ລັດຖະມົນຕີການຕ່າງປະເທດສະຫະລັດ ທ່ານນາງ Hillary Clinton ພວມສົນທະນາຫາລື
ໃນວັນສຸກມື້ນີ້ ກ່ຽວກັບວິກິດການໃນຊີເຣຍ ກັບທູດພິເສດ ຂອງອົງການສະຫະປະຊາຊາດ
ແລະສັນນິບາດອາຣັບ ທ່ານໂກຟີ ອັນນັນ ທີ່ໄດ້ເຕືອນວ່າຈະເກີດສົງຄາມກາງເມືອງຂັ້ນຮ້າຍ
ແຮງຢູ່ໃນປະເທດດັ່ງກ່າວຖ້າສະຖານະການຫາກຍັງບໍ່ມີການປ່ຽນທິດທາງໃໝ່.
ການພົບປະທີ່ກຸງວໍຊິງຕັນມີຂຶ້ນນຶ່ງມື້ ຫຼັງຈາກອົງການສະຫະປະຊາຊາດກ່າວວ່າ ມີການຍິງ
ປືນໃສ່ຄະນະສັງເກດການ ທີ່ບໍ່ຕິດອາວຸດຂອງຕົນ ແລະໄດ້ມີການຂັດຂວາງບໍ່ໃຫ້ພວກເຂົາ
ເຈົ້າເຂົ້າໄປສືບສວນໃນບ່ອນທີ່ມີລາຍງານວ່າໄດ້ເກີດການສັງຫານໝູ່ເມື່ອໄວໆມານີ້ທີ່ແຂວງ
Hama ໃນເຂດພາກກາງຂອງຊີເຣຍ. ພວກນັກເຄື່ອນໄຫວເວົ້າວ່າມີຢ່າງນ້ອຍ 78 ຄົນຮວມ
ທັງແມ່ຍິງແລະເດັກນ້ອຍໄດ້ຖືກຂ້າຕາຍໃນສັບປະດານີ້ ທີ່ບ້ານ Mazraat al-Qubeir.
ທ່ານອັນນັນ ຊຶ່ງໄດ້ໄກ່ເກ່ຍໃຫ້ບັນລຸແຜນການສັນຕິພາບໃນເດືອນເມສາຜ່ານມາ ແຕ່ບໍ່ໄດ້
ຮັບການຈັດຕັ້ງປະຕິບັດນັ້ນ ເຕືອນໃນວັນພະຫັດວານນີ້ ກ່ຽວກັບການປ່ອຍໃຫ້ມີການສັງ
ຫານໝູ່ກາຍເປັນພາກສ່ວນຂອງຄວາມເປັນຈິງປະຈຳວັນຢູ່ໃນຊີເຣຍ.
ທ່ານໄດ້ຮຽກຮ້ອງໃຫ້ສະພາຄວາມໝັ້ນຄົງທີ່ມີການແບ່ງແຍກ ແລະສ່ວນທີ່ເຫຼືອຂອງປະຊາ
ຄົມນາໆຊາດ ໃຫ້ມີຄວາມປຸ້ມລຸມສາມັກຄີແລະດຳເນີນການໃນທັນທີເພື່ອທຳຄວາມກົດດັນ
ເພີ່ມຂຶ້ນ ໂດຍສະເພາະແລ້ວ ແມ່ນຕໍ່ລັດຖະບານຂອງປະທານາທິບໍດີຊີເຣຍ ທ່ານ Bashar
al-Assad.
ໃນລະຫວ່າງເດີນທາງໄປຢ້ຽມຢາມ ນະຄອນອິສຕັນບູລ ໃນວັນພະຫັດວານນີ້ ທ່ານນາງ
Clinton ກ່າວວ່າ ຜູ້ນຳຂອງຊີເຣຍໄດ້ທະວີຄູນຄວາມໂຫດຮ້າຍປ່າເຖື່ອນ ແລະການຫຼອກ
ລວງຕີສອງໜ້າຂອງທ່ານ ແລະເວລາໄດ້ມາເຖິງແລ້ວ ສຳຫຼັບຊີເຣຍໃນຍຸກຫຼັງ Assad.
ພວກນັກເຄື່ອນໄຫວຝ່າຍຄ້ານ ໄດ້ກ່າວຫາ ກຳລັງທີ່ນິຍົມລັດຖະບານ ໃນຊີເຣຍວ່າ ເປັນຜູ້
ທຳການສັງຫານໝູ່ໃນມື້ວັນພຸດແລ້ວ ທີ່ເມືອງ Hama ຊຶ່ງຖ້າຫາກໄດ້ຮັບການຢືນຢັນກໍຈະ
ເປັນການສັງຫານໝູ່ພົນລະເຮືອນຄັ້ງທີ 4 ໃນຮອບສອງອາທິດຜ່ານມາ. ລັດຖະບານຊີເຣຍ
ໄດ້ຖິ້ມໂທດໃສ່ພວກກໍ່ການຮ້າຍກ່ຽວກັບ ຄວາມຮຸນແຮງດັ່ງກ່າວ.
ໃນວັນພະຫັດວານນີ້ ທຳນຽບຂາວໄດ້ກ່າວຫາລັດຖະບານຊີເຣຍວ່າ ເປັນຜູ້ບົງການກ່ຽວ
ກັບການສັງຫານໂຫດຫ້ຽມທີ່ແນເປົ້າໝາຍໃສ່ພົນລະເຮືອນຮວມທັງພວກແມ່ຍິງແລະເດັກ
ນ້ອຍດັ່ງທີ່ໄດ້ມີການລາຍງານໂດຍແຫຼ່ງຂ່າວທີ່ເຊື່ອຖືໄດ້ຫຼາຍໆແຫຼ່ງ.
ມີຊາວຊີເຣຍຈຳນວນຫຼາຍໆພັນຄົນໄດ້ເສຍຊີວິດໃນການໂຈມຕີແລະການປະທະກັນນັບຕັ້ງ
ແຕ່ໄດ້ມີການຢຸດຍິງແລະການມີໜ້າຂອງຄະນະສັງເກດການສະຫະປະຊາຊາດຈຳນວນຫຼາຍ
ຮ້ອຍຄົນ ບໍ່ສາມາດທີ່ຈະຍຸຕິຄວາມຮຸນແຮງໄດ້.