ກອງທັບບົກຂອງຊີເຣຍຍັງສືບຕໍ່ເຄື່ອນກຳລັງເຂົ້າໄປໃນແຂວງ Raqqa ທາງພາກເໜືອ ຂອງປະເທດ ອັນເປັນເມືອງຫຼວງ ຂອງກຸ່ມທີ່ປະກາດຕົນ ລັດອິສລາມ ທີ່ກຳລັງຕໍ່ສູ້ຢູ່ໃນ ຊີເຣຍ ແລະ ອີຣັກ ທີ່ເປັນເພື່ອນບ້ານ. ໃນຂັ້ນຕົ້ນກອງທັບຊີເຣຍ ໄດ້ບຸກເຂົ້າໄປໃນແຂວງ Raqqa ເປັນເທື່ອທຳອິດໃນວັນເສົາວານນີ້.
ກຸ່ມສິ້ງຊອມສິດທິມະນຸດຂອງຊີເຣຍ ທີ່ມີຫ້ອງການຕັ້ງຢູ່ໃນອັງກິດ ກ່າວວ່າ ກອງທະຫານ ຊີເຣຍ ໄດ້ເຂົ້າໄປເຖິງ “ເຂດຊາຍແດນ” ຂອງແຂວງ Raqqa ຊຶ່ງໄດ້ຮັບການໜູນຫຼັງ ໂດຍການໂຈມຕີທາງອາກາດ ຂອງຣັດເຊຍ.
ອີງຕາມນັກເຄື່ອນໄຫວຂອງກຸ່ມດັ່ງກ່າວ ກອງທະຫານຂອງຊີເຣຍ ໄດ້ປະທະກັບພວກນັກ ລົບ ລັດອິສລາມ ຢູ່ຕາມເສັ້ນທາງໃຫຍ່ ທີ່ເຊື່ອມຕໍ່ແຂວງ Raqqa ກັບແຂວງ Hama ທີ່ຕັ້ງຢູ່ທາງພາກຕາເວັນຕົກສຽງໃຕ້ນັ້ນ. ພວກກອງທະຫານຊີເຣຍ ຫວັງວ່າຈະເຂົ້າໄປເຖິງ ທະເລສາບ Assad ແລະທາງຫຼວງທີ່ເຊື່ອມຕໍ່ເມືອງ Raqqa ຫາເມືອງ Aleppo ຊຶ່ງເປັນ ທີ່ໝັ້ນອີກແຫ່ງໜຶ່ງຂອງກຸ່ມລັດອິສ.
ພວກຫົວຮຸນແຮງລັດອິສລາມ ໄດ້ຄວບຄຸມເມືອງ Raqqa ນັບຕັ້ງແຕ່ປີ 2013 ເປັນຕົ້ນມາ ເວລາພວກເຂົາໄດ້ຍຶດເອົາເມືອງ ຈາກກຸ່ມຕໍ່ຕ້ານປະທານາທິບໍດີ Bashar al-Assad.
ສື່ມວນຊົນຂອງທາງການຊີເຣຍ ລາຍງານວ່າ ມີການເສຍຊີວິດຢ່າງໜັກ ພາຍໃນກຸ່ມຫົວ ຮຸນແຮງລັດອິສລາມ. ກອງທັບຊີເຣຍ ຍັງບໍ່ໄດ້ເປີດເປີດເຜີຍຕົວເລກ ທີ່ເປັນທາງການ ໃດໆ ກ່ຽວກັບຈຳນວນຂອງຜູ້ທີ່ເສຍຊີວິດ.
ກຸ່ມສິ້ງຊອມສິດທິມະນຸດ ໄດ້ກ່າວໃນວັນເສົາວານນີ້ ວ່າ ໃນລະຫວ່າງການສູ້ລົບກັນ ເປັນ ເວລາ 3 ມື້ ນັ້ນ ພວກຫົວຮຸນແຮງລັດອິສລາມ ຢ່າງນ້ອຍ 26 ຄົນ ໄດ້ຖືກຂ້າຕາຍ ພ້ອມ ດ້ວຍ ທະຫານ 9 ຄົນ ຈາກກອງທັບຊີເຣຍ ແລະ ກຳລັງພັນທະມິດ.
ກອງທະຫານຊີເຣຍ ໄດ້ເລີ້ມເຄື່ອນໄຫວເຂົ້າສູ່ແຂວງດັ່ງກ່າວ ໃນວັນພຸດຜ່ານມາ ຊຶ່ງເປັນ ມື້ດຽວກັນ ກັບທີ່ກອງກຳລັງທີ່ໜູນຫຼັງໂດຍສະຫະ ລັດ ໄດ້ບຸກໂຈມຕີເມືອງ Manbij ທີ່ໝັ້ນ ຂອງລັດອິສລາມອີກແຫ່ງໜຶ່ງ ຢູ່ຫ່າງຈາກເມືອງ Raqqa ທາງກ້ຳຕາເວັນຕົກສຽງເໜືອ ປະມານ 115 ກິໂລແມັດ.
ພວກທະຫານຂອງກຳລັງປະຊາທິປະໄຕຊີເຣຍຫຼື SDF ທີ່ໜູນຫຼັງໂດຍສະຫະລັດ ຊຶ່ງ ສ່ວນໃຫຍ່ ແມ່ນຊາວເຄີດ ໄດ້ເຄື່ອນກຳລັງເຂົ້າໄປໃກ້ໆ ກັບເມືອງ Manbij ໃນວັນເສົາ ວານນີ້. ກຸ່ມສິ້ງຊອມສິດທິມະນຸດ ກ່າວວ່າ ພວກນັກລົບ SDF ຍຶດເອົາ 34 ບ້ານ ຢູ່ໃກ້ໆ ເມືອງ Manbij.
