ພວກນັກສັງເກດການຂອງສັນນິບາດຊາດອາຫຣັບ ຄາດວ່າຈະໄປຢ້ຽມເບິ່ງ 3 ເຂດ
ຫລັກໃນຊີເຣຍ ຊຶ່ງເປັນບ່ອນທີ່ ພວກກໍາລັງຮັກສາຄວາມສະຫງົບ ໄດ້ປາບປາມພວກ
ປະທ້ວງຕໍ່ຕ້ານລັດຖະບານ ໃນຂະນະທີ່ມີຄວາມສົງໄສເພີ້ມຂຶ້ນກ່ຽວກັບຄວາມໜ້າເຊື່ອ
ຖືຂອງພວກນັກສັງເກດການ.
ພວກນັກສັງເກດການ ມີກໍານົດຈະໄປເຖິງເມືອງ Daraa, Hama ແລະ Idlib ໃນວັນພະຫັດມື້ນີ້ ຊຶ່ງເປັນການອອກໄປປະຕິງານເປັນມື້ທີ 3 ເພື່ອສັງເກດການເບິ່ງວ່າ ລັດຖະບານຊີເຣຍໄດ້ຢຸດຕິການກວດລ້າງ ຢ່າງນອງເລືອດຕໍ່ພວກປະທ້ວງ ແລະໄດ້ປ່ອຍພວກນັກໂທດການເມືອງ ຕາມທີ່ໄດ້ຮັບປາກໄວ້ຫລືບໍ່.
ພວກນັກເຄື່ອນໄຫວ ແລະກຸ່ມສິ້ງຊອມສິດທິມະນຸດເວົ້າວ່າ ທະຫານຂອງລັດຖະ ບານໄດ້ສັງຫານພວກຕໍ່ຕ້ານລັດຖະບານຢ່າງໜ້ອນ 39 ຄົນ ນັບຕັ້ງແຕ່ເວລາ ທີ່ພວກນັກສັງເກດການໄປເຖິງ ໃນວັນຈັນຜ່ານມານີ້ ຊຶ່ງໃນນັ້ນໂຮມທັງ 6 ຄົນທີ່ຖືກຍິງຕາຍຢູ່ໃນເມືອງ Hama ຢູ່ພາກກາງຂອງປະເທດໃນວັນພຸດວານນີ້.
ນອກນັ້ນ ກຸ່ມສັງເກດການສິດທິມະນຸດຊີເຣຍ ທີ່ມີສໍານັກງານໃຫຍ່ຕັ້ງຢູ່ປະເທດອັງກິດກ່າວວ່າ ການກໍ່ຄວາມຮຸນແຮງ ຍັງໄດ້ເກີດຂຶ້ນໃນເຂດອື່ນໆອີກ ຂອງຊີເຣຍ ໂຮມທັງການລອບຍິງທະຫານ 4 ຄົນ ຂອງພວກທະຫານໂຕນທັບ.
ການນອງເລືອດທີ່ຍັງດຳເນີນຕໍ່ມານັ້ນ ໄດ້ກໍ່ໃຫ້ຄວາມເປັນຫ່ວງຂອງຝ່າຍຕໍ່ຕ້ານລັດ
ຖະບານຊີເຣຍເພີ້ມທະວີຂຶ້ນ ກ່ຽວກັບຄຸນນະວຸດທິ ແລະຄວາມເປັນອິດສະລະຂອງ
ພວກນັກສັງເກດການ ສັນນິບາດຊາດອາຣັບ.
ປະຊາຊົນໃນເຂດ Baba Amr ຂອງເມືອງ Homes ໄດ້ປະຕິເສດທີ່ຈະອາ ນຸຍາດໃຫ້ພວກນັກສັງເກດການເຂົ້າໄປປະຕິບັດງານຢູ່ໃນນັ້ນ ເພາະພວກເຂົາເຈົ້າ ຢືນຢັດວ່າ ໃຫ້ພວກພວກເຈົ້າໜ້າທີ່ທະຫານຕິດຕາມໄປນໍາ. ການຕໍ່ລອງດັ່ງກ່າວ ໄດ້ສິ້ນສຸດລົງເມື່ອພວກທະຫານໄດ້ຖອນຕົວ ບໍ່ໄປນໍາ.
ແລະກໍໃນວັນພຸດນັ້ນ ອົງການຂ່າວຂອງລັດຖະບານຊີເຣຍເວົ້າວ່າ ລັດຖະບານ ໄດ້ປ່ອຍຕົວພວກນັກໂທດ 755 ຄົນ ທີ່ໄດ້ຖືກຈັບໃນລະຫວ່າງດໍາເນີນການ ປະທ້ວງນັ້ນ. ກຸ່ມສິ້ງຊອມດ້ານສິດທິມະນຸດເວົ້າວ່າ ການເຄື່ອນໄຫວດັ່ງກ່າວ ເປັນບາດກ້າວໃນແງ່ບວກ ແຕ່ກໍໄດ້ສະແດງຄວາມເປັນຫ່ວງວ່າ ພວກທີ່ຖືກ ຄຸມຂັງໄດ້ຖືກຍົກຍ້າຍໜີ ກ່ອນໜ້າທີ່ການກວດກາຂອງພວກນັກສັງເກດການ ຈະມີຂຶ້ນ.
ກຸ່ມສິ້ງຊອມສິດທິມະນຸດກ່າວຫາ ຊີເຣຍວ່າ ໄດ້ຍົກຍ້າຍພວກນັກໂທດ ໜີໄປ ເຊື່ອງໄວ້ໃນສະຖານທີ່ຄຸມຂັງຂອງພວກທະຫານ ກ່ອນພວກນັກສັງເກດການຈະເດີນທາງໄປເຖິງ.
