ສົງຄາມກາງເມືອງນອງເລືອດຂອງ ຊີເຣຍ ໄດ້ກ້າວເຂົ້າສູ່ປີທີ 10 ດ້ວຍລັດຖະບານຂອງປະທານາທິບໍດີ ບາຊາ ອາລ-ອາຊາດ ປາກົດວ່າຈະຮັດແໜ້ນການຄວບຄຸມອຳນາດຂອງທ່ານຫຼາຍຂຶ້ນ, ເຊິ່ງໄດ້ຮັບການໜູນຫຼັງໂດຍກອງທັບທີ່ສຳຄັນ ແລະ ການສະໜັບສະໜູນທາງການເມືອງຈາກ ຣັດເຊຍ ແລະ ອີຣ່ານ.
ຄວາມຂັດແຍ້ງໄດ້ເລີ່ມຂຶ້ນ ເມື່ອປະຊາຊົນ ຊີເຣຍ ໄດ້ອອກມາເຕົ້າໂຮມກັນໃນຖະໜົນເມື່ອວັນທີ 15 ມີນາ 2011, ເພື່ອປະທ້ວງຕໍ່ລັດຖະບານຂອງທ່ານ ອາສຊາດ, ເຊິ່ງຕໍ່ມາໄດ້ທຳການປາບປາມທີ່ໂຫດຮ້າຍ ທີ່ໄດ້ນຳໄປສູ່ຄວາມຂັດແຍ້ງ ທີ່ໄດ້ສັງຫານປະຊາຊົນຫຼາຍກວ່າ 370,000 ຄົນ ແລະ ຫຼາຍລ້ານຄົນບໍ່ມີທີ່ຢູ່ອາໄສ.
ທ່ານ ເກຍ ເພເດີເຊັນ, ທູດພິເສດອົງການ ສະຫະປະຊາຊາດ ທີ່ຮັບຜິດຊອບ ກ່ຽວກັບ ຊີເຣຍ, ໄດ້ກ່າວໃນຄືນກ່ອນວັນຄົບຮອບສິບປີວ່າ “ຄວາມທຸກທໍລະມານຂອງປະຊາຊົນ ຊີເຣຍ ໃນລະຫວ່າງທົດສະວັດທີ່ໂສກເສົ້າ ແລະ ໂຫດຮ້າຍນີ້ຍັງຄົງຂັດຂວາງຄວາມເຂົ້າໃຈ ແລະ ຄວາມເຊື່ອຖື.”
ຫົວໜ້າອົງການສະຫະປະຊາຊາດທ່ານ ແອນໂຕນີໂອ ກູເຕເຣັສ ໄດ້ຂຽນໃນທວິດເຕີ ໃນອາທິດນີ້ວ່າ “ການຕໍ່ສູ້ນຶ່ງທົດສະວັດ ບໍ່ໄດ້ນຳເອົາສິ່ງໃດມາໃຫ້ ນອກຈາກຄວາມເສຍຫາຍ ແລະ ຄວາມທຸກທໍລະມານ.”
ຄວາມຂັດແຍ້ງດັ່ງກ່າວບາງຄັ້ງ ແມ່ນປຽບເໝືອນສົງຄາມຕົວແທນຜູ້ມີອຳນາດ, ດ້ວຍລັດຖະບານ ມົສກູ ແລະ ເຕຫະຣ່ານ ໄດ້ໜູນຫຼັງທ່ານ ອາສຊາດ ໃນຂະນະທີ່ ສະຫະລັດ ແລະ ເທີກີ ສະໜັບສະໜູນກຸ່ມຕໍ່ຕ້ານລັດຖະບານຕ່າງຫາກ.
