ພວກນັກເຄື່ອນໄຫວດ້ານສິດທິມະນຸດກ່າວວ່າ ກອງທັບຊີເຣຍ ໄດ້ສັງຫານຢ່າງນ້ອຍ 217
ຄົນທີ່ເມືອງ Homs ໃນຄວາມຮຸນແຮງເພີ່ມຂຶ້ນທີ່ເລີ້ມໃນມື້ວັນສຸກວານນີ້ຂະນະທີ່ອົງການ
ສະຫະປະຊາຊາດພ້ອມແລ້ວ ທີ່ຈະລົງຄະແນນສຽງກ່ຽວກັບຮ່າງຍັດຕິທີ່ແນໃສ່ເພື່ອຍຸຕິການ
ນອງເລືອດໃນປະເທດດັ່ງກ່າວ.
ຄະນະສັງເກດການສິດທິມະນຸດຊີເຣຍ ກ່າວໃນວັນສຸກວານນີ້ວ່າ ນອກນັ້ນ ຍັງມີອີກຫຼາຍ
ຮ້ອຍຄົນໄດ້ຮັບບາດເຈັບ ແລະຕຶກອາຄານຫຼາຍໆຫຼັງຖືກທຳລາຍ. ລູກປືນໃຫຍ່ສ່ວນຫຼາຍ
ໄດ້ຕົກລົງໃສ່ຄຸ້ມ Khalidiya ຂອງເມືອງ Homs ບ່ອນທີ່ມີການຕໍ່ຕ້ານລັດຖະບານແຮງ
ທີ່ສຸດນັ້ນ. ເມືອງດັ່ງກ່າວຊຶ່ງຕັ້ງຢູ່ໃນພາກຕາເວັນຕົກຂອງຊີເຣຍໃກ້ໆຊາຍແດນເລບານອນ
ແມ່ນນຶ່ງຂອງຈຸດລະເບີດຮ້າຍແຮງ ໃນການຕໍ່ຕ້ານລັດຖະບານ ລະຫວ່າງທີ່ມີການລຸກຮືຂຶ້ນ
ທີ່ເລີິ່ມມາໄດ້ 11 ເດືອນແລ້ວນັ້ນ.
ຂະນະທີ່ໂຕເລກຜູ້ເສຍຊີວິດເພີ່ມຂຶ້ນນີ້ສະພາຄວາມໝັ້ນຄົງຂອງອົງການສະຫະປະຊາຊາດ
ກ່າວວ່າ ຕົນຈະລົງຄະແນນສຽງ ກ່ຽວກັບຮ່າງຍັດຕິຊີເຣຍໃນວັນເສົາມື້ນີ້. ຣັດເຊຍໄດ້ຂູ່ວ່າ
ຈະໃຊ້ສິດຢັບຢັ້ງຕໍ່ຮ່າງຍັດຕິສະບັບກ່ອນ ແລະລັດຖະບານທ່ານໂອບາມາໄດ້ກົດດັນໃຫ້ຣັດ
ເຊຍສະໜັບສະໜຸນຮ່າງຍັດຕິໃໝ່ທີ່ໃຊ້ຄຳເວົ້າອ່ອນເບົາລົງກວ່າເກົ່າ ໃນການປະນາມການ
ກໍ່ຄວາມຮຸນແຮງຢູ່ໃນຊີເຣຍ.
ລັດຖະມົນຕີການຕ່າງປະເທດສະຫະລັດ ທ່ານນາງ Hillary Clinton ໄດ້ໂອ້ລົມທາງໂທ
ລະສັບໃນມື້ວັນສຸກວານນີ້ ກັບລັດຖະມົນຕີການຕ່າງປະເທດຣັດເຊຍ ທ່ານ Sergey La-
vrov ກ່ຽວກັບຮ່າງຍັດຕິສະບັບນີ້. ພວກທ່ານມີກຳນົດ ທີ່ຈະພົບປະກັນແບບເຊິ່ງໜ້າ ໃນ
ວັນເສົາມື້ນີ້ ທີ່ນະຄອນມິວນິກ ປະເທດເຢຍຣະມັນ ບ່ອນທີ່ພວກທ່ານຈະໄປຮ່ວມກອງປະ
ຊຸມວ່າດ້ວຍຄວາມໝັ້ນຄົງ ທີ່ນັ້ນ. ເປັນທີ່ຄາດກັນວ່າ ທ່ານນາງ Clinton ຈະກົດດັນໃຫ້
ທ່ານ Lavrov ຊັກຊວນໃຫ້ມົສກູ ໃຫ້ການອະນຸມັດຕໍ່ຮ່າງຍັດຕິສະບັບນີ້.
