ບັນດາກຸ່ມສິດທິມະນຸດກ່່າວວ່າ ກໍາລັງຮັກສາຄວາມປອດໄພຂອງຊີເຣຍ ໄດ້ເຂົ້າທໍາການກວດຄົ້ນຫລາຍບ່ອນ ໃນຕອນເດິກວັນເສົາວານນີ້ຢູ່ ໃກ້ໆກັບນະຄອນຫລວງດາມັສກັສ ໂດຍໄດ້ຈັບຜູ້ເຄື່ອນໄຫວທີ່ນິຍົມປະຊາທິປະໄຕຄົນນຶ່ງ ຫລັງຈາກໄດ້ທໍາການກວາດລ້າງຢ່າງນອງເລືອດຕໍ່ພວກປະທ້ວງ.
ມີຢ່າງນ້ອຍ 12 ຄົນເສຍຊີວິດ ໃນມື້ວັນເສົາ ເວລາກໍາລັງຮັກສາຄວາມປອດໄພແລະພວກດັກຍິງຂອງຊີເຣຍ ເປີດສາກຍິງປືນໃສ່ພວກໄວ້ອາໄລທີ່ໄປຮ່ວມໃນພິທີສົ່ງສະການພວກທີ່ເສຍຊີວິດໃນມື້ວັນສຸກ ຊຶ່ງມາຮອດປັດຈຸບັນ ແມ່ນ ເປັນມື້ທີ່ມີການກວາດລ້າງຢ່າງນອງເລືອດທີ່ສຸດ ຕໍ່ການ ລຸກຮືຂຶ້ນຕໍ່ຕ້ານປະທານາທິບໍດີ Bashar al-Assad ນັ້ນ.
ວັນເສົາວານນີ້ເຊ່ນກັນ ສະມາຊິກສະພາຊີເຮຍສອງຄົນໄດ້ປະກາດລາອອກ ໃນການປະທ້ວງຕໍ່ການສັງຫານພົນລະເຮືອນ.
ພວກກຸ່ມສິດທິມະນຸດແລະພວກທີ່ເຫັນເຫດການເວົ້າວ່າ ການສັງຫານດັ່ງກ່າວມີຂຶ້ນໃນຄຸ້ມ Douma ໃນເຂດຊານເມືອງຫລວງດາມັສກັສ ແລະໃນເມືອງ Izraa ທາງພາກໃຕ້ຂອງປະເທດ. ປະຊາຊົນຫລາຍພັນຄົນໄດ້ໄປເຕົ້າໂຮມກັນຢູ່ໃນທັງສອງແຫ່ງ ເພື່ອທໍາການປະທ້ວງຕໍ່ ການສັງຫານພົນລະເຮືອນ ຢ່າງນ້ອຍ 75 ຄົນໃນມື້ວັນສຸກ ຊຶ່ງການກວາດລ້າງດັ່ງກ່າວໄດ້ມີຂຶ້ນ ນຶ່ງມື້ຫລັງຈາກທີ່ປະທານາທິບໍດີ Assad ໄດ້ເຊັນດໍາລັດຍົກເລີກການປົກຄອງໂດຍກົດພາວະສຸກເສີນ ທີ່ໄດ້ມີມາ ເກືອບ 50 ປີ ແລະດໍາລັດດັ່ງກ່າວກໍແມ່ນສ່ວນນຶ່ງຂອງຄວາມພະຍາຍາມຂອງທ່ານ Assad ເພື່ອຢຸດຕິຄວາມວຸ້ນວາຍແລະການປະທ້ວງຕໍ່ຕ້ານລັດຖະ ບານ ໂດຍການຕອບສະໜອງຄວາມຮຽກຮ້ອງຕ້ອງການບາງຢ່າງ ຂອງພວກປະທ້ວງ.
ອົງການຂ່າວ AP ລາຍງານວ່າ ມີຢ່າງນ້ອຍ 120 ຄົນຖືກຂ້າຕາຍ ໃນຄວາມຮຸນແຮງສອງມື້ຜ່ານມາ ທີ່ໄດ້ຮັບການປະນາມຈາກພວກຜູ້ນໍາໂລກ ໂຮມທັງປະທານາທິບໍດີສະຫະລັດ ທ່ານບາຣັກ ໂອບາມານໍາ.
