ຄະນະລັດຖະມົນຕີການຕ່າງປະເທດຂອງສັນນິບາດຊາດອາຣັບກໍາລັງປະຊຸມກັນໃນ
ວັນອາທິດມື້ນີ້ ເພື່ອທົບທວນເບິ່ງວຽກງານການປະກອບພາລະກິດຂອງພວກນັກສັງ
ເກດການຂອງຕົນໃນຊີເຣຍ ຊຶ່ງປະສົບກັບຄວາມລົ້ມແຫລວ ຍ້ອນບໍ່ສາມາດເຮັດໃຫ້
ການປາບປາມຢ່າງນອງເລືອຂອງລັດຖະບານຕໍ່ພວກປະທ້ວງພົນລະເຮືອນທີ່ດໍາເນີນ
ມາໄດ້ 10 ເດືອນແລ້ວ ຍຸດຕິລົງໄດ້ນັ້ນ.
ພວກລັດຖະມົນຕີເຫລົ່ານີ້ພົບປະກັນຢູ່ທີ່ກຸງໄຄໂຣ ນຶ່ງມື້ຫລັງຈາກມີການປະທະກັນຫລາຍບັ້ນ ທີ່ລາຍງານຂ່າວເວົ້າວ່າ ໄດ້ເອົາຊີວິດປະຊາຊົນໄປຢ່າງໜ້ອຍ 21 ຄົນໃນທົ່ວຊີເຣຍແລະ 2 ມື້ຫລັງຈາກການໂຈມຕີດ້ວຍລະເບີດບັ້ນນຶ່ງ ໄດ້ເຮັດໃຫ້ປະຊາຊົນເສຍຊີວິດໄປ 26 ຄົນໃນນະຄອນຫລວງດາມັສກັສ.
ພວກນັກເຄື່ອນໄຫວຝ່າຍຄ້ານໄດ້ກ່າວຖິ້ມໂທດໃສ່ລັດຖະບານເຊ່ນກັນວ່າສັງຫານພວກພົນລະເຮືອນ 17 ຄົນ ໃນການປະທະກັນກັບພວກປະທ້ວງໃນວັນສຸກຜ່ານມານີ້.
ຄາດວ່າພວກລັດຖະມົນຕີຕ່າງປະເທດເຫລົ່ານີ້ ຈະທໍາການໂອ້ລົມສົນທະນາກັນ ກ່ຽວກັບວ່າ ຈະຂໍຮ້ອງໃຫ້ສະຫະປະຊາຊາດເຂົ້າຊ່ອຍເຫລືອຫລືບໍ ໃນເມື່ອວ່າຄວາມຮຸນແຮງໃນຊີເຣຍບໍ່ໄດ້ຜ່ອນຄາຍລົງ ນັບແຕ່ພວກນັກສັງເກດການເດີນທາງໄປຮອດຊີເຣຍເມື່ອ 2 ສັບປະດາຜ່ານມາ.
ກຸ່ມນັກເຄື່ອນໄຫວທາງຄອມພີວເຕີ ທີ່ສະໜັບສະໜຸນພວກຂະບວນການສົ່ງເສີມອໍານາດປະຊາຊົນໃນທົ່ວໂລກ Avaaz ກ່າວວ່າ ມີເກືອບຮອດ 7 ພັນຄົນແລ້ວເສຍຊີວິດ ນັບແຕ່ເດືອນມີນາປີ 2011 ເປັນຕົ້ນມາ ເວລາຄວາມວຸ້ນວາຍເລີ້ມຂຶ້ນໃນຊີເຣຍ. ກຸ່ມ Avaaz ກ່າວວ່າ ໂຕເລກຜູ້ບາດເຈັບລົ້ມຕາຍຂອງຕົນໄດ້ຮັບການຢືນຢັນຜ່ານການຕິດຕໍ່ພົວ ພັນກັບແຫລ່ງຂ່າວຫລາຍແຫ່ງໃນຊີເຣຍ.
ສະຫະປະຊາຊາດກະປະມານວ່າ ມີປະຊາຊົນ 5 ພັນຄົນໄດ້ເສຍຊີວິດໃນຊີເຣຍ ໃນຂະນະທີ່ລັດຖະບານກຸງດາມັສກັສກ່າວຫາພວກກໍ່ການຮ້າຍປະກອບອາວຸດ ວ່າເປັນຝ່າຍຊຸກຍູ້ໃຫ້ເກີດຄວາມວຸ້ນວາຍແລະໄດ້ສັງຫານກໍາລັງຮັກສາຄວາມປອດໄພໄປ 2 ພັນຄົນນັ້ນ.
ປະທານາທິບໍດີ Bashar al-Assad ໄດ້ໃຫ້ຄໍາໜັ້ນສັນຍາວ່າ ຈະຖອນກໍາລັງຮັກສາຄວາມປອດໄພຈາກຫົວເມືອງຕ່າງໆ ປ່ອຍພວກນັກໂທດການເມືອງແລະອະນຸຍາດໃຫ້ມີການປະທ້ວງຕໍ່ຕ້ານລັດຖະບານໄດ້.
ແຕ່ລາຍງານຂ່າວທີ່ວ່າລັດຖະບານໄດ້ປ່ອຍພວກນັກໂທດຢ່າງຫລວງຫລາຍນັ້ນຍັງບໍ່ໄດ້ຮັບການຢືນຢັນ ຊຶ່ງສ່ວນນຶ່ງກໍເປັນຍ້ອນວ່າລັດຖະບານຫ້າມບໍ່ໃຫ້ພວກນັກຂ່າວຕ່າງປະເທດເຂົ້າໄປໃນປະເທດ.
