ໂທລະພາບຂອງທາງການຊີເຣຍ ລາຍງານວ່າ ເຫດລະເບີດ 2 ຄັ້ງ ທີ່ສຳນັກງານຮັກສາ
ຄວາມປອດໄພ ໃນພາກເໜືອຂອງປະເທດໃນມື້ວັນສຸກວານນີ້ ເຮັດໃຫ້ມີຜູ້ເສຍຊີວິດຢ່າງ
ນ້ອຍ 28 ຄົນ ແລະໄດ້ຮັບບາດເຈັບ ອີກ 235 ຄົນ ຂະນະທີ່ການປາບປາມຂອງລັດຖະ
ບານຕໍ່ພວກປະທ້ວງຝ່າຍຄ້ານ ເພີ່ມທະວີຄວາມຮຸນແຮງຂຶ້ນໃນທົ່ວປະເທດ.
ເຫດລະເບີດ ທີ່ແນເປົ້າໝາຍໃສ່ຕຶກອາຄານສືບລັບ ແລະຄ້າຍກອງກຳລັງຮັກສາຄວາມ
ປອດໄພແຫ່ງນຶ່ງທີ່ເມືອງ Aleppo ໃນພາກເໜືອຂອງຊີເຣຍ ຊຶ່ງເມືອງດັ່ງກ່າວນີ້ຂ້ອນ
ຂ້າງມີຄວາມສະຫງົບ ນັບແຕ່ໄດ້ມີການລຸກຮືຂຶ້ນຕໍ່ຕ້ານອຳນາດການປົກຄອງຂອງປະທາ
ນາທິບໍດີ Bashar al-Assad ທີ່ລະເບີດຂຶ້ນໃນເດືອນມີນາປີກາຍ.
ໂທລະພາບຂອງຊີເຣຍໄດ້ຖິ້ມໂທດໃສ່ອັນທີ່ທາງໂທລະພາບດັ່ງກ່າວເອີ້ນວ່າ ກຸ່ມກໍ່ການ
ຮ້າຍປະກອບອາວຸດ ໃນການໂຈມຕີທັງສອງ ໂດຍໄດ້ອອກຂ່າວຮູບພາບສົບຂອງພວກ
ທີ່ຕາຍເຕັມໄປດ້ວຍເລືອດ ຢູ່ຕາມເດີ່ນຂ້າງນອກ ຂອງຕຶກອາຄານທີ່ໄດ້ຮັບຄວາມເສຍ
ຫາຍນັ້ນ.
ແຕ່ພັນເອກ Riyadh al-Asaad ຊຶ່ງເປັນຜູ້ບັນຊາການກອງທັບຊີເຣຍເສລີທີ່ບໍ່ມີການ
ຈັດຕັ້ງເຂັ້ມແຂງປານໃດນັ້ນ ໄດ້ປະຕິເສດວ່າຕົນບໍ່ໄດ້ເປັນຜູ້ຮັບຜິດຊອບ ແລະກ່າວຫາ
ລັດຖະບານວ່າ ເປັນຜູ້ຢູ່ເບື້ອງຫຼັງເຫດລະເບີດທັງສອງ.
