ສັນນິບາດຊາດອາຫຣັບຮຽກຮ້ອງໃຫ້ຢຸດການນອງເລືອດກັນໃນຊີເຣຍ ແລະກ່າວວ່າ
ສິດທິຂອງປະຊາຊົນທີ່ຢາກເຫັນການປະຕິຮູບດ້ານການເມືອງແລະເສດຖະກິດຄວນ
ຈະໄດ້ຮັບການນັບຖື.
ໃນກອງປະຊຸມສຸກເສິນໃນກຸງໄຄໂຣ ນະຄອນຫລວງຂອງອີຈິບທີ່ອັດລົງໃນເຊົ້າວັນອາທິດ
ມື້ນີ້ ສັນນິບາດຊາດອາຫຣັບກ່າວວ່າຕົນຈະສົ່ງ ທ່ານ Nabil Elaraby ເລຂາທິການ
ໃຫຍ່ຂອງສັນນິບາດໄປຍັງກຸງ Damascus ເພື່ອຊອກຫາທາງແກ້ໄຂວິກິດການ.
ກຸ່ມດັ່ງກ່າວໄດ້ສະແດງຄວາມເປັນຫ່ວງກັງວົນຫລາຍທີ່ສຸດກ່ຽວກັບຄວາມຮຸນແຮງໃນຊີເຣຍ ທີ່ໄດ້ເຮັດໃຫ້ປະຊາຊົນເສຍຊີວິດແລະຮັບບາດເຈັບຫລາຍພັນຄົນແລ້ວນັ້ນ.
ຖະແຫລງການຂອງສັນນິບາດຊາດອາຫຣັບມີຂຶ້ນນຶ່ງມື້ຫລັງຈາກ ອິຣ່ານ ຊຶ່ງເປັນພັນທະມິດໃກ້ຊິດຂອງຊີເຣຍ ໄດ້ຮຽກຮ້ອງໃຫ້ລັດຖະບານໃນກຸງ Damascus ຟັງຄໍາຮຽກຮ້ອງທີ່ຖືກຕ້ອງຊອບທໍາ ຕ່າງໆຂອງປະຊາຊົນນັ້ນ.
ຖ້ອຍຖະແຫລງຂອງທ່ານ Ali Akbar Salehi ລັດຖະມົນຕີຕ່າງປະເທດອິຣ່ານ ນັບວ່າເປັນຖ້ອຍຖະແຫລງຄັ້ງທໍາອິດຈາກອິຣ່ານນັບແຕ່ການລຸກຮືຂຶ້ນຕໍ່ຕ້ານລັດຖະບານປະທານາທິບໍດີ Bashar al-Assad ແຫ່ງຊີເຣຍມາເປັນເວລາ 5 ເດືອນເລີ້ມຂຶ້ນມານັ້ນ.
ແຕ່ ພວກນັກເຄື່ອນໄຫວຊີເຣຍກ່າວວ່າ ເຖິງແມ່ນມີການຮຽກຮ້ອງຢ່າງກວ້າງຂວາງເພື່ອສັນຕິພາບກໍຕາມ ພວກກໍາລັງທີ່ຈົງຮັກພັກດີຕໍ່ທ່ານ Assad ໄດ້ທໍາການໂຈມຕີອີກໃໝ່ຕໍ່ພວກປະທ້ວງຕໍ່ຕ້ານລັດຖະບານນັ້ນ. ຢ່າງໜ້ອຍປະຊາຊົນ 2 ຄົນເສຍຊີວິດໃນການສູ້ລົບກັນໃນຫົວເມືອງຕ່າງໆໃນທົ່ວປະເທດ.
ລັດຖະບານຊີເຣຍໄດ້ປະຕິເສດຕໍ່ລາຍງານການປະທ້ວງຕ່າງໆໃນນະຄອນຫລວງນັ້ນ. ອົງການຂ່າວທາງການ SANAA ຂອງທາງການຊີເຣຍກ່າວວ່າພວກອົງການຂ່າວຕ່າງປະເທດໄດ້ເສກສັນປັ້ນແຕ່ງຂ່າວຂຶ້ນມາ.
