ສື່ມວນຊົນລັດຖະບານຊີເຣຍ ໄດ້ລາຍງານວ່າລູກສອນໄຟຂອງອິສຣາແອລ ທີ່ຍິງຈາກທະເລເມດີເຕຣານຽນໄດ້ຕົກໃສ່ທ່າເຮືອລາຕາເກຍ (Latakia) ເຮັດໃຫ້ເກີດໄຟໄໝ້ ແລະສ້າງຄວາມເສຍຫາຍຢ່າງໜັກ.
ອົງການຂ່າວ SANA ຂອງລັດຖະບານກ່າວວ່າ ການໂຈມຕີໄດ້ເກີດຂຶ້ນໃນ ຕອນເຊົ້າວັນອັງຄານມື້ນີ້ ແລະໄດ້ຕົກໃສ່ເດີ່ນເກັບມ້ຽນຕູ້ຄອນເທັນເນີແຫ່ງນຶ່ງຢູ່ໃນທ່າເຮືອແຫ່ງນັ້ນ.
ລາຕາເກຍ (Latakia) ແມ່ນທ່າເຮືອການຄ້າທີ່ສຳຄັນຂອງຊີເຣຍ ແລະອິສຣາແອລໄດ້ໂຈມຕີເປັນເທື່ອທີສອງແລ້ວເພື່ອແນໃສ່ເຂດດັ່ງກ່າວໃນເດືອນນີ້.
ອິສຣາແອລ ໄດ້ປະຕິບັດການໂຈມຕີຫຼາຍຄັ້ງຕໍ່ເປົ້າໝາຍຕ່າງໆຢູ່ໃນດິນແດນຂອງ ຊີເຣຍ ນັບແຕ່ເລີ້ມມີສົງຄາມກາງເມືອງຂອງ ຊີເຣຍໃນປີ 2011 ເປັນຕົ້ນມາ.
ອິສຣາແອລ ບໍ່ຄ່ອຍກ່າວເຖິງການໂຈມຕີໃນແຕ່ລະຄັ້ງ ແຕ່ໄດ້ຮັບຮູ້ເຖິງການແນເປົ້າໝາຍໂຈມຕີໃສ່ກຳລັງທະຫານທີ່ ອີຣ່ານ ໜູນຫຼັງ ແລະ ການສົ່ງເຄື່ອງຂອງເພື່ອປ້ອງກັນການຕັ້ງທີ່ໝັ້ນຂອງອີຣ່ານ ຢູ່ໃນ ຊີເຣຍ.
