ບັນດາລັດຖະມົນຕີການຕ່າງປະເທດຂອງສັນນິບາດຊາດອາຫຣັບ ໄດ້ຮຽກຮ້ອງໃຫ້ຊີເຣຍ
ເຄົາລົບນັບຖືຂໍ້ຕົກລົງຂອງຕົນ ທີ່ຈະຢຸດທໍາການໃຊ້ຄວາມຮຸນແຮງຕໍ່ພວກປະທ້ວງນັ້ນ
ແລະໄດ້ຕົກລົງທີ່ຈະເພີ່ມຈໍານວນພວກນັກສັງເກດການ ທີ່ໄປສົ່ງການເບິ່ງການຈັດຕັ້ງປະຕິ
ບັດຕາມແຜນການຂອງຕົນ.
ພວກນັກການທູດຂັ້ນສູງສຸດຈາກປະເທດກາຕ້າແລະຈາກປະເທດອາຫຣັບອື່ນໆໄດ້ພົບປະ
ກັນໃນວັນອາທິດວານນີ້ທີ່ກຸງໄຄໂຣ ເພື່ອປະເມີນເບິ່ງຄວາມຄືບໜ້າຂອງການປະກອບພາລະ
ກິດຂອງພວກນັກສັງເກດການ ທີ່ກໍາລັງປະຕິບັດງານຢູໃນຊີເຣຍ ປະມານ 100 ຄົນນັ້ນ.
ພວກນັກເຄື່ອນໄຫວຝ່າຍຄ້ານຊີເຣຍແລະບັນດາກຸ່ມປົກປ້ອງສິດທິມະນຸດໄດ້ກ່າວຕໍາໜິ
ຕິຕຽນພວກນັກສັງເກດການວ່າ ການມີໜ້າຂອງ ພວກເຂົາເຈົ້າບໍ່ໄດ້ເຮັດໃຫ້ການປາບ
ປາມຂອງພວກກໍາລັງທີ່ຈົງຮັກພັກດີຕໍ່ປະທານາທິບໍດີ Bashar al-Assad ແຫ່ງຊີເຣຍ
ຕໍ່ພວກປະທ້ວງ ຜ່ອນຄາຍລົງເລີຍ ຊຶ່ງພວກຕໍາໜິຕິຕຽນບາງຄົນໄດ້ຮຽກຮ້ອງໃຫ້ສັນນິ
ບາດຊາດອາຫຣັບຖອນ ພວກນັກສັງເກດການອອກໄປ. ແຕ່ສັນນິບາດຊາດອາຫຣັບກ່າວ
ວ່າພາລະກິດດັ່ງກ່າວຈະດໍາເນີນສືບຕໍ່ໄປ. ຫົວໜ້າທີມສັງເກດການ ນາຍພົນ Mohamed
Ahmed Mustafa al-Dabi ຈາກຊູແດນ ໄດ້ນໍາສະເໜີລາຍງານຂັ້ນຕົ້ນກ່ຽວກັບການ
ປະກອບພາລະກິດຂອງທີມງານໃນວັນອາທິດວານນີ້ ແລະຈະນໍາສະເໜີລາຍງານໂດຍ
ເຕັມໃນວັນທີ 19 ມັງກອນນີ້.
ພວກຄັດຄ້ານປະທານາທິບໍດີ Assad ຈໍານວນຫລາຍກວ່າ 50 ຄົນພາກັນໂຮມຊຸມນຸມ
ຢູ່ຂ້າງນອກໂຮງແຮມໃນກຸງໄຄໂຣ ບ່ອນທີ່ພວກລັດຖະມົນຕີການຕ່າງປະເທດຂອງສັນນິ
ບາດຊາດອາຫຣັບພົບປະກັນ ແລະພາກັນຮ້ອງຄໍາຂວັນຕ່າງໆຕໍ່ຕ້ານທ່ານ Assad.
ພວກຕໍ່ຕ້ານ ຮຽກຮ້ອງໃຫ້ຢຸດຕິການປົກຄອງແບບຜະເດັດການມາເປັນເວລາ 11 ປີ
ຂອງທ່ານ Assad ນັ້ນ.
