ລິ້ງ ສຳຫລັບເຂົ້າຫາ

ວັນພະຫັດ, ໒໘ ມີນາ ໒໐໒໔

ທະຫານຊີເຣຍ ຍັງສືບຕໍ່ ທໍາການໂຈມຕີ ເມືອງ Homs (ເບິ່ງວີດີໂອ)


ການແຫ່ສົ່ງສະການໃນເມືອງ Homs, ຊີເຣຍ
ວັນທີ 8 ກຸມພາ 2012.
ການແຫ່ສົ່ງສະການໃນເມືອງ Homs, ຊີເຣຍ ວັນທີ 8 ກຸມພາ 2012.

ບັນດາ​ນັກ​ເຄື່ອນ​ໄຫວ​ຊີ​ເຣຍກ່າວ​ວ່າ ພວກ​ທະຫານ​ຂອງ​ລັດຖະບານໄດ້​ສັງຫານ​ພວກ​ພົນ​ລະ​ເຮືອນຫລາຍ​ສິບ​ຄົນ​ໃນ​ເມືອງ Homs ໂດຍ ສືບ​ຕໍ່ປິດ​ລ້ອມເມືອງດັ່ງກ່າວ​ມາ​ເປັນ​ເວລາ​ນຶ່ງ​ເດືອນ ຊຶ່ງ​ເປັນ​ສູນ​ກາງ​ແຫ່ງການ​ປະ​ທ້ວງຕໍ່ຕ້ານ​ການ​ປົກຄອງ​ປະ​ເທດ​ແບບ​ຜະ​ເດັດ​ການ​ມາເປັນ​ເວລາ 11 ປີ​ຂອງ​ປະທານາທິບໍດີ Bashar al-Assad ນັ້ນ.

ກຸ່ມ​ປົກ​ປ້ອງ​ສິດ​ທິມະນຸດຊີ​ເຣຍ ທີ່​ມີ​ຫ້ອງການ​ຕັ້ງ​ຢູ່ໃນ​ປະ​ເທດ​ອັງກິດ​ກ່າວ​ວ່າ ການ​ລະດົມ​ຍິງປືນ​ໃຫຍ່ໂຈມ​ຕີ ໃນ​ວັນ​ພຸດ​ມື້​ນີ້ ຍັງໄດ້​ສ້າງ​ຄວາມ​ເສຍ​ຫາຍ​ຢ່າງ​ໜັກ​ໃຫ້​ແກ່​ພວກ​ຕຶກ​ອາຄານ​ຫລາຍ​ກວ່າ 20 ​ຫລັງ​ໃນ​ຄຸ້ມ Baba Amr ​ໃນ​ເມືອງ Homs ນັ້ນ. ການ​ຍິງ​ໂຈມ​ຕີ​ນີ້ ມີ​ຂຶ້ນຫຼັງຈາກໄດ້ທໍາ​ການ​ໂຈມ​ຕີ​ມາ​ເປັນ​ເວລາ​ຫລາຍ​ມື້​ແລ້ວ​ໃນ​ເມືອງ Homs ຊຶ່ງ​ພວກ​ນັກ​ເຄື່ອນ​ໄຫວ​ດ້ານ​ສິດທິ​ມະນຸດ​ກ່າວ​ວ່າໄດ້​ສັງຫານ​ປະຊາຊົນ​ໄປ​ຫລາຍ​ຮ້ອຍ​ຄົນ​ນັ້ນ.

ຈໍານວນໂຕ​ເລກຂອງ​ຄວາມ​ເສຍ​ຫາຍ​ກ່ຽວ​ກັບ​ຜູ້​ບາດ​ເຈັບ​ລົ້ມ​ຕາຍບໍ່​ສາມາດ​ຢື​ນຢັນ​ໄດ້ ​ເພາະວ່າ​ຊີ​ເຣຍຈໍາກັດ​ຮັດ​ແຄບ​ບໍ່​ໃຫ້​ພວກ​ນັກຂ່າວ​ທີ່​ເປັນ​ອິດ​ສະລະ​ເຂົ້າ​ໄປເອົາ​ຂ່າວ.

