ເຈົ້າໜ້າທີ່ອັຟການິສຖານ ກ່າວວ່າ ການໂຈມຕີຂອງກຸ່ມຕາລິບັນ
ຕໍ່ບໍລິເວນຕຶກໂຮງການ ແຫ່ງນຶ່ງຂອງລັດຖະບານ ໃນພາກຕາເວັນ
ອອກຂອງປະເທດ ໄດ້ສັງຫານ ຢ່າງນ້ອຍ 12 ຄົນ ແລະບາດເຈັບ
ອີກ ຢ່າງນ້ອຍ 80 ຄົນ.
ຕຳຫຼວດກ່າວວ່າ ພວກໂຈມຕີໄດ້ບີບຄະນວນລະເບີດ ທີ່ຫ້າງ
ໃສ່ລົດບັນທຸກໃຫຍ່ 2 ຄັນໃຫ້ ແຕກຂຶ້ນ ໃນເຊົ້າວັນພະຫັດມື້ນີ້ຢູ່ຂ້າງນອກຫ້ອງການສືບລັບຂອງອັຟການິສຖານ ໃນແຂວງGhazni ເຮັດໃຫ້ແກ້ວປະຕູປ່ອງຢ້ຽມແຕກກະຈາຍ ທີ່ພາໃຫ້
ຜູ້ຄົນບາດເຈັບຫຼາຍຄົນ. ຕຳຫຼວດ 8 ຄົນ ແມ່ນຮວມຢູ່ໃນຈຳນວນຂອງຜູ້ທີ່ເສຍຊີວິດ.
ເຈົ້າໜ້າທີ່ກ່າວວ່າ ເຫດລະເບີດຫຼາຍບັ້ນແມ່ນມີຂຶ້ນ ຫຼັງຈາກມີການຍິງຕໍ່ສູ້ກັນ ກັບກຳລັງ ຮັກສາຄວາມປອດໄພຂອງອັຟການິສຖານ ທີ່ໄດ້ສັງຫານພວກໂຈມຕີ 19 ຄົນ.
ກຸ່ມຕາລິບັນ ໄດ້ອ້າງເອົາຄວາມຮັບຜິດຊອບ ໃນການໂຈມຕີຄັ້ງນີ້.
ການໂຈມຕີດັ່ງກ່າວ ແມ່ນໄດ້ເນັ້ນໃຫ້ເຫັນເຖິງຄວາມບໍ່ປອດໄພທີ່ເພີ້ມທະວີຂຶ້ນຢູ່ໃນອັຟການິສຖານ ຊຶ່ງໃນເວລານີ້ກຳລັງດີ້ນຮົນຕໍ່ສູ້ກັບວິກິດການທາງດ້ານການເມືອງທີ່ພົວພັນກັບການຂັດແຍ້ງກ່ຽວກັບຜົນການເລືອກຕັ້ງປະທານາທິບໍດີ.
