ໄຕ້ຫວັນກ່າວໃນວັນຈັນມື້ນີ້ວ່າ ຕົນກຳລັງຕິດຕາມກວດກາຢ່າງໃກ້ຊິດ ໃນຂະນະທີ່ຈີນໄດ້ດຳເນີການຊ້ອມລົບທາງທະຫານເປັນມື້ທີ 3.
ກອງທັບໄຕ້ຫວັນກ່າວວ່າ ຈີນໄດ້ສົ່ງເຮືອບິນລົບຫຼາຍສິບລຳ ແລະກຳປັ່ນລົບ 11 ລຳ ໄປທີ່ໄຕ້ຫວັນ ເຊິ່ງເປັນສ່ວນໜຶ່ງຂອງການຊ້ອມລົບທີ່ໄດ້ເລີ່ມຂຶ້ນໃນວັນເສົາຜ່ານມາ.
ສະຖານີໂທລະພາບ CCTV ຂອງຈີນກ່າວວ່າ ກອງທັບຈີນໄດ້ຈຳລອງການປິດລ້ອມໄຕ້ຫວັນ ແລະຈຳລອງການໂຈມຕີຕໍ່ບັນດາເປົ້າໝາຍສຳຄັນຢູ່ທີ່ເກາະດັ່ງກ່າວ.
ກະຊວງປ້ອງກັນປະເທດຍີ່ປຸ່ນກ່າວໃນວັນຈັນມື້ນີ້ວ່າ ກຳປັ່ນບັນທຸກເຮືອບິນຊານດົງ (Shandong) ຂອງຈີນ ໄດ້ບິນປະຕິບັດງານ ຢູ່ເຂດນ່ານນ້ຳໃກ້ກັບໝູ່ເກາະໂອກີນາວາ (Okinawan) ຂອງຍີ່ປຸ່ນ ໃນວັນອາທິດ.
ນອກຈາກນີ້, ໃນວັນຈັນມື້ນີ້ ສະຫະລັດຍັງກ່າວວ່າ ກຳປັ່ນລົບຕິດລູກສອນໄຟ USS Milius ໄດ້ແລ່ນຜ່ານໃກ້ໝູ່ເກາະສແປຣັດລີ (Spratly) ໃນທະເລຈີນໃຕ້. ໝູ່ເກາະທີ່ມີການຂັດແຍ້ງກັນດັ່ງກ່າວ ແມ່ນຖືກອ້າງກຳມະສິດໂດຍຈີນທັງໝົດແລະບາງສ່ວນແມ່ນໂດຍບຣູນາຍ, ມາເລເຊຍ, ຟີລິບປິນ, ໄຕ້ຫວັນ ແລະຫວຽດນາມ.
ກອງທັບເຮືອສະຫະລັດກ່າວໃນຖະແຫຼງການສະບັບນຶ່ງວ່າ “ການປະຕິບັດງານເພື່ອເສລີພາບໃນການເດີນເຮືອດັ່ງກ່າວເປັນການຮັກສາສິດ, ເສລີພາບ ແລະການນຳໃຊ້ທະເລຢ່າງຖືກຕ້ອງຕາມກົດໝາຍ.”
ການຊ້ອມລົບຂອງຈີນຢູ່ອ້ອມໄຕ້ຫວັນ ແມ່ນເປັນການຕອບໂຕ້ຕໍ່ການພົບປະຂອງປະທານາທິບໍດີໄຕ້ຫວັນກັບປະທານສະພາຕ່ຳຂອງສະຫະລັດ ທ່ານເຄວິນ ແມັກຄາຣ໌ທີ (Kevin McCarthy) ແລະສະມາຊິກສະພາຄົນອື່ນໆໃນລັດຄາລີຟໍເນຍ ໃນອາທິດຜ່ານມາ.
ປະທານາທິບໍດີໄຕ້ຫວັນ ທ່ານນາງໄຊ ອິງ-ເຫວິນ (Tsai Ing-wen) ໄດ້ປະນາມການຊ້ອມລົບນີ້, ໂດຍກ່າວວ່າ ໄຕ້ຫວັນຈະສືບຕໍ່ເຮັດວຽກຮ່ວມກັບສະຫະລັດ ແລະປະເທດປະຊາທິປະໄຕອື່ນໆ ໃນຂະນະທີ່ເກາະແຫ່ງນີ້ ປະເຊີນໜ້າກັບ “ການຂະ ຫຍາຍຕົວຂອງອຳນາດຜະເດັດການຢ່າງຕໍ່ເນື່ອງ” ຈາກຈີນ.