ສະພາຄວາມໝັ້ນຄົງອົງການສະຫະປະຊາຊາດ ໄດ້ຈັດກອງປະຊຸມຮີບດ່ວນ ໃນວັນ ອາທິດວານນີ້ ກ່ຽວກັບ ຄວາມຮຸນແຮງ ທີ່ທະວີຂຶ້ນຢ່າງໃຫຽ່ ຢູ່ໃນເມືອງ Aleppo ເວລາ ເຮືອບິນຮົບອາຍພົ່ນຂອງລັດຖະບານຊີເຣຍ ແລະ ຣັດເຊຍ ໄດ້ຖິ້ມລະເບີດໃສ່ເມືອງ ຢູ່ເຂດພາກຕາເວັນອອກ ຂອງຊີເຣຍ ທີ່ຄວບຄຸມໂດຍກຸ່ມຕໍ່ຕ້ານລັດຖະບານຊີເຣຍນັ້ນ.
ເອກອັກຄະລັດຖະທູດ ສະຫະລັດ ປະຈຳສະຫະປະຊາຊາດ ທ່ານນາງ Samantha Power ໄດ້ກ່າວຕໍ່ ສະພາຄວາມໝັ້ນຄົງ ອົງການສະຫະປະຊາຊາດ ວ່າ “ເປັນທີ່ ຊັດແຈ້ງແລ້ວວ່າ ລະບອບຂອງ Assad ເຊື່ອວ່າ ການແກ້ໄຂບັນຫາ ທາງທະຫານ ແມ່ນເປັນພຽງຫົນທາງດຽວເທົ່ານັ້ນ. ລະບອບນັ້ນ ກ່າວວ່າ ຕົນຈະຜາບແພ້ ດ້ວຍກຳ ລັງທະຫານ ໃນທຸກໆຕະລາງນິ້ວ ຂອງຊີເຣຍ. ແລະ ຕົນບໍ່ສົນໃຈເລີຍວ່າ ຈະມີຫຍັງ ຫລົງເຫຼືອຢູ່ຊີເຣຍ ໃນການສະແຫວງຫາການແກ້ໄຂບັນຫາ ດ້ວຍກຳລັງທະຫານ ນັ້ນ.”
ສະຫະລັດ ຝຣັ່ງ ແລະ ອັງກິດ ໄດ້ຮຽກຮ້ອງໃຫ້ຈັດກອງປະຊຸມສຸກເສີນຂຶ້ນ ເພື່ອກົດດັນ ຣັດເຊຍ ໃຫ້ຄວບຄຸມ ຊີເຣຍ ທີ່ເປັນພັນທະມິດຂອງຕົນ ແລະ ໃຫ້ຍຸຕິການໂຈມຕີທັງຫຼາຍ ຕໍ່ປະຊາຊົນ 275,000 ຄົນ ທີ່ຕົກຄ້າງຢູ່ໃນເມືອງດັ່ງກ່າວ. ການໂຈມຕີດ້ວຍ ລູກສອນໄຟ ລະເບີດຣົດຖັງ ແລະ ການຍິງປືນໃຫຍ່ ເຫຼົ່ານັ້ນ ໄດ້ທຳລາຍຕຶກອາຄານຕ່າງໆຈົນເພ ພັງໝົດ ເຮັດໃຫ້ຖະໜົນຫົນທາງ ເຕັມດ້ວຍສິ່ງຫັກພັງ ແລະ ກ້ອນຫິນໃຫຍ່ ໄປທົ່ວ. ອົງການສະຫະປະຊາຊາດ ກ່າວວ່າ ປະຊາຊົນ ປະມານ 213 ຄົນ ໄດ້ຖືກຂ້າຕາຍ ໃນການໂຈມຕີດັ່ງກ່າວ.
ເອກອັກຄະລັດຖະທູດ ສະຫະລັດ ທ່ານນາງ Power ກ່າວວ່າ ການໂຈມຕີທາງອາກາດ ຫຼາຍກວ່າ 150 ຖ້ຽວ ໄດ້ຖະລົ່ມເມືອງດັ່ງກ່າວ ສອງສາມມື້ທີ່ຜ່ານມາ ແລະໄດ້ກ່າວຫາ ຣັດເຊຍ ແລະ ລັດຖະບານຊີເຣຍ ວ່າ ກຳລັງດຳເນີນການ “ບຸກໂຈມຕີ ໝົດທຸກຢ່າງ” ເພື່ອຍຶດຄືນເມືອງ Aleppo.
ອ່ານຂ່າວນີ້ຕື່ມ ເປັນພາສາອັງກິດ
Syria, Russia Bombard Aleppo
