ບັນດານັກເຄື່ອນໄຫວດ້ານສິດທິມະນຸດຊີເຣຍ ກ່າວວ່າ ພວກກໍາລັງຂອງຝ່າຍລັດຖະບານໄດ້ສືບຕໍ່ທໍາການໂຈມຕີໃນເມືອງ Homs ໂດຍໄດ້ສັງຫານປະຊາຊົນໄປຢ່າງໜ້ອຍ 24 ຄົນ ໃນຄື້ນຟອງແຫ່ງຄວາມຮຸນແຮງທີ່ພວມເພີ່ມຂຶ້ນຕໍ່ພວກຝ່າຍຄ້ານທີ່ພາກັນລຸກຮືຂຶ້ນຕໍ່ຕ້ານລັດຖະບານມາໄດ້ 11 ເດືອນແລ້ວນັ້ນ.
ການລະດົມຍິງປືນໃຫຍ່ໂຈມຕີໃນວັນພະຫັດມື້ນີ້ ໄດ້ແນເປົ້າໝາຍໃສ່ຄຸ້ມຕ່າງໆຢູ່ໃນເມືອງ Homs ບ່ອນທີ່ພວກນັກເຄື່ອນໄຫວກ່າວວ່າ ການໂຈມຕີຂອງລັດຖະບານໄດ້ສັງຫານປະຊາຊົນໄປຫລາຍຮ້ອຍຄົນນັບແຕ່ເຊົ້າວັນເສົາຜ່ານມານີ້.
ຈໍານວນໂຕເລກຂອງຄວາມເສຍຫາຍຜູ້ບາດເຈັບລົ້ມຕາຍຈາກການສູ້ລົບກັນນີ້ບໍ່ສາມາດຢືນຢັນໄດ້ ເພາະວ່າຊີເຣຍ ຫ້າມພວກນັກຂ່າວທີ່ເປັນອິດສະລະເຂົ້າໄປເອົາຂ່າວ.
ທາງການຊີເຣຍໄດ້ຖິ້ມໂທດຄວາມຮຸນແຮງນີ້ໃສ່ພວກຜູ້ກໍ່ການຮ້າຍປະກອບອາວຸດ ແລະກ່າວວ່າ ພວກກໍ່ການຮ້າຍເຫລົ່ານີ້ເປັນຜູ້ຮັບຜິດຊອບໃນການໂຈມຕີຫລາຍບັ້ນໃນຫວ່າງບໍ່ເທົ່າໃດມື້ຜ່ານມາ ທີ່ຮວມທັງການວາງລະເບີດລົດໃນເມືອງ Homs ນັ້ນ.
ຈີນ ຊຶ່ງເຂົ້າຮ່ວມກັບຣັດເຊຍໃນການໃຊ້ສິດຍັບຍັ້ງຕໍ່ຮ່າງຍັດຕິສະ ບັບນຶ່ງຂອງສະພາຄວາມໝັ້ນຄົງສະຫະປະຊາຊາດວ່າດ້ວຍຊີເຣຍນັ້ນ ກ່າວໃນວັນພະຫັດມື້ນີ້ວ່າ ຕົນຢາກຮັກສາການຕິດຕໍ່ພົວພັນແລະການສື່ສານເອົາໄວ້ກັບບັນດາກຸ່ມຝ່າຍຄ້ານຊີເຣຍ ຫລັງຈາກຄະນະຜູ້ຕາງໜ້າຝ່າຍຄ້ານຈຸນຶ່ງເດີນທາງຢ້ຽມຢາມກຸງປັກກິ່ງ ໃນສັບປະດານີ້.
ປະທານາທິບໍດີ Bashar al-Assad ແຫ່ງຊີເຣຍໃຫ້ຄໍາໝັ້ນສັນຍາວ່າຈະແຕ່ງຕັ້ງໃຫ້ຮອງປະທານາທິບໍດີ Farouk al-Sharaa ຈັດການພົບປະກັນຂຶ້ນກັບຝ່າຍຄ້ານ ແຕ່ບັນດາກຸ່ມຝ່າຍຄ້ານປະຕິເສດຕໍ່ການພົບປະຫາລືກັນດັ່ງກ່າວ ກັບຝ່າຍລັດຖະບານນັ້ນ.
ທ່ານພັນກີມູນ ເລຂາທິການໃຫຍ່ສະຫະປະຊາຊາດ ກ່າວໃນວັນພຸດວານນີ້ວ່າ ທ່ານຈະພິຈາລະນາສົ່ງຄະນະປະຕິບັດງານຮ່ວມຂອງສະຫະປະຊາຊາດກັບສັນນິບາດອາຣັບໄປຍັງຊີເຣຍ ເພື່ອໄປສັງເກດການເບິ່ງ ຄວາມຮຸນແຮງຢູ່ທີ່ນັ້ນ.
ທ່ານພັນກິມູນ ວາງແຜນທີ່ຈະທໍາການປຶກສາຫາລືກັບພວກສະມາຊິກສະພາຄວາມໝັ້ນຄົງສະຫະປະຊາຊາດໃນອີກບໍ່ເທົ່າໃດມື້ຂ້າງໜ້ານີ້ກ່ຽວກັບລາຍລະອຽດຂອງການປະກອບພາລະກິດຂອງຄະນະປະຕິບັດງານຮ່ວມທີ່ທ່ານໄດ້ສະເໜີໃຫ້ຈັດຕັ້ງຂຶ້ນນີ້. ນອກນັ້ນ ທ່ານຍັງກ່າວເຊ່ນກັນວ່າ ທ່ານ Nabil Alaraby ເລຂາທິການໃຫຍ່ຂອງສັນນິບາດອາຣັບບອກທ່ານວ່າ ກຸ່ມສັນນິບາດອາຣັບວາງແຜນສົ່ງພວກນັກສັງເກດການຂອງຕົນເອງກັບຄືນໄປຍັງຊີເຣຍນັ້ນ.
ເບິ່ງວີດີໂອ ສະຫະລັດບໍ່ພໍໃຈ ກ່ຽວກັບການໃຊ້ສິດຍັບຍັ້ງ ຮ່າງຍັດຕິ ສປຊ ຂອງ
ຈີນແລະຣັດເຊຍ
