ອະດີດປະທານາທິບໍດີໄຕ້ຫວັນ ທ່ານ Chen Shiu-bian ໄດ້ຮັບ
ການປ່ອຍໂຕອອກຈາກຄຸກຊົ່ວຄາວ ຍ້ອນເຫດຜົນທາງການແພດ
ເພື່ອອອກມາປິ່ນປົວພະຍາດຫລາຍຢ່າງ ຫຼັງຈາກທີ່ໄດ້ຮັບໃຊ້ໂທດ
ມາເກືອບ 6 ປີແລ້ວ ໃນຈຳນວນ 20 ປີ ສຳຫລັບໂທດສໍ້ລາດ
ບັງຫລວງ.
ກະຊວງຍຸດຕິທຳຂອງໄຕ້ຫວັນ ກ່າວໃນວັນຈັນມື້ນີ້ ວ່າ ທິມນັກ
ການແພດທີ່ເປັນອິດສະຫຼະ ຈະທຳການຮັກສາປິ່ນປົວທ່ານ Chen
ທີ່ເປັນໂຣກຊຶມເສົ້າທີ່ຮ້າຍແຮງ ແລະ ສົງໄສກັນວ່າທ່ານເປັນໂຣກ
ເສ້ນປະສາດກະຕຸກ ຫລື Parkinson ແລະພະຍາດອື່ນໆອີກ ທີ່
ບໍ່ສາມາດປິ່ນປົວໄດ້ ຢູ່ໃນຄຸກ. ທ່ານຈະຕ້ອງກັບຄືນໄປເຂົ້າຄຸກ
ພາຍໃນໜຶ່ງເດືອນ ຖ້າຫາກ ການກວດສຸຂະພາບພົບວ່າ ທ່ານມີສຸຂະພາບດີ.
ທ່ານ Chen ໄດ້ຖືກດຳເນີນຄະດີ ບໍ່ດົນຫລັງຈາກ ສະໄໝການດຳລົງຕຳແໜ່ງ ປະທານາທິບໍດີຂອງທ່ານ ແຕ່ປີ 2000 ຫາ 2008 ສິ້ນສຸດລົງ. ທ່ານຖືກສານຕັດສິນວ່າຜິດ ໃນເດືອນ ກັນຍາ ປີ 2009 ໃນຂໍ້ຫາ ມີສ່ວນກ່ຽວພັນກັບການຮັບສິນບົນ ຈຳນວນ 20 ລ້ານດອລລ່າ ຊຶ່ງເຮັດໃຫ້ທ່ານເປັນອະດີດປະທານາທິບໍດີໄຕ້ຫວັນຄົນທຳອິດ ທີ່ໄດ້ຮັບໃຊ້ໂທດ ສຳຫລັບການກະທຳຜິດໃນຂະນະທີ່ດຳລົງຕຳແໜ່ງຢູ່ນັ້ນ. ພັນລະຍາຂອງທ່ານ ແລະ ສະມາຊິກຄອບຄົວອີກ 2 ຄົນ ກໍໄດ້ຖືກຕັດສິນວ່າ ມີຄວາມຜິດເຊັ່ນກັນ.