ທ່ານ Sergei Lavrov ລັດຖະມົນຕີ​ຕ່າງປະ​ເທດຣັດ​ເຊຍ ກ່າວ​ໃນ​ວັນ ພຸດ​ມື້​ນີ້​ວ່າ ການ​ແກ້​ໄຂ​ວິ​ກິດ​ການ​ຜ່ານ​ການ​ໂອ້​ລົມ​ສົນທະນາ​ກັນ​ພາຍ ໃນ​ຊາດ​ຄວນ​ຈະ​ມາ​ຈາກ​ປະຊາຊົນ​ຊີ​ເຣຍ​ເອງ ​ແລະ​ວ່າ ມັນ​ບໍ່​ຂຶ້ນ​ກັບ ປະຊາ​ຄົມນາໆ​ຊາດ​ທີ່​ຈະ​ເປັນ​ຜູ້​ຕັດສິນ​ຊີ້​ຂາດ​ກ່ຽວ​ກັບ​ຜົນ​ຂອງ​ການ​ໂອ້ລົມ​ສົນທະນາ​ກັນລ່ວງ​ໜ້າ.

ໃນ​ລະຫວ່າງ​ການ​ພົບ​ປະກັນ​ໃນ​ວັນ​ອັງຄານ​ວານ​ນີ້​ທີ່​ກຸງ​ດາ​ມັສກັສ ທ່ານ Assad ກ່າວ​ວ່າ ທ່ານ​ຢາກ​ໃຫ້​ຮອງ​ປະທານາທິບໍດີ Farouk al-Sharaa ​ເປັນ​ຜູ້​ນໍາພາ​ໃນ​ການ​ໂອ້​ລົມ​ສົນທະນາ​ກັນ​ກັບ​ຝ່າຍ​ຄ້ານ​ນັ້ນ.

ຄວາມ​ພະຍາຍາມ​ຕ່າງໆ​ຂອງ​ສັນນິບາດ​ອາຣັບ​ແລະຣັດ​ເຊຍ ​ເພື່ອ​ຈັດ​ໃຫ້​ມີ​ການ​ໂອ້​ລົມ​ກັນ​ນີ້ ໄດ້ຖືກ​ປະຕິ​ເສດ​ຈາກ​ພວກ​ກຸ່ມ​ຝ່າຍ​ຄ້ານ​ຊີ​ເຣຍ ​ທີ່​ພາກັນ​ເກີດ​ໂມ​ໂຫ​ໂທ​ໂສນໍາ​ການ​ປາບ​ປາມ​ຢ່າງ​ນອງ​ເລືອດ​ມາເປັນ ເວລາ 11 ​ເດືອນ ​ຕໍ່​ພວກ​ລຸກ​ຮື​ຂຶ້ນ​ຕໍ່ຕ້ານ​ລັດຖະບານ Assad ນັ້ນ.

ທ່ານ Lavrov ກ່າວ​ໃນ​ວັນ​ອັງຄານ​ວານ​ນີ້​ວ່າ ທ່ານ Assad ຈະ​ດໍາ ເນີນ​ການປະຕິ​ຮູບ​ທີ່​ໄດ້​ໃຫ້​ຄຳ​ໝັ້ນສັນຍາໄວ້​ຕໍ່​ໄປ ​ແລະ​ໃນ​ໄວໆ​ນີ້​ຈະ​ວາງ​ກໍານົດ​ເວລາ​ເພື່ອ​ໃຫ້​ມີ​ການ​ລົງ​ປະຊາ​ມະຕິ​ກ່ຽວ​ກັບ​ລັດຖະທໍາ​ມະນູນ​ສະບັບ​ໃໝ່ທີ່​ມີ​ວັດ​ຖຸປະສົງ​ທີ່​ຈະ​ຂະຫຍາຍ​ການ​ປະກອບສ່ວນ​ທາງ​ດ້ານ​ການ​ເມືອງ​ໃຫ້​ຫລາຍ​ຂຶ້ນ.

