ພວກປະທ້ວງຊາວໄຕ້ຫວັນ ພາກັນບຸກເຂົ້າໄປ ໃນກະຊວງສຶກສາ
ທີ່ ນະຄອນຫຼວງ ໄທເປ ເມື່ອວັນສຸກມື້ນີ້ ຫຼັງຈາກ ນັກສຶກສາຄົນໜຶ່ງ
ໄດ້ຂ້າຕົວເອງຕາຍ ທ່າມກາງການຖົກຖຽງກັນເລື້ອງ ທີ່ວ່າ ຫລັກສູດ
ຂອງໂຮງຮຽນໃນເກາະດັງກ່າວ ແມ່ນເນັ້ນໜັກໃສ່ “ຈີນ” ຫຼາຍເກີນ
ໄປຫຼືບໍ່.
ພວກນັກສຶກສາ ຫຼາຍຮ້ອຍຄົນ ໄດ້ເຕົ້າໂຮມກັນຢູ່ນອກ ກະຊວງ
ສຶກສາ ເມື່ອຕອນຄ່ຳວັນພະຫັດວານນີ້ ແລະ ໃນຕອນເຊົ້າວັນສຸກ
ມື້ນີ້ ເພື່ອຮຽກຮ້ອງໃຫ້ ລັດຖະມົນຕີ ກະຊວງສຶກສາ ທ່ານ Wu
Se-hwa ລາອອກຈາກຕຳແໜ່ງ ແລະ ໃຫ້ປີ້ນຄືນການປ່ຽນແປງ
ຕ່າງໆ ຂອງຫລັກສູດໂຮງຮຽນມັດທະຍົມສຶກສາ.
ການປະທ້ວງມີຂຶ້ນ ຫຼັງຈາກການເສຍຊີວິດ ຂອງທ້າວ Lin Kuan-hua ອາຍຸ 20 ປີ ຊຶ່ງ
ສົບຂອງຜູ້ກ່ຽວ ໄດ້ຖືກພົບເຫັນ ໃນວັນພະຫັດວານນີ້ ຫຼັງຈາກທີ່ລາວຖືກຈັບໂຕໄວ້ ເມື່ອ
ອາທິດແລ້ວນີ້ ພ້ອມດ້ວຍ ຄົນອື່ນອີກ 33 ຄົນ ໃນຖານບຸກເຂົ້າໄປໃນກະຊວງສຶກສາ ເພື່ອ
ປະທ້ວງການປ່ຽນແປງຫລັກສູດ. ສາເຫດຂອງການເສຍຊີວິດ ຜູ້ກ່ຽວ ຍັງບໍ່ຈະແຈ້ງເທື່ອ
ເຖິງແມ່ນ ມີການລາຍງານວ່າ ເປັນການຂ້າຕົວຕາຍ.
ພວກນັກສຶກສາທີ່ທຳການປະທ້ວງ ກ່າວວ່າ ການປ່ຽນແປງຫລັກສູດ ນັ້ນ ແມ່ນເປັນການ
ສົ່ງເສີມນະໂຍບາຍ “ຈີນດຽວ” ຂອງປັກກິ່ງ ທີ່ຈັດໃຫ້ໄຕ້ຫວັນ ເປັນແຂວງນຶ່ງທີ່ແຍກຕົວ
ອອກ ແທນທີ່ຈະເປັນປະເທດປະຊາທິປະໄຕ.
