ທ່ານ Kofi Annan ທູດພິເສດຂອງອົງການສະຫະປະຊາຊາດແລະສັນນິບາດອາຣັບກ່າວ
ວ່າ ລັດຖະບານຊີເຣຍຕ້ອງຈັດຕັ້ງປະຕິບັດການຢຸດຍິງໃນທັນທີແລະຢຸດເຊົາການໂຈມຕີກຸ່ມ
ຝ່າຍຄ້ານ ຂະນະທີ່ການປະທະກັນຮອບໃໝ່ລະເບີດຂຶ້ນໃນທົ່ວປະເທດ ໃນວັນສຸກມື້ນີ້.
ໂຄສົກຂອງທ່ານ Annan ກ່າວຕໍ່ພວກນັກຂ່າວ ທີ່ນະຄອນເຈນີວາວ່າ ເສັ້ນຕາຍແມ່ນໃນ
ທັນທີໂລດ ໃຫ້ປະທານາທິບໍດີ Bashar al-Assad ຈັດຕັ້ງປະຕິບັດແຜນການສັນຕິພາບ
6 ຂໍ້ ທີ່ໄດ້ຮ່າງຂຶ້ນໂດຍອະດີດຫົວໜ້າອົງການສະຫະປະຊາຊາດ. ທ່ານບໍ່ໄດ້ໃຫ້ລາຍລະ
ອຽດຢ່າງເຈາະຈົງວ່າມາດຕະການອັນໃດທີ່ທ່ານ Assad ຄວນຈະເອົາ ຖ້າທ່ານຫາກຍັງບໍ່
ໄດ້ຈັດຕັ້ງປະຕິບັດ.
ເຖິງແມ່ນວ່າທ່ານ Assad ໄດ້ຕົກລົງຮັບເອົາແຜນການສັນຕິພາບ ໃນມື້ວັນອັງຄານຜ່ານ
ມາແລ້ວກໍຕາມ ແຕ່ຄວາມຮຸນແຮງຍັງດຳເນີນຢູ່ຕໍ່ມາ ໃນແຕ່ລະມື້. ໃນວັນສຸກມື້ນີ້ ກຸ່ມສິ້ງ
ຊອມສິດທິມະນຸດໃນຊີເຣຍ ກ່າວຕໍ່ວີໂອເອວ່າ ທະຫານລັດຖະບານ ຍັງສືບຕໍ່ການໂຈມຕີ
ທີ່ເມືອງ Homs ໃນພາກກາງຂອງປະເທດ ດ້ວຍການຍິງປືນຄົກໂຈມຕີຫຼາຍໆຮອບ ທີ່
ຮັດໃຫ້ມີຜູ້ເສຍຊີວິດຢ່າງນ້ອຍ 2 ຄົນ. ນອກນັ້ນແລ້ວຍັງມີລາຍງານວ່າໄດ້ເກີດການສູ້ລົບ
ກັນຂຶ້ນທີ່ແຂວງ Idlib ໃນ ພາກເໜືອຂອງປະເທດແລະນອກນະຄອນຫຼວງ Damascus.
ຂະນະດຽວກັນ ລັດຖະມົນຕີການຕ່າງປະເທດສະຫະລັດ ທ່ານນາງ Hillary Clinton
ພວມຢູ່ໃນລະຫວ່າງການຢ້ຽມຢາມນະຄອນຫຼວງຂອງ Saudi Arabia ເພື່ອເຈລະຈາຫາ
ລືແນໃສ່ເພີ່ມຄວາມກົດດັນຕໍ່ທ່ານ Assad ໃຫ້ຍຸຕິການປາບປາມຢ່າງໂຫດຮ້າຍ ຕໍ່ການ
ລຸກຮືຂຶ້ນຕໍ່ຕ້ານລັດຖະບານທີ່ດຳເນີນມາ ເປັນເວລານຶ່ງປີແລ້ວນັ້ນ.
ໃນລະຫວ່າງການຢ້ຽມຢາມນະຄອນຫຼວງ Riyadh ເປັນເວລາ 2 ມື້ນັ້ນທ່ານນາງ Clin-
ton ຈະໄດ້ພົບປະກັບກະສັດ Abdullah ແລະລັດຖະມົນຕີການຕ່າງປະເທດ ເຈົ້າຊາຍ
Saud al-Faisal ພ້ອມໆກັບເຂົ້າຮ່ວມກອງປະຊຸມລະດັບສູງຂອງພວກນັກການທູດໃນ
ເຂດອ່າວເປີເຊຍນຳດ້ວຍ.
ຫຼັງຈາກນັ້ນ ທ່ານນາງ Clinton ຈະເດີນທາງໄປເທີກີໃນມື້ວັນອາທິດ ເພື່ອເຂົ້າຮ່ວມກອງ
ປະຊຸມຄັ້ງທີ 2 ຂອງອັນທີ່ເອີ້ນວ່າ “ເພື່ອນມິດຊີເຣຍ” ຊຶ່ງຈະມີປະເທດຕ່າງໆຫຼາຍສິບປະ
ເທດທີ່ໃຫ້ການສະໜັບສະໜຸນຕໍ່ພວກກະບົດໃນຊີເຣຍໄປຮ່ວມນັ້ນ.
ເປັນທີ່ຄາດກັນວ່າ ກອງປະຊຸມດັ່ງກ່າວນີ້ຈະເພັ່ງເລັງໃສ່ວ່າ ຈະຄໍ້າປະກັນແນວໃດໃຫ້ປະ
ທານາທິບໍດີ Assad ປະຕິບັດຕາມ ແຜນການສັນຕິພາບ ຊຶ່ງຮຽກຮ້ອງໃຫ້ ມີການຢຸດ
ຍິງ ການບັນເທົາທຸກທາງດ້ານມະນຸດສະທຳ 2 ຊົ່ວໂມງຕໍ່ມື້ແລະເປີດການເຈລະຈາທາງ
ດ້ານການເມືອງເພື່ອຍຸຕິບັນຫາຂັດແຍ້ງໃນຊີເຣຍ.