ບັນດານັກຊ່ຽວຊານຈາກ 15 ປະເທດສະມາຊິກຂອງສະພາຄວາມໝັ້ນ ຄົງສະຫະປະຊາຊາດມີໝາຍກໍານົດ ທີ່ຈະທໍາການໂອ້ລົມສົນທະນາກັນ ເລື້ອງຮ່າງຍັດຕິໃໝ່ສະບັບນຶ່ງ ກ່ຽວກັບຄວາມວຸ້ນວາຍໃນຊີເຣຍ.
ການພົບປະກັນໃນວັນອັງຄານມື້ນີ້ ຈະກວດສອບເບິ່ງຮ່າງຍັດຕິຂອງ ຣັດເຊຍທີ່ສົ່ງໄປຍັງສະພາຄວາມໝັ້ນຄົງໃນວັນຈັນວານນີ້ອັນເປັນຍັດຕິສະບັບທີສາມທີ່ກຸງມອສກູໄດ້ສະເໜີຕໍ່ສະພາດັ່ງກ່າວໃນເດືອນຜ່ານມານີ້.
ບັນດານັກການທູດຝ່າຍຕາເວັນຕົກກ່າວໃນວັນຈັນວານນີ້ວ່າ ຮ່າງຍັດ ຕິດັ່ງກ່າວສັບສົນ ແລະກໍບໍ່ເປັນທີ່ຈະແຈ້ງວ່າ ຣັດເຊຍຈະຮັບເອົາຂໍ້ຄວາມທີ່ເຂັ້ມງວດຂຶ້ນທີ່ທາງຝ່າຍຕາເວັນຕົກໄດ້ຮຽກຮ້ອງໄປແລ້ວນັ້ນຫລືບໍ?
ຣັດເຊຍເປັນພັນທະມິດທາງທະຫານຂອງປະທານາທິບໍດີ Bashar al-Assad ແລະຢືນຢັດວ່າ ການເຄື່ອນໄຫວໃດໆກໍຕາມຂອງສະພາຄວາມໜັ້ນຄົງຄວນຈະແນເປົ້າໝາຍໃສ່ ບໍ່ພຽງແຕ່ລັດຖະບານອັສສັດເທົ່ານັ້ນ ແຕ່ຕ້ອງແນເປົ້າໝາຍໃສ່ຂະບວນການຝ່າຍຄ້ານເຊ່ນກັນ ທີ່ທວງໃຫ້ຍຸຕິການປົກຄອງປະເທດແບບຜະເດັດການມາເປັນເວລາ 11 ປີ ຂອງທ່ານອັສສັດນັ້ນ.
ບັນດາປະເທດມະຫາອໍານາດຝ່າຍຕາເວັນຕົກ ໄດ້ທໍາການຊຸກຍູ້ສະພາຄວາມໝັ້ນຄົງມາເປັນເວລາຫລາຍເດືອນແລ້ວ ໃຫ້ປະນາມການປາບປາມຢ່າງຮຸນແຮງຂອງລັດຖະບານຊີເຣຍ ຕໍ່ການລຸກຮືຂຶ້ນຕໍ່ຕ້ານລັດ ຖະບານມາເປັນເວລາ 10 ເດືອນ ແຕ່ຣັດເຊຍແລະຈີນໄດ້ຂັດຂວາງ ຕໍ່ການເອົາບາດກ້າວດັ່ງກ່າວ.
ທ່ານພັນກີມູນ ເລຂາທິການໃຫຍ່ສະຫະປະຊາຊາດ ໃນວັນຈັນວານນີ້ ໄດ້ຮຽກຮ້ອງສະພາຄວາມໝັ້ນຄົງໃຫ້ເອົາບາດທີ່ເຂັ້ມງວດຂຶ້ນຕໍ່ຊີເຣຍ ບ່ອນທີ່ທ່ານພັນກີມູນ ກ່າວວ່າ ການບາດເຈັບລົ້ມຕາຍຈາກຄວາມວຸ້ນວາຍດັ່ງກ່າວ ໄດ້ເພີ່ມຂຶ້ນເຖິງລະດັບທີ່ຮັບເອົາບໍ່ໄດ້ແລ້ວ.
ໃນການຖະແຫລງ ລະຫວ່າງການໄປຢ້ຽມຢາມນະຄອນ Abu Dhabi ທ່ານພັນກີມູນ ໄດ້ຮຽກຮ້ອງໃຫ້ສະພາຄວາມໜັ້ນຄົງທໍາການເຄື່ອນໄຫວແບບສອດຄ່ອງກັນໃນການແກ້ໄຂວິກິດການໃນຊີເຣຍນັ້ນ.
