ສະຫະລັດ ແລະເຢຍລະມັນເວົ້າວ່າ ສະພາຄວາມໝັ້ນຄົງຂອງສະຫະປະຊາຊາດຈະຕ້ອງທໍາ
ການຕອບໂຕ້ ຕໍ່ການກວາດລ້າງຢ່າງນອງເລືອດຂອງລັດຖະບານຊີເຣຍ ຕໍ່ພວກປະທ້ວງ
ລຸນຫລັງທີ່ພວກນັກສອບສວນຂອງ ສະຫະປະຊາຊາດ ໄດ້ໃຫ້ລາຍລະອຽດກ່ຽວກັບການ
ລ່ວງລະເມີດສິດທິ ມະນຸດ ຢ່າງຮ້າຍແຮງ ທີ່ມີຄໍາສັ່ງຈາກເຈົ້າໜ້າທີ່ "ລະດັບສູງສຸດ” ໃນ
ລັດຖະບານຂອງປະທານາທິບໍດີ ບາຊາ ອາລ-ອາສສາດ (Bashar al-Assad).
ເອກອັກຄະລັດຖະທູດສະຫະລັດ ປະຈໍາສະຫະປະຊາຊາດ ທ່ານນາງ ຊູແຊນ ໄຣສ ກ່າວ
ໃນວັນຈັນວານນີ້ວ່າ ອີງຕາມການຕັດສິນໃຈເມື່ອໝໍ່ໆມານີ້ ຂອງສັນນິບາດຊາດອາຫຣັບ
ໃນການລົງໂທດຕໍ່ຊີເຣຍ ແລະ “ການກໍ່ໂທດກຳ ທີ່ມີການບັນທຶກໄວ້ເປັນຢ່າງດີ ໃນເວລານີ້”
ທີ່ໄດ້ແຈ້ງ ໃຫ້ຊາບຢູ່ໃນການລາຍງານຂອງສະຫະປະຊາຊາດນັ້ນ ມັນເຖິງ “ເວລາແລ້ວທີ່
ຈະມີການທົບທວນຄືນ” ກ່ຽວກັບຄວາມເປັນໄປໄດ້ ໃນການເອົາມາຕະການຂອງສະພາ
ຄວາມໝັ້ນຄົງສະຫະປະຊາຊາດ.
ຄະນະກໍາມາທິການຂອງສະຫະປະຊາຊາດຄະນະນຶ່ງ ທີ່ດໍາເນີນການສືບ ສວນສອບສວນ
ການລະເມີດສິດທິມະນຸດ ຕາມທີ່ມີການກ່າວຫາຢູ່ໃນຊີເຣຍ ໄດ້ກ່າວຫາທະຫານຂອງລັດ
ຖະບານວ່າ ໄດ້ “ທໍາການສັງຫານແບບ ຮວບຮັດຕັດຕອນ, ຈັບກຸມຄົນໂດຍພະລາການ,
ທໍາໃຫ້ມີການຫາຍສາບສູນໂດຍຖືກບັງຄັບ, ທໍາການທໍລະມານ ຊຶ່ງລວມທັງ ການລະເມີດ
ທາງເພດ, ພ້ອມທັງການລະເມີດສິດທິຂອງເດັກ."
ລາຍງານດັ່ງກ່າວ ທີ່ໄດ້ຖືກນໍາອອກມາເຜີຍແຜ່ໃນວັນຈັນວານນີ້ ເວົ້າວ່າ ກໍາລັງທະຫານ
ຂອງຊີເຣຍ ໄດ້ເຂັ່ນຂ້າເດັກນ້ອຍ 256 ຄົນ ໃນນັ້ນລວມມີ ເດັກຍິງອາຍຸສອງປີ ຜູ້ນຶ່ງ
ແລະກ່າວອີກວ່າ “ການທໍລະມານຕໍ່ເດັກນ້ອຍ ແລະຜູ້ໃຫຍ່ແມ່ນດໍາເນີນໄປແບບມີຄວາມ
ໜັກເທົ່າທຽມກັນ.”
ບົດລາຍງານຍັງໄດ້ກ່າວອ້າງເຖິງ ຄໍາໃຫ້ການຫລາຍໆອັນ ທີ່ສະແດງໃຫ້ເຫັນວ່າ “ເດັກ
ນ້ອຍຜູ້ຊາຍ ແມ່ນໄດ້ຖືກທໍລະມານທາງເພດຢູ່ຕໍ່ໜ້າຜູ້ຊາຍໃຫຍ່ຢູ່ໃນບ່ອນຄຸມຂັງຕ່າງໆ.”
ການຄົ້ນພົບຂອງກຸ່ມສອບສວນດັ່ງກ່າວ ດຽວນີ້ ຈະຖືກຍື່ນໄປຍັງສະພາວ່າດ້ວຍສິດທິມະນຸດ ແລະສະມັດຊາໃຫຍ່ຂອງສະຫະປະຊາຊາດ ຊຶ່ງຈະເປັນຜູ້ຕັດສິນໃຈວ່າ ຈະເຮັດແນວໃດໃນຂັ້ນ
ຕອນຕໍ່ໄປ.
