ຄະນະກວດກາ ສປຊ ໄປກວດເບິ່ງ ໂຮງງານ ອາວຸດເຄມີ ແຫ່ງນຶ່ງ ຂອງຊີເຣຍ (ສະໄລດ໌)

ຄະນະປະຕິບັດງານ ຂອງນາໆຊາດ ທີ່ກຳກັບນຳ ການທັບມ້າງ
ໂຄງການອາວຸດເຄມີ ຂອງຊີເຣຍ ກ່າວວ່າ ເວລານີ້ຕົນສາມາດ
ທຳການກວດພິສູດເບິ່ງ ນຶ່ງຂອງສະຖານທີ່ຈຳນວນສອງແຫ່ງທີ່
ຍັງເຫຼືອຢູ່ ຊຶ່ງຄວາມວິຕົກກັງວົນ ກ່ຽວກັບເລື່ອງຄວາມປອດໄພ ແລະຄວາມໝັ້ນຄົງເປັນອຸບປະສັກຂັດຂວາງບໍ່ໃຫ້ພວກເຂົາເຈົ້າ ສາມາດເຂົ້າໄປກວດກາໄດ້.

ອົງການເກືອດຫ້າມການນຳໃຊ້ອາວຸດເຄມີຫຼື OPCW ກ່າວໃນ
ວັນພະຫັດມື້ນີ້ວ່າ ການກວດກາເບິ່ງສະຖານທີ່ແຫ່ງນຶ່ງໃນເມືອງ
Aleppo ໃຫ້ການຢືນຢັນກ່ຽວກັບ ຄຳປະກາດຂອງຊີເຣຍ ທີ່ວ່າ ຕົນໄດ້ມ້າງແລະປະຖິ້ມສະຖານທີ່ແຫ່ງນີ້ ໄປເປັນເວລາດົນນານ
ແລ້ວ.

ອົງການ OPCW ກ່າວຕື່ມວ່າ ຕຶກອາຄານ ສະແດງໃຫ້ເຫັນວ່າ ໄດ້ຮັບຄວາມເສຍຫາຍ ຢ່າງໜັກຈາກການສູ້ລົບ. ເມືອງ Aleppo ເປັນບ່ອນທີ່ມີການສູ້ລົບກັນຢ່າງໜັກແຫ່ງນຶ່ງ ໃນລະຫວ່າງທີ່ຊີເຣຍເກີດວິກິດການ ເປັນເວລາ 32 ເດືອນ.

ດ້ວຍການກວດກາສະຖານທີ່ດັ່ງກ່າວນີ້ ຄະນະປະຕິບັດງານຮ່ວມຂອງອົງການ OPCW ແລະສະຫະປະຊາຊາດໄດ້ໄປກວດພິສູດເບິ່ງທີ່ຕັ້ງແລະອຸບປະກອນຕ່າງໆຢູ່ຂ້າງໃນຂອງ ໂຮງງານອາວຸດເຄມີ 22 ແຫ່ງ ໃນຈຳນວນທັງໝົດ 23 ແຫ່ງ ຂອງຊີເຣຍ. ຊີເຣຍ ກ່າວວ່າ ໂຮງງານແຫ່ງສຸດທ້າຍທີ່ຍັງເຫຼືອຢູ່ ກໍໄດ້ຖືກປະຖິ້ມໄປແລ້ວ ເຊັ່ນດຽວກັນ.