ປະທານາທິບໍດີ ໄຕຫວັນ ທ່ານ ລາຍ ຈິງ-ເຕ ໄດ້ສະແດງໄມຕີຈິດ ແລະ ສະເໜີການຮ່ວມມືກັບ ຈີນ ໃນວັນອາທິດວານນີ້ ລຸນຫຼັງການຊ້ອມລົບສອງວັນຂອງ ຈີນ ຢູ່ໃກ້ກັບເກາະດັ່ງກ່າວ, ໃນຂະນະທີ່ສະມາຊິກສະພາ ສະຫະລັດ ກຸ່ມນຶ່ງໄດ້ເດີນທາງຮອດນະຄອນຫຼວງ ໄທເປ.
ຈີນ, ເຊິ່ງອ້າງວ່າ ໄຕ້ຫວັນ ທີ່ປົກຄອງຕົນເອງແບບປະຊາທິປະໄຕເປັນເຂດແດນຂອງເຂົາເຈົ້ານັ້ນ, ໄດ້ດຳເນີນການຊ້ອມລົບເມື່ອວັນພະຫັດ ແລະ ວັນສຸກທີ່ຜ່ານມາ, ໂດຍເອີ້ນມັນວ່າ “ການລົງໂທດ” ຫຼັງຈາກການສາບານຕົວເຂົ້າຮັບຕຳແໜ່ງຂອງທ່ານ ລາຍ ເມື່ອວັນຈັນທີ່ຜ່ານມາ ເຊິ່ງ ປັກກິ່ງ ໄດ້ເອີ້ນວ່າເປັນການຜັກດັນອີກຄັ້ງນຶ່ງສຳລັບເອກະລາດຢ່າງເປັນທາງການຂອງເກາະດັ່ງກ່າວ.
ຈີນ ໄດ້ປະນາມທ່ານ ລາຍ ຢ່າງຊ້ຳແລ້ວຊ້ຳອີກວ່າ “ນັກແບ່ງແຍກດິນແດນ.” ທ່ານ ລາຍໄດ້ປະຕິເສດການອ້າງເອົາອຳນາດອະທິປະໄຕຂອງ ປັກກິ່ງ ແລະ ເວົ້າວ່າປະຊາຊົນຂອງ ໄຕ້ຫວັນ ສາມາດຕັດສິນໃຈ ກ່ຽວກັບ ອະນາຄົດຂອງເຂົາເຈົ້າເອງ. ທ່ານໄດ້ສະເໜີການເຈລະຈາຢ່າງຊ້ຳແລ້ວຊ້ຳອີກແຕ່ຖືກປະຕິເສດ.
ໃນການກ່າວຄຳປາໄສຢູ່ກອງປະຊຸມຂອງພັກປົກຄອງ ປະຊາທິປະໄຕກ້າວໜ້າຂອງທ່ານໃນເມືອງ ໄທໜານ ຢູ່ພາກໃຕ້ຂອງເນາະນັ້ນ, ທ່ານ ລາຍ ໄດ້ຮຽກຮ້ອງ ຈີນ ໃຫ້ “ແບ່ງປັນຄວາມຮັບຜິດຊອບທີ່ໜັກໜ່ວງ ກ່ຽວກັບ ສະຖຽນລະພາບໃນພາກພື້ນກັບ ໄຕ້ຫວັນ,” ອີງຕາມຄຳເຫັນທັງຫຼາຍທີ່ສະໜອງໃຫ້ໂດຍພັກຂອງທ່ານ.
ທ່ານ ລາຍ, ຜູ້ທີ່ໄດ້ຊະນະການເລືອກຕັ້ງໃນເດືອນມັງກອນທີ່ຜ່ານມາ, ໄດ້ກ່າວວ່າທ່ານຍັງ “ຫວັງທີ່ຈະຍົກລະດັບຄວາມເຂົ້າໃຈສອງຝ່າຍ ແລະ ຄວາມປອງ ດອງກັບ ຈີນ ຜ່ານການແລກປ່ຽນຕ່າງໆ ແລະ ການຮ່ວມມື, ສ້າງຜົນປະໂຫຍດສອງຝ່າຍ ແລະ ກ້າວໄປສູ່ສະຖານະຂອງສັນຕິພາບ ແລະ ຄວາມຈະເລີນຮັ່ງມີຮ່ວມກັນ.”
ຟໍຣັມສະແດງຄວາມຄິດເຫັນ