ເລຂາທິການໃຫຍ່ຂອງອົງການສະຫະປະຊາຊາດ ທ່ານ Ban Ki-moon ແລະທູດພິເສດ
ນາໆຊາດ ທ່ານ Kofi Annan ໄດ້ຮຽກຮ້ອງໃຫ້ຊິເຣຍອະນຸຍາດໃຫ້ພວກນັກສັງເກດການ
ຂອງອົງການສະຫະປະຊາຊາດ ເຂົ້າໄປໃນຫົວເມືອງທີ່ກໍ່ການກະບົດຂຶ້ນໃນພາກຕາເວັນ
ຕົກສຽງເໜືອຂອງຊິເຣຍບ່ອນທີ່ສະຫະລັດຢ້ານກົວວ່າກຳລັງຮັກສາຄວາມປອດໄພຂອງ
ຊິເຣຍ ພວມວາງແຜນທີ່ຈະສັງຫານໝູ່ພົນລະເຮືອນນັ້ນ.
ພວກນັກເຄື່ອນໄຫວແລະປະຊາຊົນໃນເມືອງ Al-Haffeh ກ່າວວ່າ ເຮືອບິນເຮລິຄອບເຕີ
ແລະລົດຖັງຂອງລັດຖະບານ ໄດ້ໂຈມຕີເມືອງດັ່ງກ່າວໃນແຂວງ Latakia ຊຶ່ງເຮັດໃຫ້
ພົນລະເຮືອນຈຳນວນນຶ່ງ ຍັງຕົກຄ້າງຢູ່ໃນເມືອງນີ້. ໃນລາຍງານທີ່ນຳອອກເຜີຍແຜ່ໃນ
ວັນແລງວັນຈັນວານນີ້ ທ່ານ Ban ໄດ້ກ່າວວ່າ ມັນມີຄວາມຈໍາເປັນ ທີ່ຈະຕ້ອງອະນຸຍາດ
ໃຫ້ພວກນັກສັງເກດການຂອງອົງການສະຫະປະຊາຊາດ ເຂົ້າໄປໃນເມືອງ Al-Haffeh
ແບບບໍ່ມີການລົບກວນ. ກ່ອນໜ້ານີ້ ທ່ານ Annan ໄດ້ສະແດງຄວາມວິຕົກກັງວົນເປັນ
ທີ່ສຸດຕໍ່ສະຖານະການໃນເມືອງດັ່ງກ່າວ ແລະທວງໃຫ້ອະນຸຍາດໃຫ້ຄະນະສັງເກດການ
ນາໆຊາດເຂົ້າ ໄປໃນເມືອງດັ່ງກ່າວໂດຍທັນທີ.
ໂຄສົກກະຊວງການຕ່າງປະເທດສະຫະລັດທ່ານນາງ Victory Nuland ກ່າວວ່າ
ກຸງວໍຊິງຕັນມີຄວາມຕື່ນຕົກໃຈເປັນທີ່ສຸດກ່ຽວກັບລາຍງານຂ່າວຈາກຊີເຣຍທີ່ວ່າ
ທະຫານລັດຖະບານອາດພວມທຳການຈັດແຈງ ເພື່ອທຳການສັງຫານໝູ່ທີ່ ເມືອງ
Al-Haffeh ແລະທີ່ໝັ້ນແຫ່ງອື່ນໆຂອງພວກຝ່າຍຄ້ານ ຮວມທັງໃນເຂດ ຊານເມືອງ
ຂອງນະຄອນຫຼວງ Damascus, ເມືອງ Daraa, ເມືອງ Deir el-Zour, ເມືອງ
Hama ແລະເມືອງ Homs.
ທ່ານນາງ Nuland ບໍ່ໄດ້ໃຫ້ຮ່ອງຮອຍໃດໆກ່ຽວກັບການຕອບຮັບໃໝ່ຕໍ່ວິກິດການ
ໃນຊີເຣຍ ໂດຍກ່າວຢໍ້າວ່າ ສະຫະລັດຢາກໃຫ້ມີການກົດດັນທາງດ້ານການທູດຕໍ່
ລັດຖະບານຊີເຣຍ ແລະກ່າວເນັ້ນເຖິງຄວາມວິຕົກກັງວົນຂອງສະຫະລັດວ່າ ການ
ແຊກແຊງທາງທະຫານນັ້ນ ຈະເຮັດໃຫ້ບັນຫາຂັດແຍ້ງໃນ ຊີເຣຍ ກາຍເປັນສົງຄາມ
ຕົວແທນໄດ້.
ກຸ່ມສັງເກດການດ້ານສິດທິມະນຸດໃນຊິເຣຍຊຶ່ງມີສໍານັກງານຢູ່ທີ່ອັງກິດໄດ້ກ່າວວ່າ
ການໂຈມຕີໃນທົ່ວປະເທດຂອງຝ່າຍລັດຖະບານ ແລະກອງກໍາລັງຂອງກຸ່ມກະບົດ ໄດ້ສັງຫານພົນລະເຮືອນຢ່າງນ້ອຍ 63 ຄົນ ແລະທະຫານ 21 ຄົນໃນວັນຈັນວານ
ນີ້ ຊຶ່ງການບາດເຈັບລົ້ມຕາຍນີ້ ແມ່ນຮວມທັງ 10 ຄົນທີ່ໄດ້ເສຍຊີວິດຍ້ອນລະເບີດ
ລົດ ໃນເມືອງ Deir el-Zour ທາງພາກຕາເວັນອອກສຽງເໜືອຂອງຊີເຣຍ.
