ລັດຖະມົນຕີຕ່າງປະເທດຣັດເຊຍທ່ານ Sergei Lavrov ກ່າວວ່າ ລັດຖະບານ ຣັດເຊຍໄດ້ຢຸດການປະຕິບັດງານ ທາງທະຫານທັງໝົດ ຢູ່ທາງພາກຕາເວັນອອກ ຂອງເມືອງ Aleppo ກ່ອນໜ້າກອງປະຊຸມລະຫວ່າງບັນດາຜູ້ຊ່ຽວຊານທາງທະຫານສະຫະລັດແລະ ຣັດເຊຍ ກ່ຽວກັບສະຖານນະການຢູ່ໃນເມືອງທີ່ຖືກທຳລາຍດັ່ງກ່າວ.
ໃນຕອນເຊົ້າຂອງວັນພະຫັດວານນີ້ ລັດຖະມົນຕີຕ່າງປະເທດສະຫະລັດ ທ່ານ John Kerry ກ່າວວ່າ ທ່ານມີ “ຄວາມຫວັງ” ກ່ຽວກັບໂອກາດໃນການທີ່ຈະບັນລຸຂໍ້ຕົກລົງຢຸດ ຍິງກັບຣັດເຊຍ ເພື່ອຍຸຕິການສູ້ລົບໃນເມືອງ Aleppo.
ຫລັງຈາກການພົບປະກັບ ທ່ານ Lavrov ທີ່ນະຄອນ Hamburg ໃນວັນພະຫັດວານນີ້ແລ້ວ ທ່ານ Kerry ໄດ້ກ່າວຕໍ່ບັນດານັກຂ່າວວ່າ ທ່ານຍັງລໍຖ້າ “ຄຳຕອບ ແລະຄຳແນະ ນຳ” ແຕ່ກໍໄດ້ກ່າວເພີ້ມເຕີມວ່າ “ພວກເຮົາກຳລັງປະຕີີບັດງານກ່ຽວກັບບາງສິ່ງບາງຢ່າງ ຢູ່ທີ່ນີ້.” ໂດຍທີ່ບໍ່ໄດ້ໃຫ້ລາຍລະອຽດຫຍັງຫຼາຍ.
ລັດຖະມົນຕີຕ່າງປະເທດຣັດເຊຍກ່າວວ່າ “ຂໍ້ຕົກລົງໄດ້ບັນລຸກັນແລ້ວສຳລັບບັນດາຜູ້ຊ່ຽວຊານທາງທະຫານຂອງພວກເຮົາ ແລະບັນດານັກການທູດທີ່ຈະພົບປະກັນໃນວັນ ເສົາມື້ອື່ນ ຢູ່່ທີ່ນະຄອນ Geneva ເພື່ອໃຫ້ເສັດສິ້ນວຽກງານທີ່ໄດ້ເຮັດ ໃນໄລຍະຫຼາຍ ມື້ຜ່ານມາກ່ຽວກັບເອກກະສານ ທີ່ອະທິບາຍເຖິງຊ່ອງທາງແລະວິທີການແກ້ໄຂຂັ້ນສຸດທ້າຍຂອງບັນຫາຢູ່ທາງພາກຕາເວັນອອກຂອງເມືອງ Aleppo ຊຶ່ງອີງຕາມຂໍ້ຕົກລົງນີ້ ພວກຫົວຮຸນແຮງທັງໝົດໃຫ້ໜີອອກໄປ ພ້ອມດ້ວຍພົນລະເຮືອນ ຜູ້ທີ່ຕ້ອງການຢາກ ອອກໜີ.”
ຢູ່ທີ່ນະຄອນນິວຢອກ ທູດພິເສດສະຫະປະຊາຊາດຮັບຜິດຊອບກ່ຽວກັບເລື້ອງຊີເຣຍ ທ່ານ Staffan de Mistura ສະແດງຄວາມຍິນດີກັບການປະກາດຂອງຣັດເຊຍ ແຕ່ ໄດ້ກ່າວຕໍ່ບັນດານັກຂ່າວວ່າ ທ່ານບໍ່ສາມາດພິສູດຢ່າງເປັນອິດສະຫຼະໄດ້ ທີ່ວ່າການ ສູ້ລົບໄດ້ຍຸຕິລົງ ຫລືວ່າພົນລະເຮືອນໄດ້ຖືກຍົກຍ້າຍອອກໜີ. ທ່ານກ່າວວ່າ ສະຫະປະ ຊາຊາດກໍຈະເຂົ້າຮ່ວມ ໃນການສົນທະນາຢູ່ນະຄອນ Geneva ໃນວັນເສົາມື້ອື່ນນີ້.
ທ່ານ de Mistura ກ່າວວ່າ ຄຳປະກາດຂອງຣັດເຊຍໄດ້ມີຂຶ້ນລະຫວ່າງກອງປະຊຸມລັບ ຂອງສະພາຄວາມໝັ້ນຄົງສະຫະປະຊາຊາດ. ເຈົ້າໜ້າທີ່ສະຫະປະຊາຊາດໄດ້ກ່າວເພີ້ມວ່າ ທູດຣັດເຊຍບໍ່ໄດ້ບອກໃຫ້ບັນດາສະມາຊິກສະພາຮູ້ວ່າ ການໂຈະການປະຕິບັດງານ ການສູ້ລົບຈະມີຂຶ້ນດົນປານໃດ ຢູ່ອ້ອມແອ້ມເມືອງ Aleppo.
