ປະທານາທິບໍດີທີ່ໄດ້ຖຶກເລືອກຂອງໄຕ້ຫວັນ ທ່ານ ຫຼາຍ ຈິງ-ເຕ ກ່າວວ່າ ການທີ່ສະພາຕໍ່າຂອງສະຫະລັດ ຜ່ານຊຸດການຊ່ວຍເຫຼືອດ້ານການທະຫານ ມູນຄ່າ 8 ຕື້ໂດລາ ເພື່ອຕ້ານອິດທິພົນຂອງຈີນໃນຊ່ວງທ້າຍອາທິດທີ່ຜ່ານມາ ຈະ “ເພີ່ມທະວີການສະກັດກັ້ນລັດທິຜະເດັດການ” ແລະ “ເພີ່ມຄວາມເຊື່ອໝັ້ນຢູ່ໃນພາກພື້ນ.”
ສະພາຕ່ຳສະຫະລັດ ໄດ້ອະນຸມັດຮ່າງກົດໝາຍຊ່ວຍເຫລືອມູນຄ່າ 95 ຕື້ໂດລາ ໃນວັນເສົາທີ່ຜ່ານມາ ເຊິ່ງລວມທັງເງິນສຳລັບ ຢູເຄຣນ, ອິສຣາແອລ ແລະ ໄຕ້ຫວັນ. ຮ່າງກົດໝາຍດັ່ງກ່າວ ໄດ້ມີກຳນົດລົງຄະແນນສຽງໃນສະພາສູງສະຫະລັດໃນວັນອັງຄານວານນີ້.
ນອກເໜືອຈາກເງິນ 8 ຕື້ໂດລາສຳລັບໄຕ້ຫວັນແລ້ວ, ເງິນອີກ 1.9 ຕື້ໂດລາຢູ່ໃນຮ່າງກົດໝາຍດັ່ງກ່າວ ຍັງໄດ້ຖືກຈັດສັນເພື່ອເສີມອາວຸດຂອງສະຫະລັດ ທີ່ໄດ້ສົ່ງໄປໃຫ້ໄຕ້ຫວັນ ແລະບັນດາພັນທະມິດອື່ນໆຢູ່ໃນພາກພື້ນ.
ທ່ານ ຫຼາຍ (Lai) ກ່າວວ່າ ຮ່າງກົດໝາຍດັ່ງກ່າວໄດ້ສະແດງໃຫ້ເຫັນເຖິງ “ຄຳໝັ້ນສັນຍາຂອງວໍຊິງຕັນ ຕໍ່ຄວາມໝັ້ນຄົງຂອງໄຕ້ຫວັນ”, ໂດຍກ່າວຕື່ມວ່າ ມັນຈະ “ຊ່ວຍຮັບປະກັນສັນຕິພາບ ແລະ ສະຖຽນລະພາບໃນທົ່ວຊ່ອງແຄບໄຕ້ຫວັນ, ພ້ອມທັງເພີ່ມຄວາມເຊື່ອໝັ້ນຢູ່ໃນພາກພື້ນອີກດ້ວຍ.”
ທ່ານ ຫຼາຍ ໄດ້ສະແດງຄວາມເຫັນກ່ຽວກັບຮ່າງກົດໝາຍດັ່ງກ່າວ ໃນຂະນະໂອ້ລົມກັບຄະນະຜູ້ແທນຂອງສະຫະລັດທີ່ເດີນທາງໄປຢ້ຽມຢາມ ເຊິ່ງລວມມີຜູ້ຕາງໜ້າຈາກລັດ ມິຊີແກນ (Michigan) ສອງຄົນ, ທ່ານນາງ ລີຊາ ແມັກເຄລນ (Lisa McClain), ຈາກພັກຣີພັບບລິກັນ, ແລະ ທ່ານ ແດນ ຄິລດີ (Dan Kildee), ຈາກພັກເດໂມແຄຣັດ. ສະມາຊິກສະພາທັງສອງທ່ານ ກຳລັງຢ້ຽມຢາມໄຕ້ຫວັນເພື່ອປຶກສາຫາລືກ່ຽວກັບຄວາມໝັ້ນຄົງຢູ່ໃນພາກພື້ນ.
ຄວາມຄືບໜ້າຂອງການຊ່ວຍເຫຼືອໃນສະພາ ແມ່ນມີຂຶ້ນໃນຂະນະທີ່ຄວາມເຄັ່ງຕຶງລະຫວ່າງ ກັບຈີນເພີ່ມສູງຂຶ້ນ. ປັກກິ່ງອ້າງວ່າເກາະທີ່ປົກຄອງຕົນເອງດັ່ງກ່າວ ເປັນສ່ວນນຶ່ງຂອງດິນແດນຂອງຕົນ ແລະບໍ່ໄດ້ປະຕິເສດການໃຊ້ກຳລັງ ເພື່ອເຮັດໃຫ້ເປົ້າໝາຍດັ່ງກ່າວເປັນຈິງ. ນັບແຕ່ທ່ານ ຫຼາຍ ໄດ້ຖືກເລືອກໃນເດືອນມັງກອນທີ່ຜ່ານມາ, ປັກກິ່ງ ກໍໄດ້ເພີ່ມທະວີຄວາມກົດດັນຕໍ່ໄຕ້ຫວັນ, ໂດຍການສົ່ງເຮືອບິນລົບ ແລະກຳປັ່ນກອງທັບເຮືອ ເຂົ້າສູ່ເຂດນ່ານນ້ຳ ແລະ ນ່ານຟ້າອ້ອມໆໄຕ້ຫວັນເປັນປະຈຳ.
ຟໍຣັມສະແດງຄວາມຄິດເຫັນ