ອົງການເນໂຕ້ໄດ້ປະນາມຊີເຣຍໃນການຍິງເຮືອບິນອາຍພົ່ນຂອງເທີກີລໍານຶ່ງຕົກໃນສັບ
ປະດາແລ້ວນີ້ ໂດຍກ່າວວ່າ ການໂຈມຕີດັ່ງກ່າວເປັນ ໂຕຢ່າງອັນນຶ່ງ ກ່ຽວກັບຄວາມບໍ່
ເອົາຫົວຊາຂອງລັດຖະບານຊີເຣຍຕໍ່ກົດໝາຍສາກົນ ສັນຕິພາບແລະຄວາມໝັ້ນຄົງ ຕະ
ຫຼອດທັງຊີວິດຂອງມະນຸດ.
ຫຼັງຈາກການພົບປະກັນຂອງພວກຜູ້ແທນອົງການພັນທະມິດເນໂຕ້ທີ່ກຸງ Brussels
ທ່ານ Anders Fogh Rasmussen ເລຂາທິການໃຫຍ່ກຸ່ມເນໂຕ້ກ່າວວ່າ ທ່ານບໍ່ຄາດ
ວ່າ ສະຖານະການຈະເພີ່ມທະວີຄວາມຮຸນແຮງຂຶ້ນແລະກ່າວຕໍ່ໄປວ່າ ທ່ານຄາດວ່າຊີເຣຍ
ຈະເອົາມາດຕະການຕ່າງໆທີ່ຈໍາເປັນ ເພື່ອຫລີກເວ້ນບໍ່ໃຫ້ເຫດການເຊ່ນນີ້ເກີດຂຶ້ນອີກ
ໃນອະນາຄົດ.
ທ່ານບໍ່ຢາກທໍາການຄາດຄະເນໃດໆກ່ຽວການເຄື່ອນໄຫວທີ່ເປັນໄປໄດ້ຂອງກຸ່ມເນໂຕ້
ໂດຍກ່າວວ່າ ພວກປະເທດພັນທະມິດຈະສືບຕໍ່ທໍາການຕິດຕາມເບິ່ງການຜັນຂະຫຍາຍ
ຕ່າງໆຕໍ່ໄປ ຊຶ່ງທ່ານ Rasmussen ກ່າວວ່າ: ສຽງຂອງທ່ານ Rasmussen: “ຂໍໃຫ້
ຂ້າພະເຈົ້າເວົ້າເລື້ອງນີ້ຢ່າງຈະແຈ້ງວ່າ ຄວາມໝັ້ນຄົງຂອງກຸ່ມພັນທະມິດແມ່ນແບ່ງແຍກ
ກັນບໍ່ໄດ້ ພວກເຮົາຢືນຢັດນໍາກັນກັບເທີກີ ໃນຈິດໃຈແຫ່ງຄວາມເປັນນໍ້ານຶ່ງໃຈດຽວກັນ
ທີ່ແຂງແຮງ.”
ເທີກີໄດ້ຮຽກຮ້ອງໃຫ້ມີການປະຊຸມກັນ ພາຍໃຕ້ມາດຕານຶ່ງໃນສົນທິສັນຍາກຸ່ມເນໂຕ້ທີ່ອະ
ນຸມັດໃຫ້ປະເທດສະມາຊິກໃດນຶ່ງຂອງຕົນຮຽກຮ້ອງ ໃຫ້ມີການປຶກສາຫາລືກັນກັບພວກ
ປະເທດສະມາຊິກອື່ນໆໄດ້ ຖ້າຕົນມີຄວາມຮູ້ສຶກວ່າ ຄວາມໝັ້ນຄົງຂອງຕົນຖືກຂົ່ມຂູ່.
ໃນຂະນະດຽວກັນ ນາຍົກລັດຖະມົນຕີ Recept Tayyib Erdoganແຫ່ງເທີກີ ໄດ້ກ່າວຄໍາ
ປາໄສຕໍ່ພວກສະມາຊິກສະພາແຫ່ງຊາດເທີກີໂດຍເວົ້າວ່າ ການເອົາມາດຕະການຮັບມືຢ່າງ
ລະມັດລະວັງຂອງຕົນຕໍ່ການໂຈມຕີໃນວັນສຸກຜ່ານມານັ້ນ ບໍ່ຄວນເຂົ້າໃຈຜິດຄິດວ່າເປັນ
ຄວາມອ່ອນແອ.
ທ່ານ Erdogan ກ່າວວ່າ ມິດຕະພາບຂອງເທີກີມີຄຸນຄ່າຫຼາຍ ແຕ່ຄວາມໂມໂຫແກ້ແຄ້ນ
ຂອງຕົນແມ່ນແຂງແຮງເຊ່ນກັນ ຊຶ່ງທ່ານກ່າວວ່າ ທະຫານຂອງເທີກີຈະທໍາການຕອບໂຕ້
ຕໍ່ການລະເມີດຊາຍແດນ ໃດໆກໍຕາມຈາກຊີເຣຍ.
ເທີກີກ່າວວ່າ ເຮືອບິນຂອງຕົນໄດ້ລ່ວງລໍ້າເຂົ້າໄປໃນນ່ານຟ້າຂອງຊີເຣຍໂດຍຄວາມເລິນ
ເລີ້ເປັນເວລາສັ້ນໆ ກ່ອນອອກຈາກນ່ານຟ້າຂອງຊີເຣຍແລະຫຼັງຈາກນັ້ນຖືກຊີເຣຍຍິງຕົກ.
ຊີເຣຍເອີ້ນເຫດການດັ່ງກ່າວວ່າ ເປັນການເຄື່ອນໄຫວປ້ອງກັນຕົນເອງ.