ລິ້ງ ສຳຫລັບເຂົ້າຫາ

ທະຫານຊີເຣຍ ເລີ່ມປະຕິບັດງານ ທີ່ເມືອງ Jisr al-Shughour

  • ໄພສານ ວໍຣະຈັກ

ຊາວຊີເຣຍຈຸນຶ່ງພວມລໍຖ້າ ການອະນຸຍາດຂ້າມຊາຍແດນ ໃກ້ໆລົດໂຮງໝໍເຕີກກີ ໃນເຂດເມືອງ Guvecci ແຂວງ Hatay ຂອງເຕີກກີ (9 ມິຖຸນາ 2011)

ໂທລະພາບຂອງທາງການຊີເຣຍກ່າວວ່າກອງທັບຂອງ
ຊີເຣຍເລີ່ມການປະຕິບັດງານໃນວັນສຸກມື້ນີ້ ເພື່ອຟື້ນຟູ
ຄວາມໝັ້ນຄົງ ທີ່ເມືອງ Jisr al-Shughour ໃນພາກ
ເໜືອຂອງປະເທດໃກ້ໆຊາຍແດນເຕີກກີ.

ໂທລະພາບຊີເຣຍລາຍງານວ່າກອງທັບໄດ້ເຄື່ອນກຳລັງ
ເຂົ້າໄປຄວບຄຸມເມືອງດັ່ງກ່າວຕາມຄຳຮ້ອງຂໍຂອງປະຊາ
ຊົນທີ່ລາຍງານເວົ້າວ່າ ໄດ້ຂໍຮ້ອງໃຫ້ພວກ ທະຫານຈັບ
ກຸມ ກຸ່ມອັນທະພານປະກອບອາວຸດ ທີ່ລັດຖະບານເວົ້າ
ວ່າໄດ້ສັງຫານເຈົ້າໜ້າທີ່ຮັກສາຄວາມສະຫງົບ 120 ຄົນ
ໃນຕົ້ນສັບປະດານີ້. ກ່ອນໜ້ານີ້ ປະຊາຊົນໃນເມືອງດັ່ງກ່າວ ເວົ້າວ່າ ພວກທະຫານທີ່ຈົງ
ຮັກພັກດີຕໍ່ປະທານາທິບໍດີຊີເຣຍໄດ້ໂຈມຕີພວກທະຫານທີ່ໂຕນໜີຫຼືບໍ່ຍອມປະຕິບັດຕາມ
ຄຳສັ່ງໃຫ້ຍິງພົນລະເຮືອນ ລຸນຫຼັງການໂຮມຊຸມນຸມປະທ້ວງເພື່ອປະຊາທິປະໄຕທີ່ເມືອງດັ່ງ
ກ່າວໃນສັບປະດາແລ້ວ.

ພວກທີ່ເຫັນເຫດການເວົ້າວ່າ ໄດ້ມີການເຕົ້າໂຮມກຳລັງທະຫານແລະລົດຖັງ ຢູ່ນອກເມືອງ
Jisr al-Shughour ໃນວັນພະຫັດວານນີ້ ແຕ່ພວກນັກເຄື່ອນໄຫວ ກ່າວວ່າ ສ່ວນໃຫຍ່
ຂອງປະຊາຊົນ 50,000 ຄົນໃນເມືອງດັ່ງກ່າວ ໄດ້ພາກັນຫຼົບໜີຂ້າມຊາຍແດນເຂົ້າໄປໃນ
ປະເທດເຕີກກີກ່ອນທີ່ການປະຕິບັດງານຈະເລີ່ມຂຶ້ນ.

ຂະນະດຽວກັນພວກນັກເຄື່ອນໄຫວນິຍົມປະຊາທິປະໄຕໄດ້ຮຽກຮ້ອງໃຫ້ທຳການເດີນຂະ
ບວນຕໍ່ຕ້ານລັດຖະບານທ່ານ Assad ຄັ້ງໃໝ່ໃນວັນສຸກມື້ນີ້.

