ກຸ່ມສິ້ງຊອມສິດທິມະນຸດໃນຊີເຣຍ ທີ່ມີສຳນັກງານຢູ່ປະເທດອັງກິດ ກ່າວວ່າ ທະຫານ
ຊີເຣຍໄດ້ຍິງປືນໃຫຍ່ໂຈມຕີເມືອງ Daraa ຊຶ່ງຕັ້ງຢູ່ໃນພາກໃຕ້ຂອງປະເທດ ເຮັດໃຫ້ມີ
ຜູ້ເສຍຊີວິດ ຢ່າງນ້ອຍ 15 ຄົນ.
ກຸ່ມສິ້ງຊອມສິດທິມະນຸດດັ່ງກ່າວ ແຈ້ງໃຫ້ຊາບຕື່ມວ່າ ນອກນັ້ນແລ້ວຍັງມີຜູ້ໄດ້ຮັບບາດ
ເຈັບອີກຫຼາຍສິບຄົນ ໃນການຍິງຖະຫຼົ່ມ ໃນຕອນເຊົ້າຂອງວັນເສົາມື້ນີ້.
ການເສຍຊີວິດທີ່ເມືອງ Daraa ມີຂຶ້ນທ່າມກາງການຄັດຄ້ານຢ່າງຮຸນແຮງຂອງນາໆຊາດ
ກ່ຽວກັບການສັງຫານໝູ່ພົນລະເຮືອນໃນມື້ວັນພຸດແລ້ວ ໃນການໂຈມຕີບ້ານ Mazraat
al-Qubeir ຊຶ່ງເປັນບ້ານນ້ອຍໆທີ່ຕັ້ງຢູ່ໃນເຂດພາກກາງຂອງຊີເຣຍນັ້ນ.
ອົງການສະຫະປະຊາຊາດກ່າວວ່າ ຄະນະສັງເກດການຂອງຕົນໄດ້ຮັບອະນຸຍາດໃຫ້ເຂົ້າ
ໄປໃນບ້ານດັ່ງກ່າວໃນມື້ວານນີ້ ບ່ອນທີ່ພວກເຂົາເຈົ້າໄດ້ເຫັນຮອຍລົດຫຸ້ມເກາະຢູ່ອ້ອມ
ບ້ານ ແລະເຮືອນຊານໄດ້ຮັບຄວາມເສຍຫາຍ ຍ້ອນຈະຫຼວດ ລະເບີດມື ແລະ ອາວຸດຊະ
ນິດຕ່າງໆ.
ຖະແຫຼງການສະບັບນຶ່ງຂອງອົງການສະຫະປະຊາຊາດ ກ່າວວ່າ ໄດ້ເຫັນຮອຍເລືອດຢູ່
ຕາມຝາແລະພື້ນເຮືອນບາງຫຼັງ ແລະຄະນະສັງເກດການໄດ້ກິ່ນເໝັນ ທີ່ມາຈາກໄຟໄໝ້
ສົບ.
ພວກນັກເຄື່ອນໄຫວກ່າວວ່າ ມີຢ່າງນ້ອຍ 78 ຄົນ ຮວມທັງແມ່ຍິງແລະເດັກນ້ອຍໄດ້ຖືກ
ຂ້າຕາຍທີ່ບ້ານ Mazraat al-Qubeir.
ລັດຖະບານຊີເຣຍໄດ້ຖິ້ມໂທດໃສ່ພວກກໍ່ການຮ້າຍທີ່ບໍ່ໄດ້ລະບຸຊື່ ກ່ຽວກັບການສັງຫານ
ໝູ່ດັ່ງກ່າວນີ້.