ທູດພິເສດ ຂອງນາໆຊາດ ທ່ານ Brahimi ຢ້ຽມຢາມ ເລບານອນ

ທ່ານ Lakhdar Brahimi ທູດ​ພິ​ເສດ​ສະຫະ​ປະຊາ​ຊາດ ​ແລະ​ສັນນິບາດ ອາຣັບ ຮັບຜິດຊອບ​ກ່ຽວ​ກັບ​ເລື່ອງ​ຊີເຣຍ ​ໄດ້​ເດີນທາງ​ໄປ​ຍັງ​ເລ​ບາ​ນອນ ປະ​ເທດ​ເພື່ອນ​ບ້ານ​ຂອງ​ຊີ​ເຣຍ ​ເພື່ອພົບປະ​ກັບ​ບັນດາ​ເຈົ້າໜ້າ​ທີ່ ຊຶ່ງ​ເປັນ​ບ່ອນ​ຢຸດ​ແວ່ຫຼ້າ​ສຸດ​ຂອງ​ການ​ຢ້ຽມຢາມຂົງ​ເຂດ ໃນ​ການຊອກ​ຫາ​ຊ່ອງ​ທາງ​ແກ້​ໄຂວິ​ກິດ​ການ​ໃນ​ຊີ​ເຣຍ ທີ່​ຍືດ​ເຍື້ອມາ​ເປັນ​ເວລາ 19 ​ເດືອນ​ແລ້ວ​ນັ້ນ.

ທ່ານ Brahimi ມີ​ກໍານົດພົບ​ປະ​ໃນ​ວັນ​ພຸດ​ມື້​ນີ້ ກັບ​ປະທານາທິບໍດີ​ເລ​ບາ​ນອນ ທ່ານ Michel Suleiman ນາ​ຍົກ​ລັດຖະມົນຕີ Najib Mikati ​ແລະປະທານ​ສະພາ​ແຫ່ງ​ຊາດ​ຂອງ​ເລ​ບາ​ນອນ.

ບ່ອນ​ຢຸດ​ແວ່​ຢ້ຽມຢາມ​ກ່ອນ​ໜ້າ​ນີ້ ມີ​ໂຮມ​ທັງ​ທັງ Egypt, Irag, Saudi Arabia, Turkey ​ແລະ Iran. ​ໃນ​ຕົ້ນ​ຂອງ​ອາທິດ​ນີ້ ທ່ານ Brahimi ​ໄດ້​ຮຽກຮ້ອງ​ໃຫ້ປະ​ເທດ​ພັນທະ​ມິດຂອງ​ຊີ​ເຣຍ ກໍ​ຄືອິຣ່ານ ຈົ່ງຊ່ວຍຈັດ​ຕັ້ງ​ໃຫ້​ມີ​ການ​ຢຸດ​ຍິງ​ຢູ່​ໃນ​ຊີ​ເຣຍ ​ໃນ​ລະຫວ່າງວັນພັກ Eid al-Adha ຂອງ​ຊາວ​ມຸສລິ​ມ ຊຶ່ງ​ຈະ​ເລີ່​ມຕົ້ນ​ໃນ​ອາທິດ​ໜ້າ​ນີ້.

ອົງການ​ຂ່າວ SANA ຂອງ​ທາງ​ການຊີ​ເຣຍ ​ໄດ້​ອ້າງ​ເອົາ​ຄໍາ​ເວົ້າ​ຂອງ​ໂຄ ສົກກະຊວງ​ຕ່າງປະ​ເທດ ທ່ານ Jihad Makdissi ​ເມື່ອ​ວັນ​ອັງຄານ​ວານ​ນີ້ທີ່​ເວົ້າວ່າ ຊີ​ເຣຍ​ໄດ້​ຄອຍ​ຖ້າ​ການ​ມາ​ເຖິງ​ຂອງ​ທ່ານ Brahimi ​ແລະ​ຫວັງ ວ່າ ການ​ພົບ​ປະ​ກັບ​ທູດ​ພິ​ເສດ​ນານາ​ຊາດ​ຄັ້ງ​ນີ້ ຈະ​ເປັນ​ປັດໄຈ​ໄປ​ສູ່ຄວາມ ​ສໍາ​ເລັດ​ຜົນ​ຂອງ​ການ​ລິ​ເລີ່​ມ​ໃນທາງ​ສ້າງສັນ​ນັ້ນ.

ສັນຍາ​ຢຸດ​ຍິງ ທີ່​ສະ​ເໜີ​ໂດຍທ່ານ ​ໂກ​ຟີ ອັນ​ນັນ ອະດີດ​ເລຂາທິການ​ໃຫຍ່​ອົງການ​ສະຫະ​ປະຊາ​ຊາດ ຊຶ່ງ​ເປັນທູດ​ພິ​ເສດກ່ອນ​ທ່ານ Brahimi ນັ້ນ​ໄດ້ ​ແຕກ​ຫັກ​ລົງໃນ​ເວລາ​ບໍ່​ດົນຫຼັງຈາກ​ເລີ່​ມມີ​ຜົນ​ບັງຄັບ​ໃຊ້​ໃນ​ເດືອນ​ເມສາ​ຜ່ານ ມາ​ປີ​ນີ້.