ເຖິງເວລາແລ້ວທີ່ຊາວຊີເຣຍຈະໄປລົງຄະແນນສຽງການເລືອກຕັ້ງເອົາສະພາເທດສະບານເມື່ອວັນຈັນມື້ນີ້ ຊຶ່ງເປັນການທົດສອບເທື່ອທໍາອິດຂອງການປະຕິຮູບ ທີ່ໄດ້ໃຫ້ຄໍາໝັ້ນສັນຍາໂດຍລັດຖະບານຂອງປະທາ ນາທິບໍດີ Bashar al-Assad ລຸນຫລັງທີ່ມີການປະທ້ວງຕໍ່ຕ້ານການປົກຄອງຂອງທ່ານນັ້ນ.
ການເລືອກຕັ້ງຄັ້ງນີ້ ແມ່ນເພື່ອເອົາບ່ອນນັ່ງສະພາທ້ອງຖິ່ນຫລາຍກວ່າ 17,000 ບ່ອນນັ່ງໃນທົ່ວ 14 ແຂວງຂອງປະເທດ. ລັດຖະບານໄດ້ຮຽກ ຮ້ອງໃຫ້ຜູ້ຄົນອອກມາປ່ອນບັດເປັນຈໍານວນຫລວງຫລາຍ.
ການລົງຄະແນນສຽງເລືອກຕັ້ງ ແມ່ນມີຂຶ້ນນຶ່ງມື້ລຸນຫລັງມີເຫດການກໍ່ ຄວາມຮຸນແຮງທີ່ໄດ້ສັງຫານຫລາຍເຖິງ 18 ຄົນໃນທົ່ວປະເທດ. ການປະທະກັນຫລາຍບັ້ນເມື່ອວັນອາທິດວານນີ້ ມີໂຮມທັງການປະເຊີນກັນຄັ້ງໃຫຍ່ ບັ້ນນຶ່ງໃນເຂດພາກໃຕ້ຂອງຊີເຣຍ ບ່ອນທີ່ພວກທະຫານໂຕນໜີໄດ້ສູ້ລົບ ກັບທະຫານລັດຖະບານທີ່ໜຸນຫລັງໂດຍລົດຖັງ ໃກ້ກັບເຂດຊາຍແດນທີ່ຕິດກັບປະເທດຈໍແດນ.
ພວກຊາວເມືອງ ແລະພວກນັກເຄື່ອນໄຫວກ່າວວ່າ ກອງທັບລັດຖະບານ ຈາກກອງພົນນ້ອຍຫຸ້ມເກາະ ທີ 12 ຂອງຊີເຣຍ ໄດ້ຖະຫລົ່ມໂຈມຕີເມືອງ Busra al-Harir ຢູ່ທາງພາກໃຕ້ຂອງຊີເຣຍ ກຸ່ມສິ້ງຊອມສິດທິມະນຸດຊີເຣຍ ທີ່ມີສໍານັກງານ ຢູ່ອັງກິດກ່າວວ່າ ລົດທະຫານສາມຄັນຖືກຈູດໃນການປະທະກັນນັ້ນ. ກຸ່ມສິ້ງຊອມດັ່ງກ່າວຍັງກ່າວອີກວ່າ ການສູ້ລົບທໍາ ນອງດຽວກັນ ເກີດຂຶ້ນເມື່ອວັນອາທິດວານນີ້ ໃນຫລາຍຂົງເຂດອື່ນໆທາງພາກໃຕ້ຂອງຊີເຣຍ.
ອົງການຂ່າວຣອຍເຕີໄດ້ອ້າງເອົາຄໍາເວົ້າພວກຄົນໃນທ້ອງຖິ່ນທີ່ເວົ້າວ່າ ພວກທະຫານທີ່ໂຕນໜີ ໄດ້ລີ້ຊ່ອນຢູ່ຂົງເຂດ ແລະໄດ້ໂຈມຕີລົດລໍາລຽງ ສະບຽງທະຫານ ທີ່ພາໃຫ້ເກີດການຂົ່ມຂູ່ຂອງລັດຖະບານ. ກຸ່ມສິ້ງຊອມສິດທິມະນຸດຊີເຣຍກ່າວວ່າ ການປະທະກັນອີກຫລາຍບັ້ນອີກຕ່າງຫາກລະຫວ່າງທະຫານລັດຖະບານ ແລະພວກທະຫານໂຕນໜີ ທີ່ເມືອງ Kfar Takharim ໄດ້ເຫັນພົນລະເຮືອນສອງຄົນຖືກຂ້າຕາຍ ແລະລົດບັນທຸກ ທະຫານສອງຄັນເກີດຖືກຈູດເຜົາ.
