະທໍາ ແລະຂໍ້ມູນຂ່າວ ສານຂອງລັດຖະບານຕາລິບານ.
ໂຄສົກຂອງລັດຖະບານຕາລິບານຍັງບໍ່ໄດ້ໃຫ້ລາຍລະອຽດໃດໆ ກ່ຽວກັບການຕໍ່ວ່າ ທີ່ຖືກກ່າວຫາ ເຊິ່ງພວກເຂົາກ່າວວ່າໄດ້ຮັບກ່ຽວກັບລາຍການຂ່າວທີ່ໃຫ້ທຶນໂດຍສະຫະລັດ.
ມັນຍັງບໍ່ທັນແຈ່ມແຈ້ງເທື່ອວ່າ ການສັ່ງຫ້າມດັ່ງກ່າວນັ້ນຈະມີຜົນກະທົບຕໍ່ການອອກອາກາດຂອງວິທະຍຸສາກົນອື່ນໆ ທີ່ອອກອາກາດໃນລະບົບ FM ຄືກັນ ຢູ່ອັຟການິສຖານຫຼືບໍ່.
ນັບຕັ້ງແຕ່ເຂົ້າຢຶດອໍານາດໃນປີທີ່ຜ່ານມາ, ກຸ່ມຕາລິບານໄດ້ດໍາເນີນການອອກຂໍ້ກໍານົດຫຼາຍໆຢ່າງກ່ຽວກັບຂໍ້ຈໍາກັດຕໍ່ບັນດານັກຂ່າວ ແລະການອອກຂ່າວທາງສື່ສັງຄົມຕ່າງໆ ຢູ່ໃນອັຟການິສຖານ, ລວມທັງການກໍານົດໃຫ້ແມ່ຍິງທຸກຄົນ ຈະຕ້ອງໃສ່ຜ້າປົກໜ້ານໍາອີກດ້ວຍ.
ບັນດາກຸ່ມອິດສະຫຼະໃນການນໍາສະເໜີຂ່າວ ໄດ້ກ່າວຫາວ່າກຸ່ມຕາລິບານກໍາລັງຫ້າມການນໍາສະເໜີຂ່າວໃນທົ່ວປະເທດ, ກໍ່ກວນພວກນັກຂ່າວ ແລະບໍ່ຍອມຮັບສິດທິໃນການເຮັດວຽກ ຂອງບຸກຄະລາກອນດ້ານການຂ່າວທີ່ເປັນແມ່ຍິງ.
ວິທະຍຸ VOA ແລະ RFE/RL ແມ່ນອົງການຂ່າວທີ່ໄດ້ຮັບທຶນຈາກລັດຖະບານສະຫະລັດ ເຊິ່ງດໍາເນີນງານແບບເປັນອິດສະຫຼະໃນການອອກຂ່າວ ແລະມີເປົ້າໝາຍໃນການນໍາສະເໜີຂ່າວທີ່ກວມລວມ ແລະສົມດຸນບໍ່ເຂົ້າຂ້າງອອກຂາ.
ການບໍລິການໃນການອອກອາກາດຢູ່ໃນອັຟການິສຖານຂອງ VOA ເປັນເວລາ 12 ຊົ່ວໂມງຕໍ່ມື້ໂດຍທາງວິທະຍຸ FM15 ແລະ ວິທະຍຸຄື້ນກາງ (MW) ສອງສະຖານີ, ໂດຍແບ່ງການອອກອາກາດເປັນສອງພາສາລະຫວ່າງພາສາພາສໂຕ (Pashto) ແລະ ພາສາດາຣີ (Dari).
