ບັນດານັກເຄື່ອນໄຫວໃນຊີເຣຍກ່າວວ່າ ການລະດົມຍິງປືນໃຫຍ່ໂຈມຕີຢ່າງໜັກໄດ້ເລີ້ມ
ຄືນອີກໃສ່ພວກປະທ້ວງໃນໃຈກາງເມືອງ Homs ນຶ່ງມື້ຫລັງຈາກພວກພົນລະເຮືອນຈໍາ
ນວນເກືອບ 100 ຄົນ ເສຍຊີວິດໃນທົ່ວປະເທດໃນການປາບປາມປະຊາຊົນທີ່ພາກັນລຸກ
ຮືຂຶ້ນຕໍ່ຕ້ານປະທານາທິບໍດີ Bashar al-Assad ນັ້ນ.
ບັນດານັກເຄື່ອນໄຫວກ່າວຕື່ມວ່າ ການຍິງປືນໃຫຍ່ໂຈມຕີໃນວັນອັງຄານມື້ນີ້ ໄດ້ເພັ່ງເລັງໃສ່ເຂດເມືອງ Baba Amr ອັນເປັນມື້ທີສີ່ລຽນຕິດຂອງການບຸກໂຈມຕີຂອງລັດຖະບານທີ່ໄດ້ເລີ້ມຂຶ້ນໃນອັນທີ່ ພວກນັກເຄື່ອນໄຫວເອີ້ນວ່າ ການສັງຫານໝູ່ພວກປະຊາຊົນ ຢ່າງໜ້ອຍ 200 ຄົນຕັ້ງແຕ່ຕອນເດິກແລງວັນສຸກຫາວັນເສົາຜ່ານມານີ້.
ອົງການຂ່າວແຫ່ງລັດຊີເຣຍ SANA ຖິ້ມໂທດຄວາມຮຸນແຮງນີ້ໃສ່ພວກກໍ່ການຮ້າຍປະກອບອາວຸດ.
ລັດຖະມົນຕີກະຊວງການຕ່າງປະເທດຣັດເຊຍ ທ່ານ Sergei Lavrov ໄດ້ເດີນທາງໄປຍັງກຸງດາມັສກັສ ໃນວັນອັງຄານມື້ນີ້ ເພື່ອທໍາການໂອ້ລົມສົນທະນາກັນກັບທ່ານ Assad. ການຢ້ຽມຢາມຂອງທ່ານມີຂຶ້ນຫຼັງຈາກຣັດເຊຍແລະຈີນ ໃຊ້ສິດຍັບຍັ້ງຕໍ່ຮ່າງຍັດຕິສະບັບນຶ່ງຂອງສະພາ ຄວາມໝັ້ນຄົງສະຫະປະຊາຊາດກ່ຽວກັບຊີເຣຍນັ້ນ.
ຈີນກ່າວໃນວັນອັງຄານມື້ນີ້ວ່າ ຕົນຫວັງວ່າການໂອ້ລົມສົນທະນາກັນ ສາມາດໄດ້ຮັບຜົນດີໄດ້ ແລະກ່າວຕື່ມວ່າ ຕົນກໍາລັງພິຈາລະນາສົ່ງ ພວກທູດພິເສດຂອງຕົນເອງໄປຍັງພາກພື້ນໃນຄວາມພະຍາຍາມເພື່ອຊ່ອຍແກ້ໄຂວິກິດການໃນຊີເຣຍນີ້.
ຂະນະດຽວກັນ ສະຫະລັດໄດ້ອັດສະຖານທູດຂອງຕົນລົງໃນຊີເຣຍແລະໄດ້ຖອນພວກນັກການທູດຂອງຕົນທັງໝົດທີ່ຍັງເຫລືອຢູ່ໃນຊີເຣຍນັ້ນອອກຈາກປະເທດ.
ກະຊວງການຕ່າງປະເທດສະຫະລັດ ກ່າວວ່າ ທ່ານ Robert Ford ເອກອັກຄະລັດຖະ
ທູດແລະພວກເຈົ້າໜ້າທີ່ການທູດອື່ນໆໄດ້ເດີນທາງ ອອກຈາກກຸງມາມັສກັສໄປຍັງນະ
ຄອນຫວງ Amman ຂອງຈໍແດນໃນວັນຈັນວານນີ້ ປະໃຫ້ສະຖານທູດ Poland ເປັນ
ຜູ້ໃຫ້ການບໍລິການທາງດ້ານກົງສູນໃນພາວະສຸກເສິນຕ່າງໆໃຫ້ພວກຄົນອາເມຣິກັນໃນ
ຊີເຣຍນັ້ນ ແລະກ່າວຕໍ່ໄປວ່າ ລັດຖະບານຂອງທ່ານອັສສັດ ບໍ່ໄດ້ຕອບ ສະໜອງຢ່າງ
ພຽງພໍ ຕໍ່ຄວາມເປັນຫ່ວງກັງວົນຕ່າງໆຂອງສະຫະລັດກ່ຽວກັບຄວາມປອດໄພທີ່ກໍາລັງ
ຊຸດໂຊມລົງໃນເຂດອ້ອມແອ້ມສະຖານທູດໃນໃຈກາງເມືອງນັ້ນ.
ແຕ່ຮອງລັດຖະມົນຕີຊ່ອຍວ່າການກະຊວງການຕ່າງປະເທດສະຫະລັດ ວ່າດ້ວຍກິດຈະ
ການຕາເວັນອອກໃກ້ ທ່ານ Aaron Snipe ກ່າວຕໍ່ວີໂອເອວ່າ ສາຍພົວພັນທາງການ
ທູດຍັງຄົງມີຢູ່ກັບລັດຖະບານທ່ານອັສສັດ ແລະປະຊາຊົນຊີເຣຍນັ້ນ.
ເບິ່ງລາຍງານທີ່ກ່ຽວຂ້ອງກັນ:
