ພວກຕໍ່ຕ້ານລັດຖະບານ ໃນຊີເຣຍ ກ່າວວ່າ ຕົນຈະບໍ່ເຂົ້າຮ່ວມ
ການເຈລະຈາສັນຕິພາບທີ່ກຳນົດຈະເລີ້ມຂຶ້ນຢູ່ນະຄອນເຈນີວາ
ໃນວັນສຸກມື້ນີ້.
ກຸ່ມຕໍ່ຕ້ານທີ່ໄດ້ຮັບການໜຸນຫລັງຈາກຊາອຸດີ ອາຣາເບຍ ທີ່ມີຊື່
ວ່າ ສະພາເຈລະຈາລະດັບສູງ ກ່າວໃນວັນພະຫັດວານນີ້ວ່າ ຄຳ
ຕອບທີ່ເຂົາເຈົ້າໄດ້ຮັບຈາກການຮຽກຮ້ອງຂອງພວກເຂົາເຈົ້າ ທີ່
ຢາກໃຫ້ຍຸຕິການໂຈມຕີທາງອາກາດແລະຢຸດເຊົາການປິດລ້ອມ
ຢູ່ໃນຊີເຣຍນັ້ນ ແມ່ນເປັນທີ່ຮັບເອົາບໍ່ໄດ້.
ສະພາເຈລະຈາລະດັບສູງໄດ້ປະຊຸມກັນທີ່ນະຄອນຣິຢາດໃນອາ
ທິດນີ້ແລະສະມາຊິກຂອງກຸ່ມດັ່ງກ່າວເວົ້າວ່າ ຕົນຈະຢູ່ທີ່ນັ້ນຕໍ່ໄປຈົນຮອດວັນສຸກມື້ນີ້ໂດຍ
ຈະບໍ່ເຂົ້າຮ່ວມການເລີ້ມຕົ້ນໃນການເຈລະຈາຢູ່ສະວິດເຊີແລນ.
ແຕ່ແນວໃດກໍຕາມ ບັນດາຜູ້ຕາງໜ້າກໍບໍ່ໄດ້ປະຕິເສດເຖິງຄວາມເປັນໄປໄດ້ທີ່ຈະເຂົ້າຮ່ວມ
ການເຈລະຈາ ຊຶ່ງຄາດວ່າອາດຈະໃຊ້ເວລາຫລາຍໆເດືອນນັ້ນ.
ການປະກາດທີ່ວ່ານີ້ ແມ່ນໄດ້ສະທ້ອນໃຫ້ເຫັນ ເຖິງບັນຫາຫຍຸ້ງຍາກ ທີ່ກຳລັງປະເຊີນໜ້າ
ກັບຂັ້ນຕອນໃນການຈັດສາກການເຈລະຈາເພື່ອຍຸຕິບັນຫາຂັດແຍ້ງຢູ່ໃນຊີເຣຍ ຊຶ່ງໃນອີກ
ບໍ່ດົນນີ້ກໍຈະກ້າວເຂົ້າສູ່ປີທີຫົກແລ້ວ. ບັນຫາຂັດແຍ້ງນີ້ ໄດ້ສັງຫານປະຊາຊົນຫລາຍກວ່າ
250 ພັນຄົນແລະເຮັດໃຫ້ອີກເກືອບ 4 ລ້ານ 6 ແສນຄົນບໍ່ມີບ່ອນພັກພາອາໄສ.
ທູດພິເສດ ຂອງອົງການສະຫະປະຊາຊາດ ຮັບຜິດຊອບເລື້ອງຊີເຣຍ ທ່ານ Staffan de
Mistura ກ່າວຜ່ານທາງວີດີໂອໃນວັນພະຫັດວານນີ້ວ່າ ການເຈລະນານີ້ ບໍ່ສາມາດທີ່ຈະ
ໃຫ້ເກີດຄວາມລົ້ມແຫລວໄດ້. ທ່ານເວົ້າວ່າ ກອງປະຊຸມນີ້ຕ້ອງເປັນໂອກາດທີ່ພາດບໍ່ໄດ້.
ບັນດາຜູ້ກະກຽມກອງປະຊຸມຂອງສະຫະປະຊາຊາດ ກ່າວວ່າ ກອງປະຊຸມຊຶ່ງມີ ກຳນົດຈະ
ເລີ້ມຂຶ້ນທີ່ນະຄອນເຈນີວາຈະບໍ່ແມ່ນການເຈລະຈາສັນຕິພາບແຕ່ເປັນການໂອ້ລົມກັນໃນ
ລະດັບໃກ້ຄຽງທີ່ໝາຍຄວາມວ່າ ເປັນການວາງພື້ນຖານສຳລັບການເຈລະຈາ. ຜູ້ຕາງໜ້າ
ຂອງລັດຖະບານຊີເຣຍໄດ້ຕັດສິນໃຈເຂົ້າຮ່ວມ ຫຼັງຈາກໄດ້ມີການຫາລື ກັບທ່ານ de Mis-
tura ທີ່ນະຄອນດາມັສກັສໃນຕົ້ນເດືອນນີ້.