ບັນດາກຸ່ມປົກປ້ອງສິດທິມະນຸດເວົ້າວ່າ ມີຢ່າງນ້ອຍ 1,100 ຄົນແລ້ວໄດ້ເສຍຊີວິດໃນການ
ປາບປາມຂອງລັດຖະບານທີ່ເລີ່ມມາແຕ່ເດືອນມີນາ ແລະອີກ 10,000 ກວ່າຄົນໄດ້ຖືກຈັບ
ກຸມຄຸມຂັງ. ທີ່ນະຄອນເຈນີວາ ສະພາກາແດງໄດ້ຮຽກຮ້ອງໃຫ້ຊີເຣຍ ເປີດໂອກາດແບບມີ ຄວາມໝາຍໃຫ້ແກ່ພວກທີ່ໄດ້ຮັບບາດເຈັບຫຼືຖືກຈັບ ໄດ້ຮັບການປິ່ນປົວຫຼືໃຫ້ຍາດພີ່ນ້ອງ
ໄປຢ້ຽມຢາມໄດ້.

ນອກນັ້ນແລ້ວໃນວັນສຸກມື້ນີ້ ນາຍົກລັດຖະມົນຕີເຕີກກີທ່ານ Recep Tyyip Erdogan
ກ່າວວ່າ ທ່ານໄດ້ໂອ້ລົມກັບຜູ້ນຳຊີເຣຍ ໃນໄລຍະສອງສາມມື້ຜ່ານມານີ້ ໂດຍກົດດັນໃຫ້ຜູ້
ນຳຊີເຣຍ ປະຕິຮູບລັດຖະບານຂອງທ່ານ. ທ່ານ Erdogan ເອີ້ນການປາບປາມພວກປະ
ທ້ວງຂອງຊີເຣຍວ່າ ເປັນສິ່ງທີ່ຮັບເອົາບໍ່ໄດ້ ແລະໄດ້ກ່າວເຖິງການປະຕິບັດຕໍ່ສົບຂອງພວກ
ແມ່ຍິງທີ່ຖືກກຳລັງຮັກສາຄວາມສະຫງົບຊີເຣຍຂ້າຕາຍນັ້ນວ່າ ເປັນການກໍ່ໂທດກຳອັນນຶ່ງ.

ທີ່ນະຄອນ Brussels ລັດຖະມົນຕີກະຊວງປ້ອງກັນປະເທດຂອງສະຫະລັດທ່ານ Robert
Gates ກ່າວວ່າ ການສັງຫານປະຊາຊົນຜູ້ບໍ່ມີຄວາມຜິດຢູ່ຊີເຣຍ ຄວນຈະເປັນຄວາມວິຕົກ
ກັງວົນສຳລັບທຸກໆຄົນ.

ລັດຖະມົນຕີການຕ່າງປະເທດເຕີກກີທ່ານ Ahmet Davutoglu ກ່າວໃນວັນພະຫັດວານ
ນີ້ວ່າຊາວຊີເຣຍ 2,500 ຄົນໄດ້ຂ້າມຊາຍແດນເຂົ້າໄປໃນປະເທດຂອງທ່ານແລະເຕີກກີເວົ້າ
ວ່າຕົນບໍ່ມີຄວາມຕັ້ງໃຈທີ່ຈະປິດຊາຍແດນຂອງຕົນ. ການຫຼັ່ງໄຫຼຂອງປະຊາຊົນຊີເຣຍຂ້າມ
ຊາຍແດນເຂົ້າໄປນັ້ນເຮັດໃຫ້ພວກເຈົ້າໜ້າທີ່ເຕີກກີຕັ້ງສູນຂຶ້ນສາມແຫ່ງເພື່ອຮັບມືກັບວິກິດ
ການ.

ປະຊາຊົນຢູ່ໃນຂົງເຂດກ່າວວ່າ ມີອີກຫຼາຍພັນຄົນໄດ້ພາກັນຫຼົບໜີໄປຍັງບ້ານຕ່າງໆທີ່ຢູ່
ໃກ້ຄຽງໃນເຂດຂອງຊີເຣຍ ແລະພ້ອມແລ້ວ ທີ່ຈະຂ້າມຊາຍແດນເຂົ້າໄປໃນເຕີກກີ ໄດ້ທຸກ
ເວລາ.

XS
SM
MD
LG