ກຸ່ມສິ້ງຊອມສິດທິມະນຸດໃນຊີເຣຍ ກ່າວວ່າ ການຢຸດຍິງໃນບາງເຂດ ຢູ່ແຂວງ Homs ທາງພາກກາງຂອງປະເທດຊີເຣຍ ຍັງໄດ້ຮັບການເຄົາລົບ ຢ່າງນ້ອຍ 10 ຊົ່ວໂມງກ່ອນທີ່ກຳລັງທະຫານອຳນາດການປົກຄອງຊີເຣຍ ແລະກຸ່ມຫົວຮຸນແຮງ ເລີ້ມຍິງຕອບໂຕ້ກັນ.
ກຸ່ມສິ້ງຊອມສິດທິມະນຸດໃນຊີເຣຍ ທີ່ມີສຳນັກງານຢູ່ອັງກິດ ລາຍງານໃນວັນສຸກມື້ນີ້ວ່າ ສຽງປືນໄດ້ດັງຂຶ້ນໃນເຂດຊົນນະບົດທາງພາກເໜືອຂອງແຂວງ Homs ທີ່ເມືອງ Farhaniyah, Teir Maalah, Um Sharshuh ແລະເຂດນອກເມືອງ al-Houla.
ຄະນະສັງເກດການ ກ່າວວ່າ ພວກຫົວຮຸນແຮງເປັນຜູ້ເລີ້ມຍິງກ່ອນ ທີ່ບ້ານ Hos Tasnin ແລະບ້ານ Javvurn ແລະບ່ອນອື່ນໆອີກ ທີ່ຄວບຄຸມໂດຍທະຫານລັດຖະບານ. ເວລານີ້ ຍັງບໍ່ທັນມີລາຍງານຂ່າວ ກ່ຽວກັບການບາດເຈັບລົ້ມຕາຍເທື່ອ.
ການຢຸດຍິງ ເລີ້ມຂຶ້ນຢູ່ພາກກາງຊີເຣຍ ໃນຕອນທ່ຽງ ວັນພະຫັດວານນີ້ ຕາມເວລາທ້ອງຖິ່ນ ຊຶ່ງມີຈຸດປະສົງແນໃສ່ເພື່ອໃຫ້ປະຊາຊົນໄດ້ມີໂອກາດເລີ້ມຕົ້ນຊີວິດຂອງພວກເຂົາເຈົ້າຄືນໃໝ່.
ພວກນັກຂ່າວທີ່ຢູ່ໃນພື້ນທີ່ກ່າວວ່າ ຕະຫລາດໝາກໄມ້ແລະຜັກ ໄດ້ເປີດຄືນແລ້ວ ແລະພວກເດັກນ້ອຍກໍພາກັນອອກໄປຫລິ້ນຢູ່ຕາມຖະໜົນຫົນທາງ ທີ່ເມືອງ Homs.
ເຈົ້າໜ້າທີ່ປ້ອງກັນປະເທດຂອງຣັດເຊຍ ແລະພວກຜູ້ຕາງໜ້າທີ່ຕໍ່ຕ້ານລັດຖະບານຊີເຣຍ ໄດ້ຕົກລົງກັນກ່ຽວກັບລາຍລະອຽດຂອງການຢຸດຍິງໃນເຂດພາກເໜືອຂອງແຂວງ Homs ທີ່ນະຄອນໄຄໂຣ ໃນອາທິດແລ້ວນີ້.
ໂຄສົກະຊວງປ້ອງກັນປະເທດຣັດເຊຍ ທ່ານ Igor Konashenkov ກ່າວວ່າ ການຢຸດຍິງນີ້ ຈະມີຜົນບັງຄັບໃຊ້ຢູ່ໃນເຂດທີ່ມີປະຊາຊົນອາໄສຢູ່ ຫຼາຍກວ່າ 147,000 ຄົນ.
ນີ້ແມ່ນການຢຸດຍິງເທື່ອທີ 3 ຂອງຈຳນວນທັງໝົດ 4 ເທື່ອ ທີ່ໄດ້ບັນລຸກັນໃນລະຫວ່າງການເຈລະຈາ ທີ່ກາຊັກສະຖານ ເວລາຣັດເຊຍ ອີຣ່ານ ແລະເທີກີ ຕົກລົງທີ່ຈະສ້າງຕັ້ງໃນອັນທີ່ຕົນເອີ້ນວ່າ “ເຂດຫຼຸດຜ່ອນຄວາມເຄັ່ງຕຶງ” ຢູ່ໃນເຂດທີ່ມີຄວາມຮຸນແຮງສຸດຫຼາຍໆແຫ່ງຂອງຊີເຣຍ.
ນອກນັ້ນແລ້ວ ການຢຸດຍິງ ຍັງມີຜົນບັງຄັບໃຊ້ຢູ່ໃນຫຼາຍໆເຂດ ທາງພາກໃຕ້ຂອງປະເທດຊີເຣຍ ແລະໃນບໍລິເວນນອກນະຄອນຫຼວງດາມັສກັສ. ສ່ວນເຂດທີ 4 ນັ້ນ ແມ່ນຢູ່ໃນແຂວງ Idlib ແຕ່ຍັງບໍ່ທັນມີການຈັດຕັ້ງຂຶ້ນເທື່ອ.
ບໍ່ຕ່າງຫຍັງກັບການຕົກລົງຢຸດຍິງອື່ນໆ ຢູ່ໃນບັນຫາຂັດແຍ້ງຊີເຣຍ ການຢຸດຍິງທີ່ວ່ານີ້ ແມ່ນບໍ່ໄດ້ຮວມເອົາກຸ່ມລັດອິສລາມເຂົ້ານຳ ຫຼືກຸ່ມຕ່າງໆທີ່ເປັນເຄືອຂ່າຍຂອງພວກກໍ່ການຮ້າຍອາລກາອີດາ.
