ຣັດເຊຍກ່າວວ່າ ບາງສ່ວນໃນຮ່າງຍັດຕິຂອງຢູໂຣບອາຣັບກ່ຽວກັບຊີເຣຍທີ່ນຳອອກເຜີຍແຜ່
ຢູ່ໃນສະພາຄວາມໝັ້ນຄົງອົງການສະຫະປະຊາຊາດໃນມື້ວັນສຸກວານນີ້ ແມ່ນເປັນທີ່ຮັບເອົາ
ບໍ່ໄດ້ ແຕ່ກໍເວົ້າວ່າ ມົສກູພ້ອມແລ້ວທີ່ຈະທຳການເຈລະຈາກ່ຽວກັບເລື່ອງນີ້.
ເອກອັກຄະລັດຖະທູດຂອງຣັດເຊຍປະຈຳອົງການສະຫະປະຊາຊາດທ່ານ Vitaly Churkin
ກ່າວວ່າ ຮ່າງຍັດຕິດັ່ງກ່າວບໍ່ໄດ້ເອົາຫົວຊາຕໍ່ອັນທີ່ທ່ານເອີ້ນວ່າ ເສັ້ນແດງຂອງມົສກູບ່ອນທີ່
ພວກເຂົາເຈົ້າຈະບໍ່ສາມາດຜ່ານໄປໄດ້ ຮວມທັງການບັງຄັບໃນຮູບໃດຮູບນຶ່ງບໍ່ໃຫ້ມີການຂາຍ
ອາວຸດ.
ຮ່າງຍັດຕິສະບັບນີ້ ໃຫ້ການສະໜັບສະໜຸນຕໍ່ແຜນການຂອງສັນນິບາດອາຣັບທີ່ຮຽກຮ້ອງໃຫ້
ປະທານາທິບໍດີ Bashar al-Assad ໂອນອຳນາດໃຫ້ຮອງປະທານາທິບໍດີ ແລະຈັດຕັ້ງລັດ
ຖະບານສາມັກຄີຊາດຂຶ້ນເພື່ອກະກຽມການເລືອກຕັ້ງ.
ໃນວັນອັງຄານຈະມານີ້ເລຂາທິການໃຫຍ່ຂອງສັນນິບາດອາຣັບທ່ານ Nabil ElAraby ແລະ
ນາຍົກລັດຖະມົນຕີກາຕ້າຈະແຈ້ງໃຫ້ສະມາຊິກ 15 ປະເທດຂອງສະພາຄວາມໝັ້ນຄົງຊາບ
ກ່ຽວກັບການປະຕິບັດງານສັງເກດການຢູ່ໃນຊີເຣຍທີ່ເຕັມໄປດ້ວຍຄວາມຍຸ່ງຍາກຕ່າງໆນາໆ
ນັ້ນ.
ນອກນັ້ນຍັງເປັນທີ່ຄາດກັນວ່າສັນນິບາດອາຣັບຈະນຳສະເໜີແຜນການຂອງຕົນຢ່າງເປັນທາງ
ການຕໍ່ສະພາຄວາມໝັ້ນຄົງໃນອາທິດໜ້າ ແລະຄາດວ່າ ການລົງຄະແນນສຽງຈະມີຂຶ້ນບໍ່ດົນ
ຫຼັງຈາກນັ້ນ.
ຂະນະດຽວກັນ ຄວາມຮຸນແຮງຢູ່ໃນຊີເຣຍຍັງສືບຕໍ່ເພີ່ມທະວີຂຶ້ນໃນມື້ວັນສຸກວານນີ້ ເຮັດໃຫ້
ໂຕເລກຜູ້ເສຍຊີວິດມີຫຼາຍກວ່າ 70 ຄົນ ໃນໄລຍະສອງສາມມື້ຜ່ານມານີ້.
ເບິ່ງວີດີໂອ ຊາວຊີເຣຍໃນຕ່າງປະເທດ ສະໜັບສະໜຸນການປະທ້ວງ
ພວກນັກເຄື່ອນໄຫວກ່າວວ່າ ກຳລັງຂອງລັດຖະບານໄດ້ສັງຫານຫຼາຍກວ່າ 37 ຄົນໃນການ
ໂຈມຕີຢູ່ທົ່ວປະເທດໃນມື້ວັນສຸກວານນີ້. ນັກເຄື່ອນໄຫວ Rami Ab dul-Raham ກ່າວຕໍ່
ວີໂອເອວ່າ ກຳລັງຮັກສາຄວາມສະຫງົບຂອງຊີເຣຍ 6 ຄົນກໍໄດ້ຖືກຂ້າຕາຍຍ້ອນລະເບີດລົດ
ທີ່ເມືອງ Idlib ໃນພາກຕາເວັນຕົກສຽງເໜືອ ຂອງປະເທດ. ກຳລັງທີ່ນິຍົມທ່ານ Assad ມີ
ລາຍງານວ່າ ໄດ້ທຳການບຸກເຂົ້າໄປກວດຄົ້ນຢູ່ທີ່ເມືອງ Homs ໃນພາກກາງຂອງຊີເຣຍ.
ຫົວໜ້າສັງເກດການຂອງສັນນິບາດອາຣັບໃນຊີເຣຍ ກ່າວໃນວັນສຸກວານນີ້ວ່າ ພວກທີ່ເຫັນ
ເຫດການໄດ້ພົບເຫັນມີການກໍ່ຄວາມຮຸນແຮງເພີ່ມຂຶ້ນເລີ່ມແຕ່ມື້ວັນອັງຄານເປັນຕົ້ນມາ ໂດຍ
ສະເພາະແລ້ວແມ່ນທີ່ເມືອງ Homs, Hama ແລະ ເມືອງ Idlib. ຄະນະສັງເກດການໃນ
ຊີເຣຍ ທີ່ໄດ້ຮັບການຕຳໜິຕິຕຽນຢ່າງກວ້າງຂວາງນັ້ນ ແມ່ນຕິດຕາມເບິ່ງວ່າປະທານາທິບໍດີ
Assad ໄດ້ປະຕິບັດຕາມຄຍຳໝັ້ນສັນຍາທີ່ທ່ານໄດ້ໃຫ້ໄວ້ຫຼືບໍ່ທີ່ຈະຍຸຕິຄວາມຮຸນແຮງນັ້ນ.
ການປະທ້ວງຕໍ່ຕ້ານທ່ານ Assad ໄດ້ລາມໄປຍັງກຸງໄຄໂຣໃນວັນສຸກວານນີ້ ບ່ອນທີ່ຊາວຊີ
ເຣຍຈຳນວນຫຼາຍສິບຄົນໄດ້ພາກັນບຸກເຂົ້າໄປໃນສະຖານທູດຊີເຣຍປະຈຳກຸງໄຄໂຣ. ພວກຕໍ່
ຕ້ານປະທານາທິບໍດີ Assad ໄດ້ບຸກຜ່ານ ຍາມຮັກສາຄວາມປອດໄພ ແລະພາກັນທັບປະຕູ
ແລະປະຕູປ່ອງຢ້ຽມ ຂອງສະຖານທູດ ຂະນະທີ່ພວກເຂົາເຈົ້າບຸກເຂົ້າໄປໃນຕຶກອາຄານຫ້ອງ
ການຂອງທາງສະຖານທູດ.
