ປະຊາຊົນຊາວຊີເຣຍຈຳນວນຫຼາຍສິບພັນຄົນໄດ້ໄປຮ່ວມ
ພິທີສົ່ງສະການໃຫ້ແກ່ພວກທີ່ເສຍຊີວິດໃນລະຫວ່າງການ
ປາບປາມພວກປະທ້ວງຕໍ່ຕ້ານລັດຖະບານ ທີ່ຮຸນແຮງສຸດ
ເທົ່າທີ່ເຄີຍມີມາຢູ່ໃນຊີເຣຍ.
ໃນວັນເສົາມື້ນີ້ ພວກໄວ້ທຸກໄດ້ໄປໂຮມຊຸມນຸມກັນທີ່ເມືອງ
Izraa ໃນພາກໃຕ້ຊີເຣຍເພື່ອຝັງສົບໃຫ້ແກ່ຢ່າງນ້ອຍ 15
ຄົນທີ່ເສຍຊີວິດໃນລະຫວ່າງການປະທ້ວງໃນມື້ວັນສຸກວານ
ນີ້.
ບັນດາກຸ່ມປົກປ້ອງສິດທິມະນຸດເວົ້າວ່າມີຫຼາຍກວ່າ 75 ຄົນ
ໄດ້ເສຍຊີວິດທີ່ປະເທດຊີເຣຍ ໃນມື້ວັນສຸກວານນີ້ຫຼັງຈາກ
ກຳລັງຮັກສາຄວາມສະຫງົບໄດ້ຍິງປືນເຂົ້າໃສ່ພວກປະ
ທ້ວງທີ່ຮຽກຮ້ອງໃຫ້ປະທານາທິບໍດີ Bashar al-Assad ລາອອກ.
ປະທານາທິບໍດີສະຫະລັດທ່ານບາຣັກໂອບາມາໄດ້ປະນາມຊີເຣຍໃນອັນທີ່ທ່ານເອີ້ນວ່າ ການ
ໃຊ້ຄວາມຮຸນແຮງທີ່ໜ້າຢ້ານກົວ ແລະກ່າວຫາທ່ານ Assad ວ່າ ຊອກສະແຫວງຫາການ
ຊ່ອຍເຫຼືອຂອງອີຣ່ານໃນການປາບປາມທີ່ໂຫດຮ້າຍດັ່ງກ່າວ.
ເລຂາທິການໃຫຍ່ຂອງອົງການສະຫະປະຊາຊາດທ່ານ Ban Ki-moon ໄດ້ຮ່ວມສົມທົບກັບ
ທ່ານໂອບາມາຮຽກຮ້ອງໃຫ້ຢຸດເຊົາໃນທັນທີການປາບປາມຢູ່ໃນປະເທດຊີເຣຍ.
ອົງການຂ່າວ SANA ຂອງທາງການຊີເຣຍລາຍງານວ່າມີແຕ່ 10 ຄົນເທົ່ານັ້ນເສຍຊີວິດໃນ
ທົ່ວປະເທດມື້ວານນີ້ໂດຍຖິ້ມໂທດການກໍ່ຄວາມຮຸນແຮງ ໃສ່ກຸ່ມອັນທະພານປະກອບອາວຸດ
ພວກເຈົ້າໜ້າທີ່ຊີເຣຍ ໄດ້ຖິ້ມໂທດການກໍ່ຄວາມຮຸນແຮງສ່ວນໃຫຍ່ໃນຮອບເດືອນຜ່ານມານີ້ ໃສ່ກຸ່ມອັນທະພານບໍ່ເຄົາລົບກົດໝາຍທີ່ບໍ່ໄດ້ລະບຸຊື່ຈຳນວນນຶ່ງ.