ທ່ານ​ນາງ Victoria Nuland ​ໂຄສົກ​ປະ​ຈໍາ​ກະຊວງ​ການ​ຕ່າງປະ​ເທດ ສະຫະລັດ ​ກ່າວ​ໃນ​ວັນ​ອັງຄານ​ວານ​ນີ້​ວ່າ ມັນ​ເປັນ​ການ​ເຊື່ອ​ໄດ້​ຍາກທີ່​ທ່ານ Assad ​ໃຫ້​ຄໍາ​ໜັ້ນສັນຍາ​ຄັ້ງ​ຫລ້າ​ສຸດ​ກ່ຽວ​ກັບ​ການ​ປະຕິ​ຮູບ ໃນ​ຂະນະ​ທີ່​ກໍາລັງ​ຂອງ​ທ່ານ​ ສືບ​ຕໍ່​ທໍາ​ການ​ຍິງ​ປືນ​ໃຫຍ່​ໂຈມ​ຕີ​ໃສ່ພວກ​ພົນ​ລະ​ເຮືອນ​ນັ້ນ. ລັດຖະບານ​ປະທານາທິບໍດີ ​ໂອ​ບາ​ມາ ​ໄດ້​ປິດ​ສະຖານ ທູດ​ຂອງ​ສະຫະລັດ​ລົງ​ໃນ​ກຸງ​ດາ​ມັສກັສ ​ໃນ​ວັນ​ຈັນ​ມື້ກ່ອນ​ນີ້ ​ໃນ​ຖານະ​ເປັນ​ພາກສ່ວນ​ຂອງ​ການ​ປຸກລະດົມ​ຂອງ​ຝ່າຍ​ຕາ​ເວັນ​ຕົກ ​ແລະສັນນິບາດ​ອາຣັບ​ ເພື່ອ​ໂດດດ່ຽວ​ທ່າ​ນ Assad ທາງ​ດ້ານ​ການ​ທູດ ​ແລະ​ກົດດັນ​ທ່ານ​ໃຫ້​ຢຸດ​ທໍາ​ການ​ປາບ​ປາມ​ປະຊາຊົນ​ນັ້ນ.

ຝຣັ່ງ ອີ​ຕາ​ລີ ​ແລະ​ສະ​ເປ​ນຕ່າງ​ກໍ​ຮຽກຮ້ອງ​ພວກ​ເອກ​ອັກຄະ​ລັດຖະທູດຂອງ​ຕົນ​ທີ່​ປະ​ຈໍາ​ຢູ່​ໃນ​ຊີ​ເຣຍກັບ​ຄືນ​ປະ​ເທດ​ໃນ​ວັນ​ອັງຄານ​ວານ​ນີ້ ​ໂດຍ​ອ້າງເຖິງ​ການ​ປາບ​ປາມທີ່ຍັງ​ດຳ​ເນີນຢູ່ຕໍ່​ໄປ​ຂອງ​ລັດຖະບານ​ທ່ານ Assad ນັ້ນ. 6 ປະ​ເທດ​ສະມາຊິກ​ໃນ​ສະພາ​ຮ່ວມ​ມື​ໃນ​ອ່າວ​ເປີ​ເຊຍ ພາຍ​ໃຕ້ການ​ນໍາພາ​ຂອງ Saudi Arabia ​ໄດ້​ປະກາດ​ໃຫ້​ຮູ້​ເຊ່ນ​ກັນ​ວ່າ ພວກ​ເຂົາ​ເຈົ້າ​ຈະ​ຖອນ​ພວກ​ເອກ​ອັກຄະ​ລັດຖະທູດ​ຂອງ​ພວກ​ເຂົາ​ເຈົ້າ ອອກ​ຈາກ​ກຸງ​ດາ​ມັສກັສ ​ແລະ​ຂັບ​ໄລ່​ພວກ​ນັກ​ການ​ທູດ​ຊີ​ເຣຍອອກ​ຈາກ​ປະ​ເທດ ​ເພື່ອ​ເປັນ​ການ​ຕອບ​ສະໜອງ​ຕໍ່​ຄວາມ​ຮຸນ​ແຮງ​ທີ່ກໍາລັງ​ຊຸດ​ໂຊມ ລົງ​ນັບ​ມື້​ໃນ​ຊີ​ເຣຍນັ້ນ.

XS
SM
MD
LG